Read Ngaju LUKAS 6 Bible Online

LUKAS 6 - Ngaju bible

LUKAS 6

¹ Sinde hong andau Sabat, katika Yesus mahalau ije tana gandom, kare murid Ayue mamutik gandom. Ewen mihik gandom te hapan lengee, palus kumae.

²Pire-pire oloh Parisi hamauh, “Mbuhen keton malanggar kare hukum agaman itah awi keton malalus taloh je ingahana hong andau Sabat?”

³ Yesus tombah, “En hindai puji keton mambasa taloh je iawi Dawid, katika ie tuntang kare oloh ayue balau?

⁴ Ie tame akan huang Human Tuhan tuntang manduan rote je jari inyarah akan Hatalla, palus kumae. Limbah te ie manenga kea rote te akan kare oloh ayue. Padahal manumon agaman itah, baya kare imam ih je tau kuman rote te.”

⁵Palus Yesus hamauh, “Anak Olon bara kuasa mahunjun andau Sabat!”

⁶Sinde hong andau Sabat je beken tinai, Yesus haguet majar hong huma sombayang. Hong hete aton oloh je lumpuh lengee silae.

⁷Pire-pire guru agama tuntang oloh Parisi handak manggau kasalan Yesus mangat tau mangado Ie. Jadi ewen tantai manantuani en Ie mampakeleh oloh hong andau Sabat.

⁸Tapi Yesus katawan tirok ewen. Maka Ie hamauh dengan oloh je lumpuh lengee te, “Ayo, mendeng intu baun toh!” Oloh te hingkat palus mendeng hete.

⁹Limbah te Yesus misek dengan kare oloh je aton hete, “Manumon agama, en je tau iawi hong andau Sabat? Mawi taloh bahalap atawa taloh papa? Manyalamat oloh atawa mawi calaka akan oloh?”

¹⁰Yesus manampayah hakaliling intu ewen samandiai, palus hamauh[6] dengan oloh te, “Tajok lengem.” Oloh te mantajok lengee, tuntang lengee te palus keleh.

¹¹Tapi kare guru agama tuntang kare oloh Parisi te balait toto tuntang nampara barunding tahiu taloh je tau ewen mawie malawan Yesus.

¹²Hong katika te Yesus mandai ije bukit mangat balakudoa. Intu hete ije ale-alem Ie balakudoa intu Hatalla.

¹³Katika andau jari balawa, Ie mantehau kare murid Ayue, palus mintih duewalas biti bara ewen. Ie manyewut aran duewalas rasul te. Ewen te:

¹⁴Simon (je inyewut kea Petrus), tuntang Andreas paharin Simon; Yakobus tuntang Yohanes, Pilippus tuntang Bartolomeus,

¹⁵Mateus tuntang Tomas, Yakobus anak Alpeus, tuntang Simon (je inyewut Menteng),

¹⁶Yudas anak Yakobus tuntang Yudas Iskariot je rahian tinai manjadi oloh darhaka.

¹⁷Limbah te Yesus mohon bara bukit te haya-hayak dengan kare rasul te, palus tende tuntang mendeng hong ije eka je hadatah. Intu hete aton are toto kare murid Ayue je beken tuntang are oloh je dumah bara hete-hete hong hapus Yuda, Yerusalem, tuntang bara lewu Tirus tuntang Sidon je hong saran tasik.

¹⁸Ewen dumah mangat mahining Yesus, tuntang mangat impakeleh bara kare panyakit ewen. Ewen je irasuk setan dumah kea tuntang impakeleh.

¹⁹Kakare oloh manggau jalan mangat manggawil Yesus, basa aton kuasa je balua bara Ie je mampakeleh ewen samandiai.

²⁰Yesus manampayah kare murid Ayue palus hamauh, “Salamat keton kare oloh je belom susah, karana keton toh anak ungkup ain Hatalla!

²¹Salamat keton je metoh toh balau; keton kareh imbesoh! Salamat keton je metoh toh manangis; keton kareh tatawe!

²² Salamat keton amon keton inyingi, inolak, ihina tuntang ingarana tagal Anak Olon!

²³ Karana nabi hong jaman horan iawi oloh kalote kea. Amon hal te manjadi te keleh keton hanja-hanjak tuntang manari dengan kasanang, basa hai upah je inatap akan keton hong sorga.

²⁴Tapi calaka keton je metoh toh tatau; basa keton jari mangkeme kamangat!

²⁵Calaka keton je metoh toh besoh; basa keton kareh balau! Calaka keton je metoh toh tatawe; basa keton kareh kapehe atei tuntang manangis!

²⁶Calaka keton, amon keton inara awi oloh handiai; basa kalote kea tato hiang keton manara kare nabi pananjaro jaman horan.”

