Read Ngaju DEUTERONOMIUM 1 Bible Online

DEUTERONOMIUM 1 - Ngaju bible

DEUTERONOMIUM 1

¹Buku toh basuang kare auh je inyampai Moses akan bangsa Israel metoh ewen aton intu padang pasir hong Janah Yordan. Eka te aton intu hila timor Sungei Yordan, tokep lewu Sup, helat lewu Paran dengan kare lewu Tupel, Laban, Haserot tuntang Di-Sahab. (

²Bara Bukit Sinai sampai akan Kades-Barnea mahalau daerah kare bukit Edom, kakejaue tanjong sawalas andau.)

³Hong tanggal ije bulan sawalas nyelo kaepat puluh limbah ewen malihi Misir, Moses manyampai akan bangsa te uras taloh handiai je irentah TUHAN mangat insanan akan ewen.

⁴ Jete manjadi limbah Moses[1] mampakalah Sihon, rajan oloh Amori, je marentah intu lewu Hesbon, tuntang Og, raja Basan, je marentah intu kakare lewu Astarot tuntang Edrei.

⁵Intu hila timor Yordan intu Moab, Moses pangkasolake manarang kare atoran tuntang kare parentah TUHAN. Koan Moses,

⁶“Metoh itah aton intu Bukit Sinai, TUHAN, Hatallan itah hamauh, ‘Keton jari sukup katahie melai intu bukit toh.

⁷Toh, ngarak kare kemah keton tuntang lius akan daerah je habukit eka oloh Amori tuntang hapus eka hakalilinge, iete Janah Yordan, daerah je habukit tuntang petak lampar, daerah hila salatan tuntang saran Tasik Bentok. Lius manguasa Kanaan tuntang Libanon sampai batang danum lombah Eprat.

⁸Aku, TUHAN, jari manjanji hapus petak te akan tato hiang keton Abraham, Isaak, Yakub, dengan turonan ewen. Awi te, lius manguasa daerah te.’ ”

⁹Moses hamauh dengan bangsa te, “Metoh itah aton intu Bukit Sinai, aku hamauh dengan keton: Tanggong jawab aingku mamimpin keton paham babehat akangku. Aku dia olih malaluse kabuat,

¹⁰awi TUHAN, Hatallan keton jari mawi keton dahang-dahanga kilau kare bintang intu langit.

¹¹Keleh TUHAN, Hatallan tato hiang keton palus mandahang jumlah kare keton sampai lipet sakoyan, tuntang mawi keton bangsa je tatau sanang kilau je jari injanji Awie!

¹²Tapi kilen ampie aku kabuat tau mananggong taloh je babehat uka mamberes uras perkaran keton?

¹³Keleh mintih bara genep suku pire-pire oloh hatue je harati, are pangalamae tuntang kontep kaharatie, mangat aku mangkat ewen uka mamimpin keton.

¹⁴Tirok te inarima keton dengan bahalap.

¹⁵Tagal te hong marak kare pamimpin je intih keton, pire-pire biti oloh je harati tuntang are pangalamae induangku tuntang iangkatku uka mamimpin keton. Pire-pire biti iangkat mamimpin hunjun sakoyan biti tuntang je beken hunjun saratus biti, hunjun lime puluh biti tuntang hunjun sapuluh biti. Aku kea mangkat kare pamimpin je beken tinai uka maurus kare suku keton

¹⁶Katika te aku manyoho ewen kalotoh: Nantuani kare kabantah je lembut intu marak bangsa keton. Tenga putusan je adil, aloh hong perkara tahiu sama bangsa keton atawa manamput oloh bangsa beken je melai marak keton.

¹⁷Putusan keton ela mambehat silae; genep biti imutus keton awi cara je sama, dia awi mambeda eweh oloh te. Ela mikeh dengan eweh bewei, awi putusan je iawi keton asale bara Hatalla. Amon ije perkara lalau babehat akan keton, imbit jete akangku mangat aku mamutuse.

¹⁸Metoh te kea aku manenga tirok akan keton tahiu taloh samandiai je beken je musti keton malaluse.”

¹⁹“Palus tumon parentah TUHAN, Hatallan itah, itah malihi Bukit Sinai tuntang mananjong mahalau padang pasir je lombah hayak babehat manintu tanah padang pasir oloh Amori. Metoh itah sampai intu Kades-Barnea,

²⁰aku hamauh: Toh keton jari sampai intu daerah je habukit ain oloh Amori, tanah je inenga akan itah awi TUHAN, Hatallan itah tuntang Hatallan tato hiang itah. Item intu hila baun hambirang tanah te. Keleh lius uka manguasae sama kilau je irentah TUHAN. Ela bembang atawa mikeh.

