Read Ngaju LUKAS 7 Bible Online

LUKAS 7 - Ngaju bible

LUKAS 7

¹Limbah lepah mansanan kare taloh te akan oloh are, Yesus haguet akan Kapernaum.

²Hong hete aton perwira Roma je tempon jipen je paham inyayange. Jipen te haban tuntang handak matei.

³Katika perwira te mahining tahiu Yesus, ie manyoho pire-pire pamimpin oloh Yehudi haguet manalih Ie uka balaku mangat tau dumah tuntang mampakeleh jipee.

⁴Katika sampai Yesus, kare oloh te balaku nyame-nyame uka mandohop perwira te. “Perwira toh patut indohop awi Bapa,” koan ewen dengan Yesus,

⁵“awi ie masi bangsa itah tuntang ie jari mamangun huma sombayang akan ikei.”

⁶Maka Yesus haguet haya-hayak dengan ewen. Katika Yesus handak sampai huma te, perwira te manyoho kare kawale manalih Ie mangat mansanan, “Dia usah Bapa heka-heka akan humangku. Aku dia patut manarima Bapa huang humangku.

⁷Jete bukue aku kabuat dia bahanyi manaharep Bapa. Jadi tenga ih parentah mangat jipengku te keleh.

⁸Awi aku mahin mamenda parentah oloh je hunjun aku tuntang penda aku aton kea kare prajurit je musti mamenda parentahku. Amon aku manyoho ije biti prajurit, ‘Haguet!’ maka ie haguet; tuntang amon aku mansanan akan je beken, ‘Kahetoh!’ ie dumah manalih. Tuntang amon aku marentah jipengku, ‘Nguan jetoh!’ maka ie malaluse.”

⁹Yesus hengan mahining auh te. Ie tampaliau tuntang hamauh dengan oloh are je omba manuntut Ie, “Tamam toto oloh toh. Bara marak oloh Israel mahin hindai puji Aku sondau kapercaya je kahain toh!”

¹⁰Katika kare oloh je inyoho te haluli akan human perwira te, jipen te jari keleh.

¹¹Dia tahi tinai,[7] Yesus haguet akan lewu Nain. Kare murid Ayue tuntang oloh are haguet hayak Ie.

¹²Metoh Yesus sampai eka je tokep bauntonggang lewu, are oloh magah hantu balua lewu. Oloh je matei te anak hatue, anak tunggal ain ije biti balo. Are oloh lewu je mampahayak bawi balo te.

¹³Katika Tuhan mite oloh bawi te, ie masi dengae palus hamauh, “Ela manangis, bu!”

¹⁴Limbah te Yesus manokep eka muloh hantu te tuntang manigonge. Maka oloh je muloh hantu te tende, Yesus hamauh, “O oloh tabela, Aku manyoho ikau misik!”

¹⁵Oloh tabela je matei te misik, mondok tuntang manampara hakotak. Maka Yesus manyarah ie akan indue.

¹⁶Kakare oloh mikeh tuntang manampara manara Hatalla. Ewen hamauh, “Ije biti nabi hai jari lembut hong bentok itah! Hatalla jari dumah uka manyalamat ungkup Ayue!”

¹⁷Barita tahiu Yesus toh tayap akan hapus Yuda tuntang kare eka hakalilinge.

¹⁸Kare murid Yohanes mansanan akan Yohanes kare taloh je manjadi te. Maka Yohanes mantehau due biti murid Ayue,

¹⁹palus manyoho ewen haguet manalih Tuhan Yesus tuntang misek, “En Bapa toh oloh je akan dumah manumon janjin Hatalla, atawa ikei musti mentai oloh je beken?”

²⁰Kadadue murid Yohanes te haguet manalih Yesus tuntang misek, “Yohanes Pampandoi manyoho ikei misek dengan Bapa, en Bapa toh ie oloh je akan dumah manumon janjin Hatalla, atawa ikei musti mentai oloh beken?”

²¹Metoh te, Yesus are mampakeleh oloh, tuntang maharak are roh papa hayak mawi are oloh babute tau mite.

²² Jadi Yesus tombah, “Buli haluli keton manalih Yohanes tuntang sanan taloh je ihining tuntang je gitan keton: oloh babute tau mite, oloh je lumpuh mananjong, oloh je buah panyakit kulit je baka ike-ikeh keleh,[8] oloh badengen mahining, oloh matei belom haluli tuntang Barita Bahalap bara Hatalla imbarita akan kare oloh je belom susah.

²³Salamat oloh je jaton mawi alasan hapae manolak Aku.”

²⁴Limbah kare utusan Yohanes te haguet, Yesus manampara hakotak dengan oloh are tahiu Yohanes, koae, “Keton haguet akan padang pasir handak mite en? Ije kalambar oru je inarawang riwut kah?

²⁵Keton haguet mangat mite en? Ije biti oloh je hapakaian bahalap? Kare oloh je hapakaian kalote tuntang je belom sanang mangat, melai huang istana!