²⁷“Tapi akan keton je metoh toh mahining auh-Ku, Aku manenga peteh toh: sinta kare musohm, tuntang lalus gawi bahalap akan oloh je manyingi keton.

²⁸Berkat oloh je manyapa keton, tuntang balakudoa akan oloh je papa ateie dengan keton.

²⁹Amon oloh manampar pipim ije, nauhe ie manampar pipim silae tinai. Amon jubahm irampas oloh, tenga kea bajum.

³⁰Amon oloh balaku taloh en-en dengam, tenga jete akae; tuntang amon ramom irampas oloh, ela balaku jete ilian haluli.

³¹ Lalus gawim akan oloh sama kilau je ingahandak keton oloh malaluse akan keton.

³²Amon keton masi kare oloh je masi keton bewei, en rimae? Oloh badosa mahin masi dengan kare oloh je masi ewen!

³³Tuntang amon keton malalus gawi bahalap akan oloh je bahalap dengan keton bewei, en aton berkate akan keton? Oloh badosa mahin mawie kalote!

³⁴Tuntang amon keton manjahaman duit baya akan kare oloh je olih mambayare haluli, en aton berkate akan keton? Oloh badosa mahin tau manjahaman duit akan oloh badosa, palus managihe haluli!

³⁵Sabujure dia kalote! Keton musti mambaleh hapan asi dengan musoh keton tuntang malalus gawi bahalap akan ewen. Keton musti manjahaman, tuntang ela maharap uka mandinoe haluli. Amon kalote, maka upah keton kareh hai tuntang keton kareh manjadi anak Hatalla je hong ngambo. Basa Hatalla bahalap ateie dengan kare oloh je dia tau manarimakasih, tuntang dengan oloh je papa kea.

³⁶Keleh keton pamasi sama kilau Bapa keton kea pamasi!”

³⁷“Ela mahakim oloh beken mangat keton kabuat kea dia ihakim awi Hatalla. Ela mahukum oloh beken, mangat keton kabuat kea dia ihukum Hatalla. Keleh mampun oloh beken, mangat Hatalla kea mampun keton.

³⁸Tenga akan oloh beken mangat Hatalla kea manenga akan keton; keton kareh manarima panenga je are toto je jari inakar kontep akan keton. Basa takar je ihapan keton akan oloh beken, akan ihapan Hatalla kea akan keton.”

³⁹ Limbah te Yesus manyarita akan ewen paribasa kalotoh, “Amon oloh babute mamimpin oloh babute je beken, pasti kadaduee te manjato akan parit.

⁴⁰ Jaton murid je labih hai bara gurue. Tapi murid je jari mahapus sakolae, kareh manjadi sama kilau gurue.

⁴¹Mbuhen keton mite ije kahijir kayu korik hong matan paharim, padahal balok je huang matan keton kabuat dia keton mitee?

⁴²Kilen ampie keton tau hamauh dengan paharin keton, ‘O pahari, hetoh aku mampalua hijir kayu korik bara matam te,’ padahal huang matan keton kabuat aton balok je dia keton mitee? O oloh haliau! Palua helo balok je aton hong matam kabuat. Limbah te harue keton tau mite tarang tuntang tau mampalua ije kahijir kayu korik bara matan paharim.”

⁴³“Batang je bajewong dia mampalembut bua je papa. Kalote kea batang je dia bajewong dia mampalembut bua je bahalap.

⁴⁴ Gagenep batang tau ingasene bara buae. Rowut haduhi dia tau mampalembut bua ara, tuntang bajakah haduhi dia tau mampalua bua anggor.

⁴⁵ Oloh je bahalap mampalua kare taloh je bahalap, awi ateie hakutoh dengan kahalap. Oloh je papa mampalua kare taloh papa, awi ateie kontep kapapa. Basa taloh je inyewut awi nyame, jete je mamurai bara atei.”

⁴⁶“Mbuhen keton mantehau Aku, ‘Tuhan, Tuhan,’ tapi dia malalus taloh je insanang-Ku akan keton?

⁴⁷Dengan eweh itah tau mananding oloh je dumah manalih Aku, tuntang mahining auh-Ku, hayak malaluse? — Toh keleh Aku mansanae akan keton — .

⁴⁸Jete sama kilau oloh je metohe mamangun huma mangalie timbe-timben, palus manampa lapike hapan batu. Hong katika aton danum soho tuntang danum sungei malambun huma te, huma te dia olih inggulak, awi jari imangun hunjun lapik je bahalap.

⁴⁹Tapi oloh je mahining auh-Ku tapi dia malaluse, ie sama kilau oloh je mamangun huma jaton mahapan lapik. Amon danum soho malambun, huma te bajeleng baduroh; tuntang karusake te paham toto!”