Read Ngaju DEUTERONOMIUM 10 Bible Online

DEUTERONOMIUM 10 - Ngaju bible

DEUTERONOMIUM 10

¹“Limbah te TUHAN hamauh dengangku, ‘Moses, keleh mamahat due kabindang batu kilau je solake. Keleh manampa kea ije pati kayu akan ekae, balalu talih Aku intu tantan bukit.

²Intu kare batu te kareh inyurat-Ku kare auh je sama kilau intu batu je jari imusitm; palus kare batu te inameam akan huang pati te.’

³Palus aku manampa pati bara kayu panaga tuntang mamahat due batu kilau je helo tuntang mimbite akan hunjun bukit.

⁴Intu batu te TUHAN manyurat Sapuluh Parentah sama dengan je solake. Jete kare parentah je inenga Awie akan keton, metoh Ie hakotak bara bentok apui huang andau keton hapumpong intu pain bukit. Limbah te TUHAN manenga batu basurat je jari inyurat te akangku

⁵palus aku haluli mohon bukit. Tumon parentah TUHAN, kadadue batu te inameangku akan huang pati je jari inampaku. Bara metoh te sampai toh kadadue batu basurat te magon aton intu hete.” (

⁶ Limbah te oloh Israel haguet bara kare kalin danum oloh Yaakan, haguet akan Mosera. Intu hete Aron matei tuntang ingubur. Eleasar anake mangganti ie kilau imam.

⁷Bara hete ewen haguet akan Gudgod, palus akan Yotbata, eka je are danume.

⁸ Intu bukit te[10] TUHAN mangabeken suku Lewi akan maharago Patin Janji tuntang bagawi akan TUHAN, hayak manyampai berkat hapan aran Aie.

⁹Awi te suku Lewi dia manarima tanah pusaka sama kilau kare suku beken, tagal TUHAN je bagin waris ewen, sama kilau je inasnan TUHAN, Hatallan keton akan ewen).

¹⁰ “Epat puluh andau tuntang epat puluh alem aku melai intu hunjun bukit sama kilau je ilalusku tingkat je solake. Sinde tinai TUHAN mahining auhku, Ie maku uka dia mambinasa keton.

¹¹Palus Ie manyoho aku haguet uka mamimpin keton mangat keton tau mandino tanah je injanji Awie akan tato hiang keton.”

¹²“Toh, kare pahari, keleh nantuani taloh je ilaku TUHAN, Hatallan keton denga keton: Keleh mahormat TUHAN, Hatallan keton tuntang lalus kare parentah Aie. Keleh sinta Ie tuntang sembah Ie dengan salepah ateim tuntang salepah hambaruam.

¹³Keleh manumon hapus parentah TUHAN je andau toh inyampaiku akan indu kahalap keton kabuat.

¹⁴TUHAN, Hatallan keton tempon langit pangkagantonge; petak kea Ayue tuntang kakare taloh awang aton intu hunjue.

¹⁵Tapi sintan TUHAN dengan tato hiang keton kalote kahai, sampai bara uras kare bangsa keton ih je intih Awie, tuntang sampai toh kea keton ungkup Ayue je buah intih.

¹⁶Tagal te nampara bara toh keton musti manumon auh TUHAN, ela marisang tinai.

¹⁷ TUHAN, Hatallan keton aton intu hunjun kare hatalla tuntang malabien bara kakare kuasa. Ie Hatalla je hai tuntang bara kuasa je patut inumon. Ie dia rajin mintih ampin oloh tuntang dia kea manarima sogok.

¹⁸Ie milang hak nole tuntang balo mangat ewen iharago hapan kaadilan. Ie sinta oloh bangsa beken je belom hinje bangsa itah hayak manenga akan ewen panginan tuntang pakaian.

¹⁹Palus keton kea patut mamparahan sintan keton akan kare oloh bangsa beken te, awi bihin keton kea oloh bangsa beken intu Misir.

²⁰Keleh mahormat TUHAN, Hatallan keton tuntang sembah Ie bewei. Keleh keton baketep dengae tuntang sumpah tagal aran Aie bewei.

²¹Keleh manara Ie awi Ie Hatallan keton. Hapan matan keton kabuat keton jari mite kare gawi hai tuntang babehat je ilalus Awie akan keton.

²² Metoh tato hiang keton haguet akan Misir, kare ewen baya uju puluh biti. Tapi TUHAN, Hatallan keton jari mawi kare keton tumon kare bintang intu langit.”