Read Ngaju LUKAS 9 Bible Online

LUKAS 9 - Ngaju bible

LUKAS 9

¹Yesus mantehau duewalas murid Ayue, palus manenga kuasa akan ewen hapa maharak setan tuntang mampakeleh panyakit.

²Limbah te Ie manyoho ewen haguet mampakeleh oloh haban tuntang mambarita kabar tahiu kilen ampie Hatalla marentah kilau Raja.

³ “Ela mimbit taloh en-en akan panjalanam,” koan Yesus dengan ewen. “Ela mimbit sukah atawa kambut sadakah, atawa panginan, atawa duit, atawa due kalambar pakaian.

⁴Hong kueh bewei keton inarima oloh, melai ih intu hete sampai keton malihi lewu te.

⁵ Tuntang hong kueh keton dia inarima oloh, maka katika keton malihi lewu te, kibas kawo bara tatap paim, kilau pangingat intu taharep ewen.”

⁶Kare murid Yesus haguet, palus manintu kare lewu uka mansanan Barita Bahalap te tuntang mampakeleh oloh haban hong hete-hete.

⁷ Metoh Herodes je katika te marentah hong Galilea, mahining tahiu kare kajadian te, ie bingung. Basa aton oloh je hamauh, Yohanes Pampandoi jari belom haluli.

⁸Aton kea je hamauh, Elia jari lembut tinai. Oloh beken tinai hamauh, ije bara kare nabi horan jari belom haluli.

⁹Herodes hamauh, “Aku jari manyoho oloh manetek takolok Yohanes. Tapi oloh toh, eweh Ie sapunae? Are taloh je jari ihiningku tahiu Ie.” Maka Herodes manggau jalan uka tau mite Yesus.

¹⁰Kare rasul ain Yesus haluli tuntang manyarita akan Yesus kakare taloh je jari iawi ewen. Yesus mimbit ewen, palus haguet haya-hayak dengan ewen kabuat ih akan lewu Betsaida.

¹¹Katika kare oloh mangatawan hal te, ewen manuntut Yesus. Ie manarima ewen, palus hakotak dengan ewen tahiu kilen ampie Hatalla marentah kilau Raja. Tuntang Ie kea mampakeleh kare oloh je perlu inatamba.

¹²Katika matanandau nampara belep, duewalas murid Yesus dumah manalih Ie tuntang hamauh, “Pa, eka toh kejau bara lewu. Labih bahalap Bapa manyoho kare oloh toh haguet, mangat ewen tau manggau panginan tuntang eka manyandehan hong kare lewu tuntang kampong je hakaliling hetoh.”

¹³Tapi Yesus tombah, “Keton ih mampakanan ewen.” Kare murid Yesus hamauh, “Ain ikei baya aton lime rote tuntang due kongan lauk. En ikei musti haguet mamili panginan akan kakare oloh toh?”

¹⁴(Aton kurang labih lime koyan oloh hatue intu hete.) Yesus hamauh dengan kare murid Ayue, “Soho kare oloh toh mondok bakalompok, kurang labih lime puluh biti ije kalompok.”

¹⁵Kare murid Yesus te malalus kare taloh je insanan Yesus akan ewen.

¹⁶Palus Yesus manduan lime rote tuntang due kongan lauk te, limbah te Ie tengak mananggera akan langit tuntang manarimakasih intu Hatalla. Limbah te Ie mangiwak-mangiwak rote tuntang lauk te hapan lengen Aie palus manenga akan kare murid Ayue mangat ewen mambagie akan oloh are te.

¹⁷Ewen uras kuman sampai besoh. Palus kare murid Yesus manampunan kalabien panginan te duewalas lontong karee.

¹⁸Hong sinde andau, katika Yesus metoh balakudoa kabuat, kare murid Ayue dumah manalih Ie. Yesus misek dengan ewen, “Manumon koan oloh, Aku toh eweh?”

¹⁹ Ewen tombah, “Aton je manyewut Yohanes Pampandoi. Aton kea je manyewut Elia, awang beken tinai manyewut ije bara kare nabi jaman horan je jari belom haluli.”

