Read Ngaju LUKAS 5 Bible Online

LUKAS 5 - Ngaju bible

LUKAS 5

¹ Hong sinde katika, Yesus mendeng intu saran danau Genesaret. Are oloh hasengkel mangat mahining barita bara Hatalla.

²Yesus mite due arut hong saran danau te; kare oloh palauk jari mohon bara kare arut te tuntang kanjeran ewen marasih jalae.

³Yesus lumpat akan huang ije bara kare arut te, iete arut ain Simon, palus manyoho Simon manjuju arute te mangejaue isut bara saran. Yesus mondok huang arut te tuntang majar oloh are.

⁴Limbah jari lepah majar, Ie hamauh dengan Simon, “Besei arutm akan eka je handalem, tuntang birik jalam mangat dinon lauk.”

⁵ “Bapa Guru,” koan Simon tombah, “ije ale-alem ikei bagawi manyangit, tapi jaton dinon taloh en-en! Tapi awi Bapa manyoho, ayo ih; aku handak mambirik jala tinai.”

⁶ Limbah ewen malaluse, ewen dinon are toto lauk sampai jalan ewen nampara barabit.

⁷Awi te ewen balaku dohop dengan kare kawal ewen huang arut beken. Kare kawal ewen te dumah palus ewen sama-sama manyuang kadadue arut te kontep dengan lauk sampai kare arut te handak tangkelem.

⁸Metoh Simon mite jete, ie sontop manyembah intu taharep Yesus, palus hamauh, “Lihi aku Tuhan! Awi aku oloh badosa!”

⁹Simon tuntang kare oloh je omba ie hengan mite kare lauk je dinon ewen.

¹⁰Kalote kea kare kawal Simon, iete Yakobus tuntang Yohanes, ewen te anak Sebedeus. Yesus hamauh dengan Simon, “Ela mikeh! Nampara bara toh ikau kareh manjadi panjala olon.”

¹¹Simon tuntang kare kawale manjijit kare arut te akan saran danum limbah te malihi kare taloh handiai te, palus omba Yesus.

¹²Hong sinde andau, Yesus aton huang ije lewu. Hong hete aton ije biti oloh hatue je hapus bitie kontep awi panyakit kulit je bakaike-ikeh.[5] Katika ie mite Yesus, ie sontop manyembah intu taharep Ie sambil balaku, “Pa, amon Bapa handak, Bapa olih mampakeleh aku!”

¹³Yesus manigong oloh te sambil hamauh, “Aku handak, ikau keleh!” Hemben te kea panyakite te nihau.

¹⁴ Palus Yesus mangahana oloh te manyarita hal te akan eweh bewei, koae, “Haguet talih imam, tuntang laku dengae uka mamasti ikau jari keleh. Palus lius mbayar parapahm sama kilau je irentah awi Moses, kilau bukti akan kare oloh je ikau toh toto-toto jari keleh.”

¹⁵Tapi barita tahiu Yesus sasar tayap akan hete-hete, tuntang are oloh dumah uka mahining auh Aie tuntang mangat panyakit ewen impakeleh.

¹⁶Limbah te Yesus haguet balakudoa akan eka je suni.

¹⁷Hong sinde andau metoh Yesus majar, aton pire-pire oloh Parisi tuntang kare guru agama mondok hete. Ewen dumah bara Yerusalem, tuntang bara kare lewu hong Galilea tuntang Yuda. Kuasan Tuhan aton huang Yesus hapan mampakeleh kare oloh haban.

¹⁸Hong katika te pire-pire oloh dumah mimbit ije biti oloh lumpuh je menter huang ekae batiroh. Ewen manggau akal uka mimbit oloh te akan huang huma mangat tau mina ie intu taharep Yesus.

¹⁹Tapi awi oloh lalau are hong hete, ewen dia olih mimbit ie tame. Awi te ewen mimbit ie mandai hunjun sapau huma. Palus ewen mungkar bindang sapau, tuntang mampamohon ie haya-hayak dengan ekae batiroh intu taharep Yesus hong bentok oloh are te.

²⁰Katika Yesus mite kalote ampin kahain kapercayan ewen, Ie hamauh dengan oloh te, “Pahari, dosam jari iampun.”

²¹Kare guru agama tuntang kare oloh Parisi nampara hamauh sama arepe, “Eweh oloh toh je bahanyi mahina Hatalla? Eweh je tau mampun dosa beken bara Hatalla kabuat?”

²²Yesus katawan paisek ewen. Jadi Ie hamauh, “Mbuhen keton hisek kalote huang atei keton?

²³Je kueh labih mangat, manyewut, ‘Dosam jari iampun’, atawa manyewut, ‘Hingkat tuntang mananjong!’?

²⁴Tapi toh Aku handak mambukti akan keton je intu hunjun petak toh Anak Olon aton kuasan Aie uka mampun dosa.” Palus Yesus hamauh dengan oloh je lumpuh te, “Hingkat, gatang ekam batiroh, tuntang buli ih!”

²⁵Bajeleng oloh te hingkat intu taharep ewen samandiai, palus manggatang ekae batiroh, tuntang buli sambil manara Hatalla.

²⁶Ewen samandiai jungun toto palus manara Hatalla. Tuntang marak angate mikeh, ewen hamauh, “Baka hera-heran toto kajadian je inyaksi itah andau toh!”

²⁷Limbah te Yesus balua tuntang mite ije biti panagih pajak bagare Lewi, metoh mondok huang ekae bagawi. Yesus hamauh dengae, “Ayo omba Aku.”

²⁸Lewi mendeng tuntang malihi taloh handiai, palus omba Yesus.

²⁹Limbah te Lewi mawi pesta huang huma akan Yesus. Are panagih pajak tuntang kare oloh awang beken omba kuman haya-hayak dengan ewen.

³⁰ Pire-pire oloh Parisi tuntang kare guru agama mangkeme dia sanang, palus hamauh dengan kare murid Yesus, “Mbuhen keton kuman mihop dengan kare panagih pajak tuntang kare oloh je dia bahalap?”

³¹Yesus tombah, “Oloh je barigas dia perlu dokter; baya oloh je haban ih.

³²Aku dumah dia baya mangat mantehau kare oloh je manyewut arepe bahalap, tapi kare oloh je badosa mangat ewen hobah bara kare dosan ewen.”

³³Kare oloh hamauh dengan Yesus, “Murid Yohanes tuntang murid oloh Parisi kinjap puasa tuntang balakudoa. Tapi kare murid Ayum kuman mihop.”

³⁴Yesus tombah, “En keton tau manyoho kare oloh undangan puasa metoh pesta kawin, katahin panganten hatue magon aton hinje ewen? Pasti dia!

³⁵Tapi kareh akan sampai katikae panganten hatue te induan bara ewen. Hong katika te ewen kareh puasa.”

³⁶Palus Yesus manyarita akan ewen paribasa toh, “Jaton oloh manumpang baju je kupit mahapan tantanan benang bara baju je taheta. Basa jete marabit baju je taheta te. Tuntang tinai benang taheta je ihapan manumpang te dia cocok dengan baju je kupit.

³⁷Kalote kea oloh jaton manyuang anggor je taheta akan huang kambut upak meto je usang, karana anggor taheta te kareh mawi kambut te bapusit. Maka anggor te mananya, tuntang kambut te rusak.

³⁸Anggor je taheta musti inyuang akan huang kambut je taheta kea.

³⁹Kalote kea oloh jaton je handak mihop anggor taheta limbah mihop anggor je usang. ‘anggor je usang te labih mangat,’ koae.”