Read Ngaju LUKAS 8 Bible Online

LUKAS 8 - Ngaju bible

LUKAS 8

¹Dia tahi limbah te, Yesus haguet akan kare lewu tuntang kampong, uka mansanan Barita Bahalap je Hatalla nampara marentah kilau Raja. Duewalas biti murid Ayue omba hayak Ie.

² Kalote kea pire-pire oloh bawi je jari impakeleh bara roh papa tuntang bara panyakit. Kare ewen te iete Maria je inyewut Magdalena (uju setan je jari impalua bara ie);

³tuntang Yohana, sawan Kusa, pagawai istana Herodes; Susana, tuntang are tinai oloh bawi beken. Hapan balanja kabuat ewen mandohop Yesus tuntang kare murid Ayue.

⁴Kare oloh dumah bewe-bewei manalih Yesus bara kare-kare lewu. Tuntang metoh jari are oloh hapumpong, Yesus manyarita akan ewen paribasa kalotoh:

⁵“Ije biti oloh pamalan haguet manawor binyi. Metoh ie manawor, aton binyi je manjato hong jalan. Belahe ihunje oloh tuntang awang beken tinai kinan burong.

⁶Aton kea je manjato hong eka je are batu. Metoh kare duringe lembut, taloh imbul te balayu awi petake keang.

⁷Aton kea binyi je manjato intu bentok rowut haduhi. Rowut haduhi te belom hinje binyi te, tuntang mangalamboe sampai dia tau mamua.

⁸Tapi aton tinai binyi je manjato intu petak je basiwoh, palus belom tuntang mampalembut bua saratus kali lipet.” Limbah manyarita paribasa te, Yesus hamauh, “Amon aton pinding, keleh mahining!”

⁹Kare murid Yesus misek Dengae riman paribasa te.

¹⁰ Yesus tombah, “Keton jari inenga asi uka mangatawan taloh basilim tahiu kilen ampie Hatalla marentah kilau Raja. Tapi kare oloh beken iajar hapan paribasa, mangat ewen manantuanie, tapi jaton katawan taloh je manjadi; tuntang ewen mahining, tapi dia haratie.”

¹¹“Jetoh ie riman paribasa te: Binyi te iete auh Hatalla.

¹²Binyi je manjato hong jalan jete tanding kare oloh je mahining auh te. Tapi setan dumah tuntang marampas barita te bara atei ewen, mangat ewen dia percaya tuntang dia inyalamat.

¹³Binyi je manjato intu eka je habatu, tanding oloh je metoh mahining barita te, manarimae dengan sanang ateie. Tapi kabar te dia muhat huang ateie. Ewen percaya hanjulo ih, tuntang metoh tingkes dumah, ewen mundur.

¹⁴Binyi je manjato intu bentok rowut haduhi tanding oloh je mahining barita te, tapi kakenang tahiu pambelom ewen hayak mipen belom tatau tuntang sanang hong kalunen toh. Uras taloh te mangalambo ewen sampai dia mampalembut bua je masak.

¹⁵Binyi je manjato hong petak je basiwoh tanding oloh je mahining barita te, palus mingkese huang ateie je bahalap tuntang bujur. Ewen baketep sampai mampalembut bua.”

¹⁶ “Dia aton oloh je manotong sumbo palus manyangkulepe hapan balanai, atawa mingkese hong penda eka batiroh. Ie akan mina sumbo te intu tantahae, mangat oloh je tame tau mite kalawae.

¹⁷ Dia aton taloh je basahokan je dia tau gitan; tuntang dia aton taloh basilim je kareh jaton iungkar tuntang ingatawan.

¹⁸ Awi te nantuani bua-buah taloh je ihining keton. Basa oloh je jari mandino, kareh inenga labih are tinai; tapi oloh je jaton mandino, isut je aton huang ie mahin kareh induan kea.”

