Read Ngaju LUKAS 22 Bible Online

LUKAS 22 - Ngaju bible

LUKAS 22

¹ Andau Pesta Rote Je Dia Iragi je inyewut Pesta Paska jari tokep.

²Kare imam kapala tuntang kare guru agama metohe manggau jalan uka mampatei Yesus suni-suni, awi ewen mikeh dengan oloh are.

³Limbah te tinai setan mangumpang Yudas je inyewut kea Iskariot, iete ije biti bara kare duewalas murid Yesus.

⁴Tagal te Yudas haguet tuntang barunding dengan kare imam kapala tuntang kare kapala pangawal Human Tuhan tuntang kilen ampie ie tau manyarah Yesus akan ewen.

⁵Ewen hanjak toto tuntang hajanji manenga duit akae.

⁶Yudas mahin pakat tuntang nampara manggau katika je bahalap uka manyarah Yesus akan ewen, sampai oloh jaton katawae.

⁷Maka andaue sampai, huang Pesta Rote Je Dia Iragi oloh manyambalih tabiri akan panginan hong pesta Paska.

⁸Maka Yesus manyoho Petrus tuntang Yohanes, “Lius ih natap panginan Paska akan itah.”

⁹“Hong kueh Bapa handak uka ikei manatape?” koan ewen misek.

¹⁰Yesus tombah, “Hong katika keton tame akan lewu, ije biti oloh hatue metohe mimbit ije kandi basuang danum kareh hasondau dengan keton. Nuntut ie akan huma je inamee,

¹¹tuntang sanan akan oloh tempon huma te: Guru hamauh: ‘Hong kueh eka akan kare murid-Ku tuntang Aku kuman panginan Paska?’

¹²Tempon huma te kareh maninjok akan keton ije kamar loteng je hai, sukup dengan kare pakakas huange. Natap taloh samandiai te hong hete.”

¹³Maka Petrus tuntang Yohanes haguet, palus sondau taloh handiai te sama kilau je insanan awi Yesus. Maka ewen manatap panginan Paska hete.

¹⁴Metoh jari sampai katikae akan kuman panginan Paska te, Yesus mondok haya-hayak dengan kare murid Ayue hong eka kuman.

¹⁵Palus ie hamauh dengan ewen, “Aku mipen toto kuman panginan Paska toh hayak dengan keton helo bara Aku buah kapehe!

¹⁶Basa, percaya bewei: Aku kareh dia tinai kuman jetoh sampai riman panginan toh ingarinah hong Lewu Taheta ain Hatalla.”

¹⁷Limbah te Yesus manggatang cangkir anggor, palus balakudoa manarimakasih inatu Hatalla, limbah te Ie hamauh, “Duan, tuntang mbagi jetoh;

¹⁸karana keleh keton katawan: nampara bara katika toh Aku kareh dia mihop anggor toh tinai sampai Hatalla marentah hapan salepah kuasan Aie.”

¹⁹Limbah te Yesus manduan rote. Tuntang limbah manyewut lakudoa tarimakasih, Ie mangiwak-mangiwak rote te hapan lengen Aie palus manengae akan ewen, tuntang hamauh, “Jetoh biting-Ku [je inyarah akan keton. Lalus jetoh hapan mingat Aku.”

²⁰ Kalote kea limbah kuman, Ie manenga cangkir anggor te akan ewen tuntang hamauh, “Cangkir toh janjin Hatalla je taheta, je iawi manjadi sah hapan dahang-Ku — daha je inusoh akan keton.”]

²¹ “Tapi ite! Oloh je mandarhaka mawi Aku aton intu hetoh hinje Aku!

²²Anak Olon puna akan matei sama kilau je jari inukas awi Hatalla; tapi calaka oloh je mandarhaka mawi Ie!”

²³Maka ewen nampara hisek sama arepe, eweh bara ewen te je akan malalus hal te.

²⁴ Bara marak kare murid Yesus lembut auh je hatakian tahiu eweh bara ewen je musti inyewut paling hai.