²⁰ “Tapi manumon koan keton kabuat, Aku toh eweh?” koan Yesus misek. Petrus tombah, “Bapa toh Raja Panyalamat je injanji Hatalla.”

²¹Palus Yesus hamauh dengan kare murid Ayue, “Ela samasinde mansanan hal te akan eweh bewei.”

²²Yesus kea hamauh, “Anak Olon puna musti manyarenan are kapehe tuntang ilawan awi kare pamimpin tuntang kare imam kapala, tuntang kare guru agama. Ie akan impatei, tapi hong andau je kateloe akan misik tinai.”

²³ Limbah te Yesus hamauh dengan kare oloh je aton hong hete, “Oloh je handak omba Aku, musti mangalapean kare kepentingan ayue kabuat, mananggong sampalakie genep andau, tuntang harajur omba Aku.

²⁴ Basa oloh je handak mahaga pambelome, akan nihau pambelome. Tapi oloh je manyarah pambelome akan kepentingan ayung-Ku, akan manyalamat pambelome.

²⁵En kaontonge akan oloh amon ie tempon hapus kalunen toh tapi ie binasa tuntang nihau pambelome?

²⁶Amon oloh mahamen mangaku Aku tuntang auh ajar-Ku, Anak Olon kea mahamen mangaku oloh te hong katika ie dumah kareh dengan kuasan Aie, tuntang dengan kuasan Bapa hayak dengan kuasan kare malekat je barasih!

²⁷Keleh keton katawan: bara kare keton hetoh aton ije dia akan matei helo bara ie mite Hatalla marentah.”

²⁸ Kurang labih ije minggo limbah Yesus majar kare hal te, Ie mimbit Petrus, Yohanes, tuntang Yakobus akan hunjun ije bukit mangat balakudoa.

²⁹Pandehan Yesus balakudoa intu hete, tampayah baun Aie hobah tuntang pakaian Aie manjadi baputi malinyau.

³⁰Te salenga due biti oloh iete Moses tuntang Elia mamparahan arepe mahapan kalawa bara sorga. Ewen hakotak dengan Yesus tahiu pampatei Aie tuntang dia tahi hindai akan ingkeme Awie hong Yerusalem.

³¹

³²Hong katika te Petrus tuntang kare kawale tapatiroh, tapi misik nantekas, tuntang mite Yesus hasangkowong tuntang due biti oloh te mendeng Dengae.

³³Metoh due biti oloh te handak malihi Yesus, Petrus hamauh dengan Yesus, “Tuan, mangat toto itah hong hetoh. Keleh itah mampendeng telo kemah: ije akan Tuan, ije akan Moses, tuntang ije tinai akan Elia.” (Petrus hamauh kalote marak dia ie haratie en taloh je ingotake.)

³⁴Pandehan Petrus magon hakotak, maka dumah ije baunandau, tuntang mangalukop ewen, sampai ewen mikeh.

³⁵ Limbah te bara baunandau te tarahining auh je hamauh, “Jetoh Ie Anak-Ku je iintih-Ku. Keleh mahining Auhe!”

³⁶Limbah auh te tende, ewen mite Yesus kabuate hong hete. Kare murid Yesus suni bewei tahiu kakare taloh te, tuntang jaton mansanan akan eweh bewei tahiu taloh je jari gitan ewen.

³⁷Andau jewue tinai Yesus tuntang telo murid Ayue mohon bara bukit te, tuntang oloh are dumah manalih Yesus.

³⁸Ije biti oloh hatue bara marak oloh are te mangkariak, “Pa Guru, dohop ih mite anakku — anakku te tikas ije te ih!

³⁹Amon roh papa mamok ie, ie mangkariak nantekas tuntang bitie kujur-kejer sampai nyamae habure. Roh te harajur mangapehe ie tuntang dia maku balua bara ie!

⁴⁰Jari aku balaku kare murid Bapa maharak roh te, tapi dia olih ewen.”

