Read Ngaju LUKAS 4 Bible Online

LUKAS 4 - Ngaju bible

LUKAS 4

¹Yesus inguasa awi Roh Hatalla metoh Ie malihi Sungei Yordan. Roh Hatalla mangagalan Ie akan padang pasir.

²Intu hete Ie iningkes awi setan epat puluh andau katatahie. Katahin te, Ie jaton kuman taloh en-en. Kajariae Ie mangkeme balau.

³Setan hamauh Dengae, “Ikau toh Anak Hatalla kan? Jadi, soho ih batu toh manjadi rote.”

⁴ Yesus tombah, “Hong Surat Barasih aton tarasurat, ‘Oloh dia tau belom awi rote bewei.’ ”

⁵Palus setan mimbit Yesus akan eka je gantong, tuntang huang ije kapijep mate setan mamparahan Akae salepah karajaan huang kalunen.

⁶“Kakare kuasa tuntang panatau toh akan inyarahku Akam,” koan setan dengan Yesus, “basa taloh handiai te jari inenga akangku tuntang aku tau manengae akan eweh bewei je aku rajin manengae.

⁷Taloh samandiai te kareh manjadi Ayum, amon Ikau sontop manyembah aku.”

⁸ Yesus tombah, “Huang Surat Barasih aton tarasurat, ‘Keleh ikau manyembah Tuhan Hatallam tuntang manempo Ie bewei.’ ”

⁹Palus setan mimbit Yesus akan Yerusalem tuntang mingkes Ie intu hunjun babungan Human Tuhan tuntang hamauh Dengae, “Ikau Anak Hatalla, kan? Jadi, sewu ih bara hetoh.

¹⁰ Basa huang Surat Barasih aton tarasurat, ‘Hatalla kareh manyoho kare malekat Ayue mahaga Ikau bua-buah.’

¹¹ Tuntang kea, ‘Kare malekat kareh manyambut Ikau hapan lengee, mangat pain Ayum mahin jaton tatigong batu.’ ”

¹² Yesus tombah, “Huang Surat Barasih aton inyurat, ‘Ela maningkes Tuhan, Hatallam.’ ”

¹³Limbah setan jari lepah maningkes Yesus mahapan kare macam cara, ie malihi Yesus tuntang mentai katika je bahalap.

¹⁴Limbah te Yesus haluli akan Galilea tuntang Ie inguasa awi Roh Hatalla. Kabar tahiu Ie tayap akan hapus daerah te.

¹⁵Ie majar hong kare huma sombayang, tuntang oloh uras manara Ie.

¹⁶Yesus haguet tinai akan Nasaret, ekae metoh tabela sampai Ie hai. Hong andau Sabat, tumon bahut Ie haguet akan huma sombayang. Ie mendeng mangat mambasa Surat Barasih,

¹⁷tuntang akae inenga surat Nabi Yesaya. Ie muap balon surat te, palus sondaue ayat kalotoh,

¹⁸ “Roh Tuhan aton intu Aku, basa Ie jari mangkat Aku uka mansanan Barita Bahalap akan oloh je belom susah. Ie manyoho Aku mangat mansanan kaliwus akan oloh je buah tawan tuntang karigas akan oloh babute; uka mambebas oloh je inindih

¹⁹tuntang mambarita panumah andau ain Tuhan manyalamat ungkup Ayue.”

²⁰Yesus mambalon surat te haluli, tuntang maliae akan petugas, palus mondok. [4] Kakare oloh huang huma sombayang te uras manampayah Ie.

²¹Tuntang Yesus manampara hakotak dengan ewen, kalotoh, “Kare ayat Surat Barasih toh, andau toh jari inggenep katika keton mahininge.”

²²Kare auh je inyewute bahalap toto, sampai ewen jungun tuntang marajin Ie. Ewen hamauh, “En dia ie toh anak Yosep?”