¹⁹Indu tuntang paharin Yesus dumah manalih Ie, tapi ewen dia tau sampai Ie awi oloh lalau are.

²⁰Maka aton ije biti oloh hamauh dengan Yesus, “Pa, indu tuntang paharin Bapa aton intu luar. Ewen handak hasondau dengan Bapa.”

²¹Tapi Yesus hamauh dengan ewen, “Kare oloh je mahining auh Hatalla tuntang malaluse, ewen te indu-Ku tuntang paharing-Ku.”

²²Hong sinde andau Yesus dengan kare murid Ayue lumpat arut. “Has itah haguet akan dipah danau,” koan Yesus dengan ewen. Balalu ewen haguet.

²³Katika ewen metoh balayar, Yesus tapatiroh. Te salenga riwut hai manampur danau te. Danum nampara tame akan huang arut, sampai mambahaya ewen te samandiai.

²⁴Kare murid Yesus manalih Ie tuntang mampisik Ie. Ewen hamauh, “Pa Guru, Pa Guru, itah calaka!” Yesus misik palus mangarahang riwut tuntang riak je basiak te. Maka riwut tuntang riak te tende palus danau manjadi tadoh toto.

²⁵Palus Yesus hamauh dengan kare murid Ayue, “Mbuhen keton dia percaya dengang-Ku?” Ewen heran tuntang mikeh. Palus ewen hakotak sama arepe, “Eweh sapunae oloh toh sampai riwut tuntang riak irentah Awie, tuntang auh Ayue mahin inumon!”

²⁶Yesus tuntang kare murid Ayue tarus balayar sampai akan daerah Gerasa[9] hong dipah silan Danau Galilea.

²⁷Katika Yesus jari lumpat akan hunjun petak, Ie inalih awi ije biti oloh hatue je irasuk setan. Oloh te bara lewu. Ie te jari tahi jaton mahapan pakaian tuntang dia maku melai huma. Ie baya maku melai goha eka kare kubur oloh.

²⁸Katika ie mite Yesus, ie manambawai palus sontop manyembah manaharep Yesus tuntang mangkariak, “Yesus, Anak Hatalla Je Hong Ngambo! Handak Awim kilen ampie aku toh? Aku balaku nyame-nyame ela mangapehe aku!”

²⁹Oloh te hamauh kalote basa Yesus manyoho setan te balua bara ie. Jari kinjap ie inguasa awi setan te, sampai aloh lengee tuntang paie jari imasong hapan rantai tuntang ie injaga toto-toto, mahin olih kea ie manggeto rantai te palus iimbit awi setan akan padang pasir.

³⁰Yesus misek dengan oloh te, “Eweh aram?” “Arangku ‘Legion’,” koan oloh te tombah — basa are roh papa je jari tame huang ie.

³¹Kare roh papa te balaku nyame-nyame mangat Yesus dia maharak ewen akan Tiwing Pampatei.[10]

³²Tokep eka te aton are toto bawoi metohe manggau panginae intu biling bukit. Kare roh papa te balaku nyame-nyame dengan Yesus uka ewen tau tame akan huang kare bawoi te. Tuntang Yesus satuju.

³³Maka kare roh papa te balua bara oloh te tuntang tame akan huang kare bawoi te. Palus kare bawoi te hadari tuntang manangkero bara saran biling akan huang danau, limbah te leteng.

³⁴Kare panjaga bawoi te mite taloh je jari manjadi te. Maka ewen hadari tuntang mansanan barita te akan oloh lewu tuntang hong kare kampong hakaliling.

³⁵Palus kare oloh balua mite kare taloh je manjadi. Ewen dumah manalih Yesus, tuntang intu hete ewen te sondau oloh je jari lapas bara kare roh papa te metohe mondok tokep pain Yesus. Ie jari hapakaian tuntang tiroke jari barendeng. Ewen palus mikeh.

