Read Ngaju LUKAS 23 Bible Online

LUKAS 23 - Ngaju bible

LUKAS 23

¹Kakare oloh hong sidang te uras mendeng, palus mimbit Yesus akan taharep Pilatus.

²Intu hete ewen manampara mandawa Ie. Ewen hamauh, “Ikei dinon oloh toh mampalayang rakyat. Ie manantiring oloh mangat ela mambayar pajak akan Kaisar, awi koae, ie toh Kristus, ije biti Raja.”

³Palus Pilatus misek dengan Yesus, “En toto Ikau rajan oloh Yehudi?” Yesus tombah, “Kalote koam.”

⁴Maka koan Pilatus dengan kare imam kapala tuntang kare oloh are te, “Aku jaton sondau kasalan huang oloh toh uka tau mahukum Ie.”

⁵Tapi ewen sasar manjuju auhe tinai, “Dengan kare auh ajare, Ie manantiring oloh hapus tanah Yuda; nampara solake hong Galilea, tuntang toh jari sampai tinai akan hetoh.”

⁶Katika Pilatus mahining jete, ie misek, “En oloh toh oloh Galilea?”

⁷Limbah insanan je Yesus te asale bara daerah je aton hong penda kuasan Herodes, Pilatus mangirim Yesus manalih Herodes, je metoh te aton kea hong Yerusalem.

⁸Herodes hanjak toto katika mite Yesus, basa jari tahi ie mahining tahiu Ie tuntang mipen handak mite Ie. Ie maharap tau manyaksi Yesus mawi taloh heran.

⁹Awi te Herodes mawi are paisek akae, tapi Yesus dia tombah samasinde.

¹⁰Kare imam kapala tuntang kare guru agama manaharep kea intu hete tuntang mandawa Yesus paham toto.

¹¹Herodes dengan kare tantara mureh tuntang mahina Yesus palus makaian Ie mahapan pakaian oloh hai, limbah te manyoho Ie haluli manalih Pilatus.

¹²Hong andau te kea Herodes dengan Pilatus, je katahin helo-helo te hamusoh, palus hasobat tinai.

¹³Pilatus mamumpong kare imam kapala, kare pamimpin tuntang rakyat,

¹⁴palus hamauh dengan ewen, “Keton mimbit oloh toh manalih Aku tuntang mansanan je Ie toh mampalayang kare oloh. Toh intu taharep keton aku jari mariksa Ie, tapi ije mahin jaton samasinde kapapa je sondau-Ku sama kilau je indawa keton mawi Ie.

¹⁵Herodes mahin manirok kalote kea, basa ie jari mangirim Yesus te haluli akan ikei. Oloh toh ije mahin jaton taloh gawie sampai Ie patut ihukum matei.

¹⁶Tagal te aku handak mamukul Ie hapan cambuk limbah te malapas Ie.” [

¹⁷Hong gagenep pesta Paska, Pilatus musti maliwus ije tahanan akan rakyat.]

¹⁸Kakare oloh je hapumpong intu hete mangkariak, “Patei Ie! Palapas Barabas akan ikei!” (

¹⁹Barabas ihukum penjara tagal pambarontakan je manjadi hong lewu tuntang awie mampatei oloh.)

²⁰Pilatus handak maliwus Yesus, tagal te Ie hakotak sinde tinai dengan oloh are te.

²¹Tapi ewen mangkariak, “Nyampalaki Ie! Nyampalaki Ie!”

²²Palus hong tingkat je kateloe tinai Pilatus hamauh hai auhe dengan ewen, “Tapi en kasalae? Ije mahin jaton kasalan je inyondauku huang Ie sampai Ie patut buah hukuman matei! Aku handak mamukul Ie hapan cambuk, palus malapas Ie.”

²³Tapi ewen jua-juan mangkariak sakalepah belaie je Yesus te musti inyampalaki. Tuntang auh kariak ewen te puna bahasil.

²⁴Maka Pilatus mawi hukuman matei buah Yesus sama kilau palakun kare oloh te,

²⁵tuntang maliwus oloh je ilaku ewen, iete oloh je ihukum penjara tagal pambarontakan tuntang awie mampatei oloh. Limbah te ie manyarah Yesus akan ewen mangat ewen mawi Ie sakahandak atei ewen.

²⁶Maka ewen palus mimbit Yesus. Hong benteng jalan, ewen hasondau dengan ije biti oloh je bagare Simon, asale bara Kirene, katika te metohe tame lewu. Ewen manawan ie, palus mamaksa ie meton sampalaki te hila likut Yesus.

²⁷Are oloh omba mananjong hila likut Yesus — bara marak ewen te aton kea kare oloh bawi. Kare oloh bawi te manangis tuntang manatum Yesus.

²⁸Tapi Yesus tampaliau akan hila ewen tuntang hamauh, “Kare bawin oloh Yerusalem! Ela manangis akangku. Keleh manangis akan arep keton kabuat tuntang akan kare anak keton.

