Read Ngaju DEUTERONOMIUM 12 Bible Online

DEUTERONOMIUM 12 - Ngaju bible

DEUTERONOMIUM 12

¹“Jetoh kare parentah tuntang kare atoran je musti inumon hapus pambelom intu lewu je inenga akan keton awi TUHAN, Hatallan tato hiang keton.

²Limbah tame akan lewu te keton balalu mampahancor kare eka manyembah dewa intu hunjun kare bukit je gantong intu kare bukit tuntang intu penda kare batang kayu je labat dawee, eka kare bangsa je melai intu hete manyambah kare hatallan ewen.

³ Nderep kare mesbeh ewen tuntang parotek kare tihang batu je ingira ewen sakti. Ngehu kare tanda ain Asera, tuntang pahancor kare hampatong dewan ewen, sampai kare dewa te dia inyembah tinai intu kare eka te.

⁴Metoh keton manyembah TUHAN, Hatallan keton, ela manyonto cara kare oloh te manyembah hatallan ewen.

⁵Bara hapus eka kare suku Israel, TUHAN Hatallan keton kareh mintih ije eka mangat bangsa itah tau dumah intu taharep Ie tuntang manyembah Ie.

⁶Akan eka te keton musti mimbit kare parapah je ingehu hayak kare parapah je beken, kare parapah sapersapuluh keton dengan kare parapah je beken, parapah pambayar janjin keton, parapah kahias atei keton tuntang anak sapi tuntang anak tabirin keton je solake inakan.

⁷Intu hete kea, intu taharep TUHAN, Hatallan keton, keton haya-hayak dengan keluarga keton kuman tuntang hanjak tagal kare gawin satiar keton je mimbit hasil awi berkat TUHAN, Hatallan keton.

⁸Amon katika te jari sampai, ela tinai keton mawi taloh je sama kilau toh. Sampai toh keton sombayang sakahandak atei keton,

⁹awi keton hindai tame lewu je inenga TUHAN, Hatallan keton akan keton, eka keton tau manetep dengan kasanang.

¹⁰Limbah keton dimpah Yordan, TUHAN, Hatallan keton kareh mandohop keton manguasa tuntang melai tanah intu dipah batang danum te. Ie kareh mangalindong keton bara kare musoh. Keton kareh belom sanang mangat.

¹¹Limbah te TUHAN, Hatallan keton kareh mintih ije eka je Ie patut inyembah. Akan hete keton haguet mimbit uras taloh je jari irentah-Ku, iete parapah je ingehu tuntang parapah je beken, parapah sapersapuluh tuntang parapah je ingabeken je injanji keton akan TUHAN.

¹²Keleh hanjak intu taharep TUHAN, Hatallan keton, haya-hayak dengan kare anak keton, kare rewar keton tuntang kare oloh Lewi je melai intu kare lewun keton. Jete awi oloh Lewi dia mandino bagi tanah intu lewun keton.

¹³Keton dia tau maluput parapah intu bara-rangai eka je intih keton kabuat,

¹⁴tapi baya intu eka je intih TUHAN intu tanah ain ije bara suku ayum. Intu hete bewei keton maluput parapah je ingehu tuntang malalus taloh beken je irentah-Ku akan keton.

¹⁵Tapi keton bebas manyambalih meto ain keton tuntang kuman isie intu kueh bewei keton melai. Keton tau kuman tumon kare je inenga TUHAN, Hatalla akan keton. Genep bitin oloh je barasih tuntang je papa, tau kuman isie te kilau keton tau kuman isin karahau atawa isin bajang.

¹⁶ Baya dahae dia tau kinan, tapi inusoh akan petak kilau danum.

¹⁷Intu eka keton melai keton dia tau kuman parapah sapersapuluh bara gandom, anggor, undus saitun, sapi atawa kambing tabirin keton je solake inakan, parapah hapa mambayar janji, parapah kahias atei atawa parapah ayun keton je beken.

¹⁸Keton tuntang kare anak keton, haya-hayak dengan kare rewar keton tuntang kare oloh Lewi je melai intu lewun keton, musti kuman parapah te intu taharep TUHAN, Hatallan keton, intu eka je iintih TUHAN, Hatallan keton. Tuntang intu eka te keton musti hanjak tagal kare taloh je iawi keton.

¹⁹Bua-buah, haga, ela sampai keton manalua oloh Lewi belom asi-asi katahin keton belom intu lewu te.

²⁰Limbah TUHAN, Hatallan keton mampalombah kare saran tanah je jari injanji Awie, keton tau kuman isin meto sakahandak atei keton.

²¹Amon eka je intih TUHAN, Hatallan keton lalau kejau bara eka keton, keton tau manyambalih ije kongan sapi, tabiri atawa kambing je inenga TUHAN akan keton. Keton tau kuman isin meto intu ekam sakahandak ateim sama kilau je jari insanangku akan keton.

²²Genep biti aloh je barasih atawa je pali, tau kuman isin meto te, kilau keton tau kuman isin bajang atawa karahau.

²³ Tapi isin meto je magon aton dahae dia tau kinan, awi tahaseng aton intu huang dahae. Ikau dia tau kuman hambaruan hayak dengan isie.

²⁴Dahae samasinde dia tau kinan, tapi inusoh akan petak kilau danum.

²⁵Amon keton manumon kare parentah te, TUHAN kareh sanang; keton tuntang turonan keton kareh belom sanang.

²⁶Kare parapah je jari injanji keton akan TUHAN, musti imbit keton akan eka je iintih TUHAN.

²⁷Parapah je ingeho tuntang parapah je kinan isin metoe musti iluput intu hunjun mesbeh TUHAN, Hatallan keton tuntang dahae inusoh akan hunjun mesbeh te.

²⁸Nantuani bua-buah uras kare taloh je jari irentahku akan keton, maka keton mawi taloh je bahalap tuntang kakilak TUHAN, Hatallan keton, maka keton tuntang turonan keton salamat tuntang sanang sampai katatahie.”

²⁹“TUHAN, Hatallan keton kareh mambinasa kare bangsa je melai intu lewu te, sampai keton tau manguasae tuntang melaie.

³⁰Limbah kare bangsa te imbinasa, bua-buah ela sampai keton manyonto ewen manyembah kare hatalla beken, awi gawi te akan mawi calaka.

³¹Cara kare bangsa te manyembah kare hatallan ewen, ela keton manyontoe akan hapa manyembah TUHAN, Hatallan keton. Awi ewen manyembah dengan mawi kare gawi papa je inyingi TUHAN. Kare anak ewen kabuat haream imapui ewen intu hunjun mesbeh kilau parapah akan kare hatallan ewen.

³² Keleh malalus kare auh je irentahku akan keton, ela mandahang atawa mangurange.