Read Ngaju LUKAS 3 Bible Online

LUKAS 3 - Ngaju bible

LUKAS 3

¹Hong nyelo kalime walas pamarentahan Kaisar Tiberius, Pontius Pilatus manjadi gubernur hong Yuda, tuntang Herodes marentah hong Galilea. Pilippus, paharin Herodes marentah hong wilayah Iturea tuntang Trakonitis, tapi Lisanias marentah hong Abilene.

²Kare oloh je manjadi imam hai iete Hanas tuntang Kayapas.[3] Hong nyelo te kea Hatalla hamauh dengan Yohanes, anak Sakaria, hong padang pasir.

³Maka Yohanes haguet akan hete-hete hong hapus daerah Sungei Yordan tuntang manyampai barita bara Hatalla. Yohanes mantehau, “Hobah keton bara kare dosan keton, tuntang keton musti impandoi, mangat Hatalla mampun keton.”

⁴ Hal te hakabuah dengan auh je tarasurat huang surat Nabi Yesaya: “Aton oloh je teha-tehau intu padang pasir, ‘Keleh manatap jalan akan Tuhan, keleh mamparata jalan akae.

⁵Gagenep datah kareh inimbok, gagenep bukit tuntang lungkoh imparata. Jalan je kolak-kelok keleh imbujur tuntang jalan je kumbang-kembut imparata.

⁶Kare oloh hong hapus kalunen manampayah Hatalla manyalamat olon!’ ”

⁷ Are oloh dumah manalih Yohanes mangat impandoi. Yohanes hamauh dengan ewen, “Keton toh oloh papa! Eweh je mansanan akan keton je keton tau luput bara hukuman Hatalla je rahian?

⁸ Parahan hapan gawin keton je keton jari hobah bara kare dosan keton! Ela nampara manyewut je Abraham te tato-hiang keton. Ingat: Bara kare batu toh kea Hatalla tau manampa turonan Abraham!

⁹ Kapak jari tatap hapa maneweng batang kayu sampai akan kare parokate. Gagenep upon kayu je dia mampalembut bua je bahalap kareh ineweng tuntang inganan akan apui.”

¹⁰“Jadi, en taloh je patut ikei mawie?” koan kare oloh misek dengan Yohanes.

¹¹Yohanes tombah, “Oloh je aton due bajue, musti manenga ije akan oloh je jaton bajue; tuntang oloh je aton panginae, musti mambagie.”

¹² Kare panagih pajak kea dumah manalih Yohanes mangat impandoi. Ewen misek, “Bapa Guru, en taloh je musti ikei mawie?” Yohanes tombah,

¹³“Ela managih malabien bara je jari inukas.”

¹⁴Aton kea prajurit je misek, “Kilen ampie tahiu ikei? En taloh je musti ikei malaluse?” Yohanes tombah, “Ela mimes eweh bewei tuntang ela marampas duit hapan kare auh dawa je dia toto. Keleh keton mangkeme sukup dengan gajih keton!”

¹⁵Hong katika te kare oloh nampara misek, en Yohanes te Raja Panyalamat je jari tahi ientai.

¹⁶Jete sababe Yohanes hamauh dengan ewen, “Aku mampandoi keton hapan danum, tapi kareh aton oloh je dumah labih hai bara aku. Mengkak talin sapatun Ayue bewei mahin aku toh dia patut. Ie kareh mampandoi keton hapan Roh Hatalla tuntang apui.

¹⁷Intu lengen Aie aton nyiru hapa mangiap gandom Ayue sampai barasih. Gandom kareh imumpong Awie huang lepau, tapi kare apise akan inusul hong apui je jaton tarabelep!”

¹⁸Kalote Yohanes manasehat kare oloh hapan kare macam cara, hong katika ie mansanan Barita Bahalap.

¹⁹ Tapi Herodes, oloh je mimbing kuasa hong Galilea, iningak awi Yohanes tagal pangawie dengan Herodias, sawan paharie, tuntang tahiu kare gawi papa beken je jari iawie.

²⁰Tapi Herodes sasa-sasar mandahang haream kapapae awi ie manamean Yohanes akan huang penjara.

²¹Limbah kakare oloh te impandoi, Yesus impandoi kea. Tuntang katika Ie metoh balakudoa, langit buap,

²² tuntang Roh Hatalla mohon akan hunjun Ie sama kilau burong dara. Palus tarahining auh Hatalla mansanan, “Ikau toh Anak-Ku je inyinta-Ku. Ikau je manyanang atei-Ku.”

²³Hong katika Yesus nampara bagawi, umure aton kira-kira telo puluh nyelo. Manumon tirok oloh, ie te anak Yosep, anak Eli,

²⁴anak Matat, anak Lewi, anak Malki, anak Yanai, anak Yosep,

²⁵anak Matatias, anak Amos, anak Naum, anak Esli, anak Nagai,

²⁶anak Maat, anak Matika, anak Simei, anak Yosek, anak Yuda,

²⁷anak Yohanan, anak Resa, anak Serubabel, anak Sealtiel, anak Neri,

²⁸anak Malkhi, anak Adi, anak Kosam, anak Elmadam, anak Er,

²⁹anak Yosus, anak Elieser, anak Yorim, anak Matat, anak Lewi,

³⁰anak Simeon, anak Yuda, anak Yosep, anak Yonam, anak Elyakim,

³¹anak Melea, anak Mina, anak Matata, anak Natan, anak Dawid,

³²anak Isai, anak Obed, anak Boas, anak Salmon, anak Nahason,

³³anak Aminadab, anak Admin, anak Arni, anak Hesron, anak Peres, anak Yuda,

³⁴anak Yakob, anak Isaak, anak Abraham, anak Terah, anak Nahor,

³⁵anak Serug, anak Rehu, anak Peleg, anak Eber, anak Salmon,

³⁶anak Kenan, anak Arpakhsad, anak Sem, anak Noah, anak Lameh,

³⁷anak Metusalah, anak Henoh, anak Yared, anak Mahalaleel, anak Kainan,

³⁸anak Enos, anak Set, anak Adam, anak Hatalla.