²⁵ Yesus hamauh dengan ewen, “Kare rajan bangsa je dia mangasene Hatalla manindas rayate, tuntang kare oloh je marentah ewen te inyewut ‘Pangalindong Rayat’.

²⁶ Tapi keton dia tau kalote. Tapi, oloh je pangkahaie hong marak keton musti manjadi sama kilau je pangkakorike, tuntang pamimpin musti manjadi sama kilau pembantu.

²⁷ Eweh je labih hai: oloh je mondok kuman intu meja, atawa oloh je mandohop ie? Batantu oloh je mondok te. Tapi Aku aton hong marak keton sama kilau ayang.

²⁸Huang kare kasusah-Ku, keton harajur hinje Aku.

²⁹sama kilau Bapa jari manenga akang-Ku hak uka marentah, kalote Aku kareh manenga akan keton hak te.

³⁰ Awi kalote keton tau omba hanja-hanjak dengang-Ku hong katika Aku manjadi Raja. Tuntang keton kareh mondok hunjun duewalas padadusan uka marentah duewalas bangsa Israel.”

³¹“Simon, Simon, hining toh! Setan jari inenga katika uka maningkes keton; mangat mamisah je bahalap bara je papa; sama kilau gandom je bakulap bara upake.

³²Tapi Aku jari balakudoa akam, Simon, mangat kapercayam dia luntur. Tuntang amon ikau jari haluli manalih Aku, ikau musti manenga kaabas akan kare paharim.”

³³Petrus tombah, “Aku tatap handak tame penjara tuntang matei haya-hayak dengan Tuhan!”

³⁴“Percaya bewei, Petrus,” koan Yesus, “helo bara manok manando andau toh, hantelo ikau jari milim Aku.”

³⁵ Limbah te Yesus hamauh dengan ewen, “Bihin katika Aku manyoho keton haguet sambil kea mangahana keton mimbit dompet, kantong, atawa sapatu, en aton keton tapas taloh en-en?” “Jaton!” koan ewen tombah.

³⁶“Tapi toh,” koan Yesus, “eweh je jaton dompet atawa kantong, musti ie mimbite; tuntang eweh je jaton padange, musti manjual jubahe hapae mamili padang.

³⁷ Basa, percaya bewei, ayat Surat Barasih je kalotoh auhe, ‘ie inyewut sama kilau oloh papa,’ musti manjadi buah Aku. Basa taloh je tarasurat huang Surat Barasih tahiu Aku kanjerae manjadi metoh toh.”

³⁸“Tuhan,” koan kare murid Yesus, “ite, intu hetoh aton due padang.” “Nauhe ih!”[28] koan Yesus tombah.

³⁹Yesus malihi lewu tuntang sama kilau bahut Ie haguet akan bukit Saiton, tuntang kare murid Ayue haguet kea Dengae.

⁴⁰Katika sampai intu hete, Ie hamauh dengan ewen, “Keleh keton balakudoa mangat keton ela buah tingkes.”

⁴¹Limbah te tinai ie haguet bakejau isut bara ewen, kurang labih ije kapanting batu,

⁴²palus mandeko utut Aie tuntang balakudoa. “Bapa,” Koae, “amon tau, ngejau ih bara Aku kapehe je musti buah Aku toh. Tapi ela manumon kahandak-Ku, malengkan manumon kahandak Bapa bewei.” [

⁴³Ije biti malekat dumah manalih Ie tuntang mampaabas Ie.

⁴⁴Yesus paham kapehe angat huange sampai ie sasar toto-toto balakudoa. Ebese sama kilau daha mahantis akan petak.]

⁴⁵Limbah jari balakudoa, Yesus haluli tinai manalih kare murid Ayue. Ie sondau ewen metohe batiroh awi paham pehe ateie.

⁴⁶Palus Ie hamauh dengan ewen, “Mbuhen keton batiroh? Keleh misik tuntang balakudoa mangat keton dia buah tingkes.”