²⁶Jadi keton dumah mangat mite en? Mangat mite ije biti nabi kah? Toto, labih haream bara ije biti nabi.

²⁷ Awi Yohanes te, jete je inyewut huang ayat Surat Barasih toh, ‘Jetoh ie sarohang-Ku,’ koan Hatalla, ‘Aku handak manyoho ie helo bara Ikau, mangat ie muap jalan Akam!’ ”

²⁸“Ingat,” koan Yesus tinai, “hong kalunen toh jaton puji aton oloh je labih hai bara Yohanes Pampandoi. Tapi oloh je pangkakorike bara anak ungkup ain Hatalla, labih hai bara Yohanes Pampandoi.”

²⁹ Kakare oloh — kalote kea panagih pajak — mahining Yesus mansanan hal te; ewen te iete kare oloh je jari mamenda kare auh tuntutan Hatalla tuntang maku impandoi awi Yohanes.

³⁰Tapi kare oloh Parisi tuntang kare guru agama dia maku manarima rencana Hatalla akan arep ewen kabuat. Ewen dia maku impandoi awi Yohanes.

³¹Palus Yesus hakotak tinai, koae, “Hapan en Aku musti mananding kare oloh jaman jetoh? Sama kilau en ewen te?

³²Ewen sama kilau kare anak oloh je mondok hong pasar; ije kalompok te hamauh dengan je beken, ‘Ikei malagu nyanyi karami akan keton, tapi keton dia maku manari manasai! Ikei manatum, tapi keton dia maku manangis!’

³³Yohanes Pampandoi dumah — ie puasa tuntang jaton mihop anggor — tuntang keton hamauh, ‘Ie irasuk setan!’

³⁴Anak Olon dumah — ie kuman mihop — palus keton hamauh, ‘Ite oloh te! Babungo, pambusau, kawal panagih pajak tuntang kawal kare oloh badosa.’

³⁵Aloh kalote, kapintar-kaharatin Hatalla gitan bara kare oloh je manarima Ie.”

³⁶Ije biti oloh Parisi, bagare Simon, marawei Yesus kuman. Yesus haguet akan humae tuntang mondok kuman.

³⁷ Hong lewu te aton kea ije biti oloh bawi je belom huang dosa. Katika ie mahining Yesus metohe kuman intu human oloh Parisi te, ie dumah hayak mimbit ije kasa pualam basuang minyak harum.

³⁸Ie mendeng intu hila likut Yesus tokep paie tuntang manangis sambil mambisa pain Yesus hapan danum matae. Limbah te pain Yesus impuase hapan balaue tuntang inyiume tuntang inatae hapan minyak harum.

³⁹Katika oloh Parisi je marawei Yesus mite hal te, ie hamauh huang ateie, “Jaka oloh toh nabi, batantu ie katawan eweh oloh bawi te je manigong Ie, tuntang je oloh bawi te belom huang dosa!”

⁴⁰Palus Yesus hamauh dengan Simon, “Simon, aton taloh je handak insanang-Ku akam.” “Yoh, Pa Guru,” koan Simon tombah, “sanan ih.”

⁴¹Yesus hamauh, “Aton due biti oloh je butang dengan oloh je manjahaman duit. Ije biti butang lime ratus duit perak, tuntang ije biti tinai lime puluh duit perak.

⁴²Kadadue oloh te dia olih mamunah utange te, balalu ie mempas ewen bara utang te. Nah, eweh bara kadadue oloh te je labih masi dengan oloh je manjahaman duit te?”

⁴³“Angatku, oloh je paling are utange!” koan Simon tombah. “Tirokm te buah,” koan Yesus tinai.

⁴⁴Palus Yesus manampayah oloh bawi te tuntang hamauh dengan Simon, “Ikau mite oloh bawi toh? Aku dumah akan humam, tuntang ikau jaton manatap danum hapan menyau paing-Ku tapi oloh bawi toh jari menyau paing-Ku hapan danum matae, tuntang mampuase hapan balaue.

⁴⁵Ikau jaton manambang Aku hapan sium, tapi oloh bawi toh jaton tende manyium paing-Ku bara metoh Aku dumah akan hetoh.

⁴⁶Ikau jaton manata minyak akan takolok-Ku, tapi oloh bawi te manata minyak harum intu paing-Ku.

⁴⁷Toto: asie je hai te mamparahan dosae je are te jari iampun! Amon oloh iampun isut, ie kareh masi isut kea.”

⁴⁸Palus Yesus hamauh dengan oloh bawi te, “Kare dosam jari iampun.”

⁴⁹Kare oloh beken je mondok kuman hayak dengan Yesus nampara hakotak sama arepe, “Eweh oloh toh sampai olih mampun dosa?”

⁵⁰Tapi Yesus hamauh dengan oloh bawi te, “Awi ikau percaya dengang-Ku, ikau inyalamat. Buli ih dengan kasanang!”