⁴¹Yesus tombah, “Lalehan keton toh! Keton toh toto oloh je nyaleweng tuntang dia percaya! Sampai hamparea Aku musti melai hinje keton tuntang sabar dengan keton? Imbit anak te akan hetoh!”

⁴²Pandehan anak te mananjong manalih Yesus, roh papa te marapitan ie tuntang mawi bitie kujur-kejer. Tapi Yesus marentah roh te tuntang mampakeleh anak te. Palus anak te inyarah tinai akan bapae.

⁴³Kakare oloh hengan mite kuasan Hatalla je kalote kahaie. Metoh kare oloh magon heran mite kakare taloh je ilalus Awie, Yesus hamauh dengan kare murid Ayue,

⁴⁴“Nantuani bua-buah tuntang ela kalapean auh-Ku toh: Anak Olon kareh inyarah akan kuasan olon.”

⁴⁵Tapi kare murid Yesus te dia harati auh Aie te. Hal te dia insanan akan ewen mangat ewen dia haratie. Tapi ewen mikeh misek hal te dengan Yesus.

⁴⁶ Hong marak kare murid Yesus lembut soal tahiu eweh bara ewen je pangkahaie.

⁴⁷Yesus katawan tirok ewen, awi te Ie manduan ije biti anak korik tuntang manyoho anak te mendeng hila balikate.

⁴⁸ Palus Ie hamauh dengan kare murid Ayue, “Oloh je manarima anak toh tagal Aku, rimae manarima Aku kea. Tuntang oloh je manarima Aku, manarima Ie je manyoho Aku. Basa oloh je pangkakorike bara marak keton, ie te je pangkahaie!”

⁴⁹Yohanes hamauh, “Tuan, ikei mite oloh maharak setan mahapan aran Tuan, tuntang ikei mangahana ie, basa ie dia bara pihak itah.”

⁵⁰“Ela mangahana ie,” koan Yesus dengan Yohanes tuntang kare murid Yesus awang beken, “basa je dia malawan keton, rimae ie mamihak keton.”

⁵¹Metoh katikae jari tokep Yesus inggatang akan sorga, Ie manukas arepe mangat haguet akan Yerusalem.

⁵²Maka Ie manyoho oloh haguet mananselo Ie. Kare oloh je inyoho Awie te haguet, palus tame akan ije lewu hong Samaria uka manatap kare taloh handiai akan Yesus.

⁵³Tapi kare oloh hong lewu te dia maku manarima Yesus, basa gitan toto Ie metohe haguet manalih Yerusalem.

⁵⁴ Maka katika murid Yesus, iete Yakobus tuntang Yohanes, katawan tahiu hal te, ewen hamauh, “Tuhan, en Tuhan maku, ikei balaku apui bara langit mangat mambinasa kare oloh toh?”[12]

⁵⁵Yesus mules, palus malait ewen.[13]

⁵⁶Limbah te ewen haguet akan lewu je beken.

⁵⁷Pandehan Yesus tuntang kare murid Ayue marajur panjalanan, aton oloh hamauh dengan Yesus, “Pa, aku handak omba Bapa akan kueh bewei!”

⁵⁸Yesus tombah, “Sarigala aton liange, tuntang burong aton sarangae, tapi Anak Olon jaton aton ekae menter.”

⁵⁹Palus Yesus hamauh dengan oloh je beken, “Has, omba Aku.” Tapi oloh te hamauh, “Pa, soho Aku buli helo mangat mangubur bapaku.”

⁶⁰Yesus tombah, “Nauhe oloh matei mangubur oloh matei ayue kabuat. Tapi ikau, lius, tuntang sanan barita je Hatalla jari nampara marentah.”

⁶¹ Aton kea oloh beken je hamauh, “Pa, aku handak omba Bapa, tapi soho aku buli helo mansanan arepku.”

⁶²Yesus hamauh dengan oloh te, “Oloh je jari nampara mambajak petak palus mules akan hila likut, dia patut manjadi anak ungkup ain Hatalla.”