Read Ngaju LUKAS 24 Bible Online

LUKAS 24 - Ngaju bible

LUKAS 24

¹Hong andau Minggo hayak hanjewu toto, kare oloh bawi te haguet akan kubur mimbit kare rarampah je jari inatap ewen.

²Intu kubur, ewen mite batu tutup kubur te jari tagaling.

³Palus ewen tame akan huang kubur te, tapi ewen jaton mite hantun Tuhan Yesus hete.

⁴Metoh ewen mendeng hete tuntang bingung manirok hal te, salenga aton due oloh mahapan pakaian mangilat-malinyau mendeng tokep ewen.

⁵Ewen mikeh toto palus mahukup akan petak, pandehan te due oloh te hamauh dengan ewen, “Mbuhen keton manggau oloh belom hong marak oloh matei?

⁶ Ie jaton hetoh. Ie jari belom! Ingat taloh je jari insanae akan keton metoh Ie magon hong Galilea,

⁷iete ‘Anak Olon musti inyarah akan oloh badosa, palus inyampalaki, tuntang hong andau je kateloe Ie misik.’ ”

⁸Limbah te harue ewen mingat dengan kare auh Yesus.

⁹Limbah ewen haluli bara kubur te, ewen manyarita kakare taloh je manjadi te akan kare sawalas rasul tuntang kare murid Ayue awang beken.

¹⁰Kare oloh bawi je mansanan taloh handiai te akan kare murid Yesus, iete: Maria Magdalena, Yohana tuntang Maria indu Yakobus, tinai kare oloh bawi beken je aton haya-hayak dengan ewen.

¹¹Tapi kare rasul te manyangka kare oloh bawi te baya manyarita taloh je mia-mias ih. Ewen dia percaya saritan kare oloh bawi te.

¹²Tapi Petrus hingkat tuntang hadari akan kubur. Sambil mangketong ie manyengok akan huang, palus mite baya benang baputi ih aton hete. Petrus hengan toto palus buli marak are angat paisek huang ateie tahiu taloh je jari manjadi. [31]

¹³Hong andau te kea due biti murid Yesus metoh mananjong akan ije lewu je bagare Emaus, kurang labih sawalas kilometer kakejaue bara Yerusalem.

¹⁴Sambil mananjong ewen hapander-sarita tahiu kakare taloh je jari manjadi te.

¹⁵Metoh ewen pande-pander tuntang mangumang sama arep ewen due, Yesus kabuat dumah tuntang mananjong haya-hayak dengan ewen.

¹⁶Ewen mite Yesus tapi aton taloh en-en je mawi ewen dia mangasene Ie.

¹⁷Palus Yesus hamauh, “En taloh je imander keton hong benteng jalan toh?” Ewen tende marak baun ewen asi-asi ampie.

¹⁸Palus ije bara ewen due te je bagare Kleopas, misek dengan Yesus, “En tikas Bapa kabuat ih bara kare oloh asing hong Yerusalem je dia katawan taloh je manjadi hong hete katahin toh?”

¹⁹“En taloh je manjadi?” koan Yesus misek. “Taloh je manjadi buah Yesus, oloh bara Nasaret te,” koan ewen tombah. “Ie te nabi. Kare auh Ayue tuntang kare gawin Aie paham kuasan Aie — aloh manumon tampayah Hatalla kalote kea manumon tampayah oloh samandiai.

²⁰Kare imam kapala tuntang kare pamimpin bangsa itah manyarah Ie uka ihukum matei, tuntang ewen manyampalaki Ie!

²¹Padahal ikei maharap, Ie te ih je kareh tau maliwus Israel! Tuntang andau toh, andau kateloe limbah taloh te manjadi.

²²Tuntang tinai, pire-pire oloh bawi bara marak ikei mawi ikei tarewen. Hayak hanjewu toto ewen akan kubur,

²³tapi ewen jaton sondau hantun Aie hete. Palus ewen haluli tuntang mansanan ewen mite malekat, tuntang kare malekat te hamauh je Yesus te belom.

²⁴Pire-pire oloh bara ikei palus haguet akan kubur tuntang sondau taloh samandiai je insanan awi kare oloh bawi te, puna toto kalote, baya ewen dia mite Yesus.”

²⁵Palus Yesus hamauh dengan ewen, “Keton puna humong! Keton lalau barimet percaya taloh handiai je jari insanan awi kare nabi!

²⁶En diakah Raja Panyalamat musti labih helo buah kapehe te, harun Ie mandino kahain Aie?”

