Read Ngaju LUKAS 20 Bible Online

LUKAS 20 - Ngaju bible

LUKAS 20

¹Hong sinde andau Yesus metoh Ie majar tuntang mambarita Barita Bahalap bara Hatalla akan kare oloh hong Human Tuhan. Kare imam kapala, kare guru agama, hayak dengan kare pamimpin Yehudi, dumah,

²tuntang hamauh dengan Yesus, “Coba sanan akan ikei hunjun dasar en ikau malalus taloh handiai toh? Eweh je manenga hak te Akam?”

³Yesus tombah, “Aku handak misek. Coba sanan akang-Ku,

⁴Yohanes Pampandoi hapan hak eweh? Hatalla atawa olon?”

⁵Maka ewen nampara barunding, “Amon itah manyewut, ‘Mahapan hak Hatalla,’ Ie kareh hamauh, ‘Amon kalote mbuhen keton dia percaya dengae?’

⁶Tapi amon itah hamauh, ‘Mahapan hak olon,’ kakare oloh kareh mamanting itah hapan batu, awi ewen percaya Yohanes te ije biti nabi.”

⁷Jadi ewen tombah, “Ikei dia katawan.”

⁸Maka Yesus hamauh dengan ewen, “Amon kalote Aku mahin dia handak mansanan akan keton mahapan hak eweh Aku malalus taloh samandiai toh.”

⁹ Yesus manyarita akan kare oloh te paribasa jetoh, “Aton ije biti oloh je mangabun ije kalambar petak hapan anggor. Ie mampasewa kabon akan pire-pire oloh tukang garap palus haguet akan tanah beken tuntang tahi melai hete.

¹⁰Metoh sampai katikae mamutik bua anggor, tempon kabon te manyoho jipee manalih kare oloh tukang garap te mangat manarima bagin aie. Tapi kare oloh tukang garap te mamukul jipen te tuntang manyoho ie buli buang.

¹¹Maka tempon kabon te manyoho tinai ije jipee je beken; tapi jipen jete mahin imukul tuntang ihina awi kare oloh tukang garap te, palus inyohoe buli buang kea.

¹²Limbah te tinai tempon kabon te manyoho jipee je kateloe. Tapi jipen jete mahin imukul kea awi kare oloh tukang garap te tuntang injakah ewen ie akan luar kabon te.

¹³Kajariae tempon kabon te hamauh, ‘Aku musti malalus en hindai? Aku kareh manyoho anakku kabuat je eka sintangku. Pasti ie kareh ihormat ewen!’

¹⁴Tapi katika kare tukang garap te mite anak tempon kabon te, ewen hamauh sama arepe, ‘Toh ie ahli warise. Ayo itah mampatei ie, mangat itah mandino warisae.’

¹⁵Maka ewen mihir ie akan luar kabon te palus mampatei ie.” Palus Yesus misek, “Nah, amon tempon kabon te haluli, en je kareh iawie dengan kare oloh tukang garap te?

¹⁶Pasti ie kareh dumah tuntang mampatei oloh tukang garap te, palus manyarah kabon te akan kare oloh tukang garap awang beken.” Mahining jete, maka koan kare oloh dengan Yesus, “Dia bakae ah!”

¹⁷ Yesus manampayah ewen palus hamauh, “Amon kalote, en riman ayat Surat Barasih toh? ‘Batu je ihapan awi tukang pangun huma, jari manjadi batu je mambatang.’

¹⁸Kakare oloh je manjato intu batu te kareh rotek; tuntang eweh je buah batu te kareh sama kilau mipis manjadi kawo.”

¹⁹Kare guru agama tuntang kare imam kapala katawan je paribasa te puna iawi Yesus manintu ewen. Awi te ewen handak manawan Ie hemben te kea, tapi ewen mikeh dengan oloh are.

²⁰Jadi ewen manggau katika je buah. Ewen mupah oloh mangat oloh te mawi arepe sama kilau oloh je tinduh, tuntang manyoho kare oloh te manjabak Yesus dengan kare paisek, mangat ewen tau manyarah ie akan wewenang tuntang kuasan gubernur.