³⁶Ewen je mite kajadian te manyarita akan kare oloh kilen ampie oloh te impakeleh.

³⁷Balalu oloh hapus daerah Gerasa balaku nyame-nyame uka Yesus malihi eka te, basa ewen uras mikeh toto. Jadi Yesus lumpat arut handak buli.

³⁸Oloh je jari lapas bara setan te balaku dengan Yesus uka ie tau omba. Tapi Yesus manyoho ie haguet,

³⁹koae, “Buli ih tuntang mbarita ih taloh je jari ilalus Hatalla akam.” Maka oloh te haguet mansanan akan oloh hapus lewu, taloh je jari iawi Yesus dengae.

⁴⁰Katika Yesus haluli akan dipah silan danau, Ie inambang dengan kahanjak awi oloh are basa ewen jari enta-entai Dengae.

⁴¹Palus dumah ije biti kapala huma sombayang hong eka te. arae Yairus. Ie sontop manyembah intu taharep Yesus tuntang balaku nyame-nyame uka Yesus dumah akan humae,

⁴²awi anake je bawi je baya ije-ije te umure duewalas nyelo handak matei. Pandehan Yesus mananjong akan human Yairus, kare oloh manyeke Ie bara hakaliling.

⁴³Bara kare oloh te aton tinai ije biti oloh bawi je jari duewalas nyelo buah panyakit baduroh dahae hayak dengan panyakit dumah bulae. Ie jari mampalepah kare ramoe hapae batatamba dengan dokter,[11] tapi jaton je tau mampakelehe.

⁴⁴Oloh bawi te manokep Yesus bara hila likute, palus manigong tapakan jubahe. Hemben te kea kaduroh dahan oloh bawi te tende.

⁴⁵Yesus misek, “Eweh je manigong Aku?” Kakare oloh milim arepe. Palus Petrus hamauh, “Pa, are toto oloh mangaliling Bapa; ewen manyengkel Bapa!”

⁴⁶Yesus hamauh, “Tapi aton oloh je manigong Aku. Aku katawan jete awi aton kuasa je balua bara Aku.”

⁴⁷Oloh bawi te ingarendeng je gawie te jari ingatawan. Jadi ie dumah hayak hagenjeh palus sontop tuntang manyembah intu taharep Yesus. Maka ie manyarita intu taharep oloh samandiai sababe ie manigong Yesus, tuntang panyakite te keleh hemben te kea.

⁴⁸Yesus hamauh dengae, “Anak-Ku, awi ikau percaya dengang-Ku, maka ikau keleh. Lius dengan salamat.”

⁴⁹Pandehan Yesus magon hakotak, ije biti oloh dumah bara human Yairus. Ie hamauh dengan Yairus, “Anak bawi ain Tuan jari mahutos. Dia usah ih Tuan manyusah Bapa Guru hindai.”

⁵⁰Katika Yesus mahining te, ie hamauh dengan Yairus, “Ela mikeh. Percaya bewei tuntang anakm akan keleh.”

⁵¹Limbah sampai hong human Yairus, Yesus mangahana kare oloh tame hayak Ie beken bara Petrus, Yohanes, Yakobus tuntang indu bapa anak te bewei.

⁵²Kakare oloh metohe manangis tuntang manatum tagal pampatei anak te. Tapi Yesus hamauh, “Ela manangis. Anak toh dia matei, ie baya batiroh ih!”

⁵³Ewen manatawe Yesus, basa ewen katawan anak bawi te jari matei.

⁵⁴Limbah te Yesus mimbing lengen anak te tuntang hamauh, “Misik ih, nak!”

⁵⁵Hambaruan anak te haluli manalih anak te, tuntang hemben te kea ie hingkat. Limbah te Yesus manyoho ewen manenga panginan akan anak te.

⁵⁶Oloh bakas anak te hengan toto. Tapi Yesus mangahana ewen mansanan taloh je manjadi te akan eweh bewei.