²⁷Limbah te Yesus manarang akan ewen taloh je inyurat huang sahapus Surat Barasih tahiu Ie, nampara bara kare surat Moses sampai surat kare nabi.

²⁸Metoh ewen manokep lewu je inalih ewen, ampin Yesus kilau jaka handak mananjong mahalau ih,

²⁹tapi ewen manahan Ie. “Melai hong eka ikei ih,” koan ewen Dengae, “toh jari handak hamalem tuntang jari nampara kaput kea.” Maka Yesus tame uka baramalem hong eka ewen.

³⁰Katika mondok kuman hayak dengan ewen, Yesus manduan rote, manyewut tarimakasih akan Hatalla, mangiwak-mangiwak rote te mahapan lengee, palus manengae akan ewen.

³¹Limbah te ewen ingarendeng je oloh te Yesus. Tapi ie lilap bara tampayah ewen.

³²Koan ewen sama arepe, “En dia atei itah sama kilau inggerek, metoh Ie hakotak dengan itah hong benteng jalan, tuntang manarang Surat Barasih akan itah?”

³³Hemben te kea ewen hingkat palus haluli akan Yerusalem. Hong hete ewen sondau sawalas murid Yesus metoh hapumpong haya-hayak.

³⁴Ewen te hamauh, “Puna toto Tuhan jari belom haluli! Ie jari mamparahan Arepe akan Simon!”

³⁵Kadadue murid Yesus je harue dumah te palus manyarita panyangkum ewen hong benteng jalan, tuntang kilen ampie ewen mangasene Tuhan metoh Ie mangiwak-mangiwak rote.

³⁶Metoh ewen magon hasarita, Yesus kabuat salenga mendeng hong bentok ewen sambil hamauh, “Salamat akan keton!” [32]

³⁷Ewen tarewen tuntang mikeh toto, awi ewen manyangka jete kambe.

³⁸Tapi Yesus hamauh, “Mbuhen keton mikeh? Mbuhen lembut kabembang huang atei keton?

³⁹Ite lengeng-Ku tuntang paing-Ku, jetoh puna Aku! Gayap tuntang tampayah, basa kambe jaton bara isi tuntang tulang, sama kilau je gitan keton intu Aku.”

⁴⁰Yesus hamauh kalote sambil mamparahan akan ewen lengen Aie tuntang paie.[33]

⁴¹Tuntang pandehan ewen magon hindai olih percaya, tagal kahanjak tuntang kahengan ewen je malabien, Yesus misek dengan ewen, “En ain keton aton panginan intu hetoh?”

⁴²Ewen manenga Akae ije kasayat goreng lauk.

⁴³Yesus manduan lauk te, palus kumae intu taharep ewen.

⁴⁴Limbah te Ie hamauh dengan ewen, “Jetoh ie kare taloh je jari insanang-Ku akan keton metoh Aku magon aton hinje dengan keton: iete gagenep taloh je inyurat tahiu Aku huang kare Surat Moses, kare nabi, tuntang Masmur, musti manjadi.”

⁴⁵Limbah te tinai Yesus mukei tirok ewen mangat harati riman auh Surat Barasih.

⁴⁶Palus Ie hamauh dengan ewen, “Huang Surat Barasih aton inyurat tahiu Raja Panyalamat je musti buah kapehe, tuntang musti misik tinai bara pampatei hong andau je kateloe.

⁴⁷Tuntang tinai huang aran Raja Panyalamat te musti kea imbarita akan kare bangsa iete oloh kalunen musti hobah tuntang Hatalla mampun dosa. Tuntang barita te musti imbarita nampara bara Yerusalem.

⁴⁸Maka keton toh manjadi saksi akan kare taloh handiai te.

⁴⁹ Tuntang Aku kabuat kareh mangirim akan keton taloh je jari injanji awi Bapa. Tapi keton musti tatap mentai hong lewu toh sampai kuasan Hatalla basuang intu keton.”

⁵⁰Limbah te Yesus mimbit ewen akan luar lewu sampai hong Betania. Intu hete Ie manggatang lengee palus mamberkat ewen.

⁵¹Metoh Ie mawie kalote, Ie hagatang akan sorga, palus[34] hambilang bara ewen.

⁵²Ewen mandeko utute manyembah Ie, limbah te tinai haluli akan Yerusalem hayak atei ewen hanjak toto,

⁵³tuntang raju-rajur manara Hatalla huang Human Tuhan.