²¹Maka kare oloh je jari dinon upah te hamauh dengan Yesus, “Pa Guru, ikei katawan kakare taloh je insanan tuntang iajar Bapa te bujur. Ikei katawan Bapa majar bujur tuntang tarang tahiu kahandak Hatalla akan olon, awi Bapa dia mintih ampin oloh.

²²Awi te coba Bapa mansanan akan ikei, manumon atoran agaman itah, en tau mambayar pajak akan Kaisar atawa dia?”

²³Tapi Yesus katawan akal ewen te. Awi te Ie hamauh,

²⁴“Coba parahan akangku ije kabawak duit perak. Gambar tuntang aran eweh toh?” “Kaisar!” koan ewen tombah.

²⁵“Amon kalote,” koan Yesus dengan ewen, “tenga akan Kaisar taloh je ain Kaisar tuntang akan Hatalla, taloh je ain Hatalla.”

²⁶Batantu toto hong taharep oloh are te, ije mahin jaton taloh sala je tau ewen dinoe intu Yesus. Ewen baya suni bewei tuntang jungun awi auh tombah Aie te.

²⁷ Pire-pire oloh bara baris Saduki dumah manalih Yesus. (Ewen te baris oloh je manirok oloh matei dia tau belom haluli.) Ewen misek dengan Yesus,

²⁸ “Bapa Guru, Moses manyurat hukum jetoh akan itah: Amon ije biti oloh hatue matei tuntang ie jaton dinon anak, maka paharie musti kawin dengan baloe mangat manenga turonan akan oloh je jari matei te.

²⁹Puji aton uju biti oloh hampahari. Ije bakas kawin, palus matei jaton dinon anak.

³⁰Limbah te tinai je kaduee kawin dengan baloe te, tapi ie mahin matei jaton mandino anak.

³¹Hal je kalote manjadi kea dengan paharie je kateloe tuntang rai-rait sampai je kaujue.

³²Kajariae oloh bawi te matei kea.

³³Hong andau oloh matei belom haluli, en sawan eweh oloh bawi te? Basa kauju-ujue uras jari kawin dengae.”

³⁴Yesus tombah, “Kare oloh je belom wayah toh kawin,

³⁵tapi kare oloh je patut impisik limbah ewen matei, tuntang belom hong jaman je akan dumah, ewen dia kawin.

³⁶Keadaan ewen sama kilau malekat, tuntang dia tau matei. Ewen te anak Hatalla, awi ewen jari impisik haluli bara pampatei.

³⁷ Moses kabuat mansanan tarang toto je oloh matei kareh imbelom haluli. Huang surate tahiu rowut je hanyala ie manyewut Tuhan kilau ‘Hatallan Abraham, Hatallan Isaak tuntang Hatallan Yakob’.

³⁸Nah, Hatalla te dia ie Hatallan oloh matei! Ie Hatallan kare oloh je belom! Basa akan Hatalla, oloh samandiai uras belom.”

³⁹Pire-pire guru agama hamauh, “Auh tombah Bapa Guru bahalap toto.”

⁴⁰Awi te ewen dia bahanyi hindai misek taloh en-en dengan Yesus.

⁴¹Yesus misek dengan ewen, “Kilen ampie Raja Panyalamat tau inyewut turonan Dawid?

⁴² Padahal Dawid kabuat hamauh huang surat Masmur, ‘Tuhan hamauh dengan Tuhangku: Mondok Ikau hila gantaung-Ku,[27]

⁴³sampai Aku mawi kare musoh Aim mamenda Ikau.’

⁴⁴Jadi amon Dawid manyewut Raja Panyalamat te ‘Tuhan’, kilen ampie tau ie te turonan Dawid?”

⁴⁵Metoh kare oloh mahining Yesus hakotak, Ie hamauh dengan kare murid Ayue,

⁴⁶ “Bua-buah keton manaharep kare guru agama. Ewen rajin tanjo-tanjong hapan jubah panjang, tuntang rajin ihormat intu kare pasar. Ewen rajin hong kare eka je paham ihormat intu huma sombayang tuntang intu kare pesta.

⁴⁷Ewen manipu kare balo tuntang marampas humae. Tuntang hapae manutup kapapan ewen te, ewen balakudoa panja-panjang! Hukuman ewen kareh babehat!”