²²Tapi keton dumah manalih aku tuntang hamauh, ‘Labih bahalap itah manyoho pire-pire oloh mananselo itah mangalati lewu te mangat ewen tau mansanan akan itah jalan kueh je patut ihalau itah tuntang kilen ampie kare lewu je akan inalih itah.’

²³Tirok te inarima awiku, awi te aku mintih due walas biti, ije bara genep suku.

²⁴Ewen tame tanah habukit te sampai Eskol, palus mangombange.

²⁵Limbah te ewen haluli manalih itah mimbit kare bua je dinon ewen intu hete tuntang mansanan iete lewu je handak inenga TUHAN akan itah te paham basiwoh.

²⁶ Tapi keton malawan parentah TUHAN, Hatallan keton tuntang dia maku tame lewu te.

²⁷Keton bakotok kalotoh, ‘TUHAN basingi dengan itah. Awi te Ie mimbit itah balua bara Misir handak manyarah itah akan lengen oloh Amori mangat ewen mampatei itah.

²⁸Akan en itah talih hete? Kare oloh je ingirim itah akan hete mawi itah mikeh hayak mansanan je bangsa te labih abas tuntang labih gancang bara itah, tuntang ewen melai intu kare lewu je dindinge kagantong langit. Ewen mite raksasa intu hete!’

²⁹Tapi aku hamauh: Ela mikeh dengan kare oloh te.

³⁰TUHAN, Hatallan keton akan mamimpin keton tuntang hakalahi akan keton sama kilau je jari gitan keton kabuat intu Misir

³¹ tuntang intu padang pasir. Keton mite kilen ampie TUHAN, Hatallan keton mimbit keton dengan salamat hapus jalan te sampai akan eka toh, jaton bedae kilau ije biti bapa mentang anake.

³² Tapi aloh aku jari hamauh kalote, keton hindai maku percaya dengan TUHAN, Hatallan keton,

³³je mananjong intu helo baun keton uka manggau eka mampendeng kemah akan keton. Ie mamparahan jalan akan keton hamalem hong butop apui, tuntang handau hong butop baunandau.”

³⁴ “TUHAN mahining kakotok keton palus sangit. Ie sumpah,

³⁵‘Ije mahin dia bara pangereng je papa toh akan tame tanah je basiwoh je injanji-Ku akan tato hiang keton.

³⁶Baya Kaleb, anak Yepune akan tamee, awi ie baketep dengang-Ku. Akan Kaleb tuntang turonae kareh inenga-Ku lewu je jari ingombange te.’

³⁷Keton kea mawi TUHAN sangit dengangku tuntang hamauh, ‘Moses, ikau kea kareh dia tame lewu te.

³⁸Tapi ngarasan atei pandohop ayum Yosua anak Nun. Ie kareh je mamimpin Israel marabut tanah te.’

³⁹Palus TUHAN hamauh dengan itah samandiai, ‘Kare anak keton je magon lalau korik toto uka tau mambeda je bahalap bara je papa, kare anak je manumon koan keton akan irampas awi kare musoh keton, maka akan ewen te akan inenga-Ku tanah te, tuntang ewen kareh manguasae.

⁴⁰Tapi keton, keleh haluli akan padang pasir mahalau jalan je manintu Telok Akaba.’

⁴¹Keton tombah, ‘Moses, ikei jari badosa intu TUHAN. Tapi toh ikei maku miar parang kilau je irentah TUHAN, Hatallan itah.’ Palus gagenep keton tata-tatap uka parang, awi mangira mantakan tanah je habukit te murah toto.

⁴²Tapi TUHAN hamauh dengangku, ‘Ela manalua ewen parang, awi Aku dia mampahayak ewen, kareh ewen impakalah awi musoh ewen.’

⁴³Aku mansanan akan keton taloh je insanan TUHAN, tapi keton dia padulie. Keton malawan parentah TUHAN, tuntang dengan kajoho haguet akan daerah je habukit te.

⁴⁴Palus oloh Amori je melai daerah je habukit te balua malawan keton. Jumlah ewen are toto sama kilau kawan bajanyi. Ewen manggoang keton sampai Horma, palus mampakalah keton intu daerah je habukit ain oloh Edom.

⁴⁵Limbah te keton haluli tuntang mangkariak manalih TUHAN balaku dohop. Tapi Ie dia maku mahining atawa manantuani auh keton.”

⁴⁶“Limbah te itah melai intu Kades tahi toto.