⁴⁷Pandehan Yesus magon hakotak, maka dumah ije rombongan oloh. Ewen imimpin awi Yudas, ije biti bara kare murid Yesus. Limbah te tinai Yudas haguet manalih Yesus palus manyium Ie.

⁴⁸Tapi Yesus hamauh dengae, “Yudas, en mahapan sium ikau handak mandarhaka mawi Anak Olon?”

⁴⁹Katika kare murid Yesus je aton intu hete mite taloh je handak manjadi, ewen hamauh, “Tuhan, ikei mamok ih hapan padang!”

⁵⁰Palus ije bara kare ewen mariwis jipen imam hai hapan padang sampai balumpeng pindinge.

⁵¹Tapi Yesus hamauh, “Jadi ih!” Palus Ie manggayap pinding oloh te tuntang mampakelehe.

⁵²Limbah te tinai Yesus hamauh dengan kare imam kapala tuntang kare perwira pangawal Human Tuhan, hayak kare pamimpin Yehudi je dumah akan hete mangat manawan Ie, “En Aku toh oloh papa, sampai keton dumah hapan padang tuntang gagada mangat manawan Aku?

⁵³ Genep andau Aku aton hong Human Tuhan, keton jaton manawan Aku. Tapi katika toh keton mawie, metoh kuasan kakaput malalus gawie.”

⁵⁴Ewen manawan Yesus tuntang mimbit Ie akan human imam hai. Petrus manuntut bara likut.

⁵⁵Hong bentok halaman huma te apui pehon jari inotong tuntang Petrus haguet mondok dengan kare oloh je mondok mangalilinge.

⁵⁶Ije bara kare jipen bawi mite Petrus mondok intu saran apui pehon te; palus jipen bawi te manantuani Petrus, limbah te Ie hamauh, “Oloh toh kea endau aton haya-hayak dengan Yesus!”

⁵⁷Tapi Petrus malawan. Ie hamauh, “Aku samasinde jaton kasene oloh te!”

⁵⁸Hanjulo ih limbah te, ije biti oloh beken mite Petrus tuntang hamauh, “Ikau mahin oloh je omba ewen te!” Tapi Petrus tombah, “Dia, beken aku!”

⁵⁹Kurang labih ije jam limbah te, ije biti oloh beken tinai hamauh hapan hai auhe, “Puna Ie oloh toh murid Yesus, basa Ie kea oloh Galilea!”

⁶⁰Tapi Petrus tombah, “En koam, aku dia katawae!” Hemben te kea, pandehan Petrus magon hakotak, manok manando.

⁶¹Yesus palus tampaliau tuntang nampayah Petrus. Palus Petrus taraingat Tuhan jari hamauh dengae, “Helo bara manok manando andau toh, ikau hantelo jari milim Aku.”

⁶²Maka Petrus balua bara hete tuntang manangis side-siden.

⁶³Kare oloh je manjaga Yesus, mureh tuntang mamukul Ie.

⁶⁴Ewen manutup matan Aie tuntang misek Dengae, “Coba ngakira eweh je mamukul Ikau?”

⁶⁵Are hindai kare auh je iawi ewen hapa mahina Ie.

⁶⁶Hanjewu andau tinai, kare pamimpin Yehudi, kare imam kapala, tuntang kare guru agama, hapumpong, palus mimbit Yesus manaharep Majelis Agama ain ewen.

⁶⁷“Sanan akan ikei,” koan ewen Dengae, “en Ikau toh Raja Panyalamat?” Yesus tombah, “Amon Aku mansanan akan keton, mahin keton dia percaya.

⁶⁸Tuntang amon Aku misek keton, mahin keton dia tombah.

⁶⁹Tapi nampara bara toh, Anak Olon kareh mondok hila gantaun[29] Hatalla je Pangkahain Kuasae.”

⁷⁰Ewen uras hamauh, “Amon kalote, Ikau toh anak Hatalla?” Yesus tombah, “Kalote koan keton.”

⁷¹Maka ewen hamauh, “Dia perlu hindai saksi! Itah uras mahining bara nyaman Ayue kabuat!”