Read Ngaju DEUTERONOMIUM 11 Bible Online

DEUTERONOMIUM 11 - Ngaju bible

DEUTERONOMIUM 11

¹“Keleh sinta TUHAN, Hatallan keton, numon harajur kakare parentah Aie.

²Keleh mingat toh taloh je ingatawan keton tahiu TUHAN bara pangalaman pambelom keton. Kare anak keton dia aton pangalamae tahiu taloh te. Baya keton bewei je jari mite kahain TUHAN, Hatallan keton, kaabas Aie, kuasan Aie,

³ tuntang bara kare taloh heran je ilalus Awie. Keton mite kabuat taloh je ilalus Awie akan raja Misir tuntang hapus lewue.

⁴ Keton mite kilen ampie TUHAN mampalomos tantara Misir dengan kakare kuda tuntang kareta parange. Ewen uras impaleteng intu Tasik Raruju[11] metoh manggoang keton.

⁵Keton katawan taloh je ilalus TUHAN akan keton intu padang pasir sahindai keton sampai hetoh.

⁶ Keton kea mingat taloh je ilalus TUHAN dengan Datan tuntang Abiram, kare anak Eliab bara suku Ruben. Intu taharep baun keton samandiai, petak basila palus manelen ewen dengan keluargae, kemah, kare reware tuntang meto ain ewen.

⁷Yoh, keton bewei je hapan matan keton kabuat jari mite uras taloh heran je ilalus TUHAN.”

⁸“Keleh manumon uras kare parentah je inyampaiku akan keton andau toh, palus keton tau dimpah batang danum tuntang tame akan lewu je dia tahi tinai ielai keton.

⁹Keton kareh belom tahi intu lewu je tatau tuntang basiwoh, je injanji TUHAN akan tato hiang keton tuntang akan turonan ewen.

¹⁰Lewu je ielai keton kareh dia kilau tanah Misir, eka keton bihin melai. Intu hete keton bagawi babehat manggau danum akan mambisa kare tanan keton metoh manawor binyi.

¹¹Tapi lewu je kareh iname keton iete petak bukit tuntang petak lampar; petake imbisa awi ujan.

¹²TUHAN, Hatallan keton mahaga lewu te tuntang manjagae hapus nyelo.

¹³ Tagal te keleh manumon kare parentah Aie je inyampaiku akan keton andau toh; keleh sinta TUHAN, Hatallan keton tuntang sembah Ie hapan salepah atei keton tuntang salepah hambruan keton.

¹⁴Amon keton mawie kalote, TUHAN kareh mampamohon ujan akan petak keton intu wayahe, limbah keton manggetem, tuntang wayah keton nampara mimbul. Palus keton kareh mandino sukop gandom, anggor tuntang undus saitun, dengan oru akan meto.

¹⁵Uras kare panginan je imerlu keton kareh uras inyadia akan keton.

¹⁶Ela keton hakon ingejau bara TUHAN balalu manyembah tuntang manempo kare hatalla beken.

¹⁷Amon keton malanggar parentah te, TUHAN kareh rahas dengan keton. Ie kareh dia mampamohon ujan. Petak keang kamahau sampai pambulan dia manenga hasil. Palus dia tahi keton matei intu petak basiwoh je inenga TUHAN akan keton.

¹⁸ Keleh mingat tuntang manantuani kare auhku. Meteng intu penang tuntang kepan intu lingkau keton uka mingat.

¹⁹Keleh majar jete akan kare anak keton. Keleh mangotak jete intu huang huma tuntang intu luar huma metoh malayan tuntang metoh bagawi.

²⁰Keleh manyurat jete intu jihin bauntonggang huma tuntang intu lawang keton.

²¹Keton tuntang kare anak keton kareh panjang umur intu lewu je injanji TUHAN, Hatallan keton akan tato hiang keton. Katahin aton langit intu hunjun petak, katahin te kea keton kareh melai intu tanah te.

²²Keleh manumon dengan kaketep uras kare parentah je inyampaiku akan keton: Keleh sinta TUHAN, Hatallan keton, lalus uras taloh je irentah Awie akan keton, keleh keton baketep Dengae.

²³TUHAN kareh maharak kakare bangsa te bara hila baun keton, tuntang keton kareh melai intu tanah ayun kare bangsa je labih hai tuntang labih abas bara keton.

²⁴ Genep eka je ihunje keton kareh jadi ayun keton. Tanah te hambirang bara padang pasir intu Salatan sampai kare bukit Libanon intu utara, tuntang bara Sungei Eprat intu timor sampai akan Tasik Bentok intu hila barat.

²⁵Intu hapus lewu te, TUHAN, Hatallan keton kareh mawi kare oloh takikeh dengan keton kilau je injanji Awie, sampai ije mahin jaton oloh tau mahalang keton.

²⁶Andau toh keton tau mintih bara berkat atawa sapa.

²⁷Keton kareh imberkat amon manumon parentah TUHAN, Hatallan keton, je andau toh inyampaiku akan keton.

²⁸Tapi keton kareh inyapa amon dia manumon kare parentah TUHAN, Hatallan keton, awi keton mules manyembah kare hatalla beken je dia puji keton manyembahe.

²⁹ Limbah TUHAN, Hatallan keton mimbit keton tame akan lewu je ielai keton kareh, berkat te inyewut awi keton bara Bukit Gerisim tuntang sapa bara bukit Ebal. (

³⁰Kadadue bukit te aton intu hila barat Sungei Yordan intu eka oloh Kanaan je melai intu petak lampar Yordan, manaharep akan hila barat dia kejau bara kare batang kayu eka sombayang intu More tokep lewu Gilgal).

³¹Dia tahi tinai keton dimpah Sungei Yordan tuntang manguasa tanah je inenga TUHAN, Hatallan keton akan keton. Limbah keton marampas tanah te tuntang melai intu hete,

³²keton musti manumon uras kare parentah je inyampai akan keton andau toh.”