Read Ngaju LUKAS 21 Bible Online

LUKAS 21 - Ngaju bible

LUKAS 21

¹Intu Human Tuhan, Yesus mite kare oloh tatau manamean duit akan huang patin parapah.

²Ie mite kea ije biti balo je belom susah, manamean due kabawak duit tambaga.

³Palus Yesus hamauh, “Hining toh: balo toh manamean labih are bara kakare oloh awang beken.

⁴Basa ewen samandiai manamean bara kalabien ramoe. Tapi balo toh aloh ie belom susah, ie manenga kakare je aton huang ie taloh je perlu ihapae akan pambelome.”

⁵Aton kare oloh je hakotak tahiu ampin kahalap Human Tuhan imakaian hapan batu je bahala-halap tuntang hapan kare ramo je inyarah akan Hatalla. Maka Yesus hamauh dengan ewen,

⁶“Kareh aton katikae, kakare taloh je gitan keton toh akan baduroh; ije batu mahin jaton hetoh je kareh melai hasusun intu ekae!”

⁷Ewen misek dengan Yesus, “Bapa Guru, hamparea taloh te kareh manjadi? Tuntang en tandae amon katikae jari sampai hal te akan manjadi?”

⁸Yesus hamauh, “Keleh barendeng, ela sampai keton buah tanjaro. Are oloh kareh dumah tuntang mahapan arang-Ku, tuntang hamauh, ‘Aku toh ie!’ tuntang ‘Jari wayahe.’ Tapi ela keton omba ewen.

⁹Ela kea keton mikeh amon keton mahining barita tahiu parang tuntang pambarontakan. Kakare taloh te musti manjadi helo. Tapi jete dia baarti wayah Kiamat jari sampai.”

¹⁰Palus Yesus malajur kotake koae, “bangsa ije kareh parang malawan bangsa je beken tuntang negara ije kareh manyarang negara je beken.

¹¹Hong hete-hete kareh lembut petak hagerek je paham, bahaya lau tuntang panyakit. Kare hal je mawi oloh mangkarieng tuntang mikeh angate kareh manjadi kea hong langit.

¹²Tapi helo bara taloh handiai te manjadi, keton kareh inawan tuntang ingapehe. Keton kareh iimbit akan pangadilan hong huma sombayang tuntang inamean akan huang penjara. Tuntang keton kareh iirit oloh manaharep kare raja tuntang kare panguasa awi keton murid-Ku.

¹³Jete katika je bahalap akan keton uka mansanan Barita Bahalap bara Hatalla.

¹⁴ Keleh keton himat atei je keton dia baka mikeh tahiu taloh je musti inyewut keton hapan mambela arep keton.

¹⁵Aku kabuat kareh manenga akan keton kare auh tuntang kapintar-kaharati te, sampai ije biti mahin jaton bara kare musoh keton olih malawan atawa milim taloh je inyewut keton.

¹⁶Keton kareh indawa awi indu-bapa keton, awi kare paharin keton, awi kare tundah kolan keton tuntang awi kare kawal keton. Belahe keton kareh impatei awi ewen.

¹⁷Keton kareh inyingi awi kakare oloh awi ganan keton jadi murid-Ku.

¹⁸Tapi ije kalambar mahin jaton balau keton nihau bara takolok keton.

¹⁹Amon keton tahan tuntang sabar, keton kareh inyalamat.”

²⁰“Amon keton mite Yerusalem ingapong tentara, keton kareh katawan lewu te dia tahi hindai handak baduroh.

²¹Hong katika te oloh je aton intu Yuda musti hadari akan bukit. Ewen je aton hong lewu musti malihi lewu te, tuntang ewen je aton hong luar lewu ela tame lewu.

²² Basa kare andau te jete ‘Andau Oloh Buah Hukum’, uka awi hal te maka manjadi taloh je inyurat huang Surat Barasih.

²³Dia lue-luen kapapan kare andau te akan kare oloh bawi je metohe batihi, tuntang ibu je magon mampatuso anak awau! Daerah jetoh kareh mangkeme kasusah je paham hai, tuntang Tuhan kareh mahukum bangsa jetoh.

²⁴Aton oloh je kareh impatei hapan padang, aton kea je kareh iimbit kilau tawanan akan kare lewun oloh; tuntang kare oloh je dia mangasene Hatalla kareh manandik Yerusalem sampai lepah katika je jari inantu Tuhan akan ewen.”

²⁵ “Kareh intu matanandau, bulan tuntang kare bintang aton gitan kare tanda. Hong hunjun petak, kare bangsa kareh mikeh tuntang bingung manaharep auh kanyahai tuntang letus tasik.

²⁶Oloh kareh mikeh sampai handak matei manaharep taloh je kareh manjadi hong hapus kalunen toh, basa kare panguasa hong langit kareh manjadi kusak-kasik.

²⁷ Intu katika te Anak Olon kareh dumah hong baunandau huang kuasan Aie tuntang kahaie je paham.

²⁸Amon kare taloh te nampara manjadi, keleh keton hingkat tuntang manggatang takolok keton, basa hanjulo hindai keton akan inyalamat.”

²⁹Palus Yesus manyarita akan ewen paribasa jetoh, koae, “Tampayah ampin batang sikon tuntang kare batang kayu awang beken.

³⁰Amon kare sulohe nampara gitan, keton katawan je wayah pandang jari tokep.

³¹Kalote kea amon keton mite kare taloh je manjadi, keton kareh katawan je Hatalla bajeleng akan marentah kilau Raja.

³²Keleh keton katawan! Kare taloh te akan manjadi helo bara kare oloh je belom wayah toh matei lepah.

³³Langit tuntang petak kareh lilap, tapi auh-Ku tetep sampai katatahie.”

³⁴“Keleh manjaga arep keton, ela sampai keton lalau deroh mawi pesta tuntang mihop danum je tau mambusau, atawa lalau manirok kare soal pambelom keton, sampai keton dia tatap metoh andau te dumah manantekas.

³⁵Basa andau te kareh dumah kilau parangkep akan oloh handiai hong hunjun petak toh.

³⁶Keleh bajaga tuntang balakudoa harajur mangat keton abas manaharep kakare hal je akan manjadi tuntang keton tau manaharep Anak Olon.”

³⁷ Yesus majar intu Human Tuhan metoh handau, tuntang hamalem Ie haguet akan Bukit Saiton tuntang melai intu hete.

³⁸Genep hanjewu kakare oloh dumah akan Human Tuhan uka mahining Yesus majar.