²⁹Basa kareh sampai katikae oloh akan hamauh, ‘Lalehan katuah kare oloh bawi je tamanang, je dia puji luas tuntang dia puji mampatuso anak awau!’

³⁰ Hong katika te oloh kareh hamauh dengan kare bukit, ‘Sangkulep ikei!’ Tuntang dengan kare lungkoh, ‘Nawon ikei!’

³¹Basa amon dengan kayu je magon belom, oloh jari mawi sama kilau toh, mahin hindai ewen mawie dengan kayu je jari matei keang!”

³²Aton tinai due biti oloh beken — kadadue ewen te oloh papa — je iimbit ewen mangat ihukum matei haya-hayak dengan Yesus.

³³Katika sampai hong eka je bagare “Bangon Takolok”, ewen manyampalaki Yesus tuntang kadadue oloh papa te — ije hila gantau tuntang ije tinai hila sambil Yesus.

³⁴ Palus Yesus balakudoa, “Bapa, ampun ih ewen! Ewen jaton katawan taloh je iawi ewen.” Pakaian Yesus imbagi intu hete akan sama arep ewen mahapan tenong.[30]

³⁵ Kare oloh mendeng intu hete sambil manampayah tuntang metoh te kare pamimpin Yehudi halalea Yesus sambil hamauh, “Ie jari manyalamat oloh beken; coba toh Ie manyalamat Arepe kabuat, amon Ie puna toto-toto Raja Panyalamat je iintih Hatalla!”

³⁶ Kare prajurit mahin mureh Ie. Ewen dumah tuntang manenga anggor masem Akae

³⁷hayak hamauh, “Amon Ikau rajan oloh Yehudi, nyalamat Arepm!”

³⁸Intu hila hunjun sampalakin Yesus, inyurat kare auh kalotoh: “Jetoh Rajan Oloh Yehudi.”

³⁹Ije bara oloh papa je inyampalaki hete mahina Yesus. Ie hamauh, “Ikau Raja Panyalamat kan? Nah, nyalamat Arepm, tuntang ikei!”

⁴⁰Tapi oloh papa je beken tinai, maningak kawale te, koae, “En ikau dia mikeh dengan Hatalla? Ikau sama-sama ihukum matei sama kilau Ie.

⁴¹Baya hukuman kue toh patut ih dengan gawin itah. Tapi Ie te samasinde jaton kasalae!”

⁴²Palus ie hamauh, “Yesus, ingat aku amon Ikau dumah kilau Raja!”

⁴³“Percaya ih,” koan Yesus dengae, “Andau toh ikau aton hinje Aku hong Pirdaus.”

⁴⁴Kurang labih pukul due walas bentok andau, matanandau jaton gitan kalawae, tuntang hapus daerah te manjadi kaput toto sampai pukul telo halemei.

⁴⁵ Benang horden je iniring intu Human Tuhan, barabit sila due.

⁴⁶ Palus Yesus mangkariak hapan kanyangit auh Ayue, “Bapa! Huang lengen Aim Aku manyarah arep-Ku!” Limbah hamauh kalote, Ie palus matei.

⁴⁷Katika komandan pasukan mite kare taloh je jari manjadi, ie manara Hatalla. Palus ie hamauh, “Toto, ie dia basala!”

⁴⁸Oloh are je dumah akan hete mangat mitee, ewen mite taloh je manjadi. Ewen uras buli hayak ateie paham manyasal.

⁴⁹ Tuntang kakare oloh je mangasene Yesus, tatamput kea kare oloh bawi je manuntut Ie bara Galilea, mendeng bara kejau tuntang mite taloh handiai te.

⁵⁰Aton oloh je bagare Yosep, je asale bara lewu Arimatea hong daerah Yuda. Ie te ije biti oloh bahalap je ihormat oloh, tuntang ie mentai wayahe Hatalla nampara marentah kilau Raja. Aloh ie te anggota Majelis Agama, ie dia omba pakat dengan kaputusan tuntang gawin majelis te.

⁵¹

⁵²Yosep te haguet manalih Pilatus tuntang balaku mangat hantun Yesus inenga akae.

⁵³Limbah te tinai ie mampamohon hantun Yesus bara kayu sampalaki, palus mambungkus Ie hapan benang baputi bara linen. Limbah te ie mingkes Ie intu huang kubur je inampa intu huang bukit batu — kubur te hindai puji ihapan.

⁵⁴Andau te andau Jumahat; tuntang andau Sabat handak nampara.

⁵⁵Kare oloh bawi je dumah hayak dengan Yesus bara Galilea manuntut Yosep tuntang mite kubur te. Ewen mite kea kilen ampie hantun Yesus iingkes intu huang kubur.

⁵⁶ Limbah te ewen buli palus manatap kare rarampah tuntang minyak harum hapan maminyak hantun Yesus. Hong andau Sabat ewen tende bagawi uka mamenda hukum agama.