Read Ngaju DEUTERONOMIUM 13 Bible Online

DEUTERONOMIUM 13 - Ngaju bible

DEUTERONOMIUM 13

¹Amon ije biti nabi atawa tukang nupi[12] manjanji taloh heran

²dengan maksud uka keton manyembah tuntang manempo kare hatalla je dia puji keton kasene, aloh taloh je injanjie te toto-toto manjadi,

³ela mahininge. TUHAN, Hatallan keton mahapan oloh te handak mancoba keton, uka mite en keton toto-toto sinta TUHAN atawa dia.

⁴Oloh macam te musti ihukum matei, awi handak mampalayang keton bara jalan je irentah TUHAN, Hatallan keton, akan keton. Ie oloh papa awi manyoho keton malapas arep keton bara TUHAN, Hatallan keton, je maliwus keton bara Misir, eka keton ihajipen. Jadi ie patut impatei mangat kapapae te impanihau. Tapi keton keleh manumon auh TUHAN, Hatallan keton, tuntang mahormat Ie; baketep Dengae tuntang malalus kare parentah Aie. Keleh harajur baketep tuntang manempo Ie.

⁶Amon paharin keton, atawa anak keton hatue atawa bawi, atawa sawan keton je inyinta atawa sobat keton je eka kaheret keton, suni-suni mamakat manyembah kare hatalla beken je dia keton kasenee tuntang dia tato hiang keton kasenee, kare hatalla bara kare bangsa je melai tokep atawa kejau,

⁸ela mahining auhe tuntang ela manalua arep keton imakat awie. Ela kea masi tuntang mangalindong oloh te.

⁹Ie musti imanting hapan batu sampai matei. Ikau je musti nampara mamedake, inontong awi hapus rayat, oloh je basala te musti impatei, awi ie handak mangejau keton bara TUHAN, Hatallan keton je maliwus itah bara kahajipen intu Misir.

¹¹Hapus bangsa Israel kareh mahining tahiu oloh je matei te tuntang mikeh, sampai ije mahin jaton je mawi kapapa tinai.

¹²Amon keton kareh melai intu kare lewu je inenga TUHAN, Hatallan keton, akan keton tau tasiar barita

¹³je pire-pire oloh papa bara bangsa keton mampalayau oloh lewu mangat manyembah kare hatalla je dia keton kasenee.

¹⁴Amon tapahining barita macam te, keleh mariksae titi-titip. Amon kapapa te puna bujur jari manjadi,

¹⁵maka hapus oloh lewu te dengan metoe musti impatei. Lewu te impalomos samasinde.

¹⁶Salepah panatau oloh lewu te imumpong tuntang inoyok intu alun-alun, palus lewu tuntang panataue ingehu kilau parapah akan TUHAN, Hatallan keton. Limbah te uras te ilihi jadi tisan karewon kehu tuntang dia tau imangun tinai.

¹⁷Kare ramo tarasapa te dia tau ingkes akan kabuat, tapi imbinasa samasinde. Te kasangit TUHAN kareh terai tuntang Ie kareh mamparahan asin Aie dengan keton. Ie kareh tau dengan keton tuntang mawi keton jadi bangsa je hai kilau je injanji Awie akan tato hiang keton,

¹⁸asal keton manumon kare parentah Aie je inyampaiku akan keton andau toh, tuntang malalus uras taloh je ingahandak Awie.”