²³Maka Yesus hamauh dengan ewen, “Pasti keton kareh mahapan paribasa toh mawi Aku, ‘Dokter, pakeleh Arepm kabuat ih. Taloh heran je ihining ikei iawim hong Kapernaum, keleh ikau mawie kea hong lewu human Ayum.’ ”

²⁴ Yesus manontong Auhe, “Ingat, dia aton nabi je ihormat hong lewu human Ayue kabuat.

²⁵ Tapi hining toh: hong jaman Elia, metoh ujan jaton mohon telo nyelo katatahie, palus lembut lau je paham hong hapus petak danum. Hong katika te kare balo hong Israel are.

²⁶ Aloh kalote, Hatalla dia manyoho Elia manalih aloh ije bara kare balo te tapi baya manalih ije biti balo hong Sarpat intu daerah Sidon.

²⁷ Kalote kea hong jaman nabi Elisa are oloh hong Israel buah panyakit kulit je baka ike-ikeh, tapi ije biti mahin jaton bara ewen te je impakeleh, beken bara Naaman oloh Siria te.”

²⁸Kakare oloh huang huma sombayang te balait toto metoh mahining hal te.

²⁹Ewen mendeng palus maharak Yesus balua lewu, tuntang mimbit Ie akan biling bukit, eka lewun ewen aton. Ewen handak mambaring Ie akan penda tiwing.

³⁰Tapi Yesus manselat oloh are te palus haguet.

³¹Limbah te Yesus haguet akan Kapernaum hong Galilea. Intu hete Ie majar kare oloh hong andau Sabat.

³² Ewen jungun mite ampin carae majar, basa Ie hakotak hapan kuasa.

³³Intu hete hong huma sombayang aton ije biti oloh je irasuk setan. Oloh te mangkariak,

³⁴“O Yesus, oloh Nasaret, ikau handak mawi en akan ikei? Ikau dumah mangat mambinasa ikei? Aku katawan eweh Ikau: Ikau Sarohan je barasih bara Hatalla!”

³⁵“Suni!” koan Yesus malait setan te. “Balua bara oloh toh!” Palus setan te mahampas oloh te intu taharep ewen handiai, limbah te balua bara oloh te tuntang dia mangapehe ie.

³⁶Kakare oloh hengan, tuntang hamauh sama arepe, “Dia laluen kare auh Ayue te. Hapan kuasa tuntang kaabas, Ie manyoho kare roh papa balua, tuntang ewen balua kea!”

³⁷Maka barita tahiu Yesus te tayap akan hapus wilayah te.

³⁸Yesus malihi huma sombayang te, palus haguet akan human Simon. Empo Simon je bawi metoh badarem, tuntang kare oloh mansanan hal te akan Yesus.

³⁹Yesus manalih eka ibu te batiroh, palus maharak darem te. Darem te nihau, tuntang empo Simon te balalu hingkat tuntang mandohop ewen.

⁴⁰Metoh matanandau belep, kakare oloh mimbit kare paharie je buah macam-macam ampin panyakit, manalih Yesus. Yesus mina lengen Aie hunjun genep bitin ewen tuntang mampakeleh ewen.

⁴¹Kare setan mahin balua bara kare oloh, sambil mangkariak, “Ikau toh anak Hatalla!” Tapi Yesus malait ewen tuntang dia manyoho ewen hakotak, basa ewen katawan je Ie te Raja Panyalamat.

⁴²Metoh matanandau nampara lembut, Yesus malihi lewu te palus haguet akan eka je benyem. Kare oloh nampara manggau Ie, dan katika ewen sondau Ie, ewen manggau jalan uka Ie ela malihi ewen.

⁴³Tapi Yesus hamauh, “Barita Bahalap tahiu kilen ampie Hatalla marentah musti imbarita-Ku kea hong kare lewu beken, basa awi te kea Hatalla manyoho Aku akan kalunen.”

⁴⁴Tagal te Yesus bahotbah intu kare huma sombayang hong hapus tanah Yuda.