Read Ngaju DEUTERONOMIUM 14 Bible Online

DEUTERONOMIUM 14 - Ngaju bible

DEUTERONOMIUM 14

¹ “Keton toh ungkup TUHAN, Hatallan keton. Awi te katika keton manatum akan oloh matei ela mahiris arep keton atawa manggundul hila baun takolok keton kilau je iawi kare bangsa beken.

² Keton toh ayun TUHAN, Hatallan keton; bara hapus bangsa intu hunjun petak, keton ih je intih Hatalla mangat jadi ungkup Ayue.”

³“Ela kuman meto je insanan pali awi TUHAN.

⁴Ikau tau kuman kare meto: sapi, tabiri, kambing,

⁵bajang, tabiri parak kayu, kambing parak kayu, karahau,

⁶uras meto je basila tunjike tuntang manyipa handue.

⁷Keton dia tau kuman meto je tunjike dia basila tuntang dia manyipa handue. Ela kuman onta, kalinci atawa marmot. Kare meto te pali, awi aloh manyipa handue tapi tunjike basila.

⁸Ela kuman bawoi. Meto te pali, awi aloh tunjike basila, ie dia manyipa handue. Isie dia tau kinan, hantue dia tau inigong.

⁹Keton tau kuman uras macam lauk je hakiting tuntang hatisik.

¹⁰Meto je belom huang danum tapi dia hakiting tuntang dia hatisik jete pali, dia tau kinan.

¹¹Keton tau kuman uras macam burong je dia pali.

¹²Tapi aton pire-pire macam burong je dia tau kinan, iete: burong nasar, burong nasar hajanggut, burong nasar laut, uras macam burong antang, uras macam burong kak, burong onta, kalialang, burung laut, mangkong, takerok, buak, sabaru, burong nasar je kuman hantun meto, burung bere, burung binti, meragai tuntang bangamat. [13]

¹⁹Uras meto korik je hapalapas jete pali, dia tau kinan.

²⁰Meto je hapalapas je dia pali tau kinan.

²¹ Meto je matei kabuate dia tau keton kumae, tapi tau kinan awi oloh bangsa beken je melai marak keton, atawa injual akan kare bangsa beken. Keton toh ungkup je ingabeken tantai akan TUHAN, Hatallan keton. Isin anak tabiri atawa anak kambing dia tau impakasak dengan danum tuson indue.”

²² “Genep nyelo keton musti manduan sapersapuluh bara hapus hasil petak keton.

²³Intu taharep TUHAN, Hatallan keton, intu eka je intihe akan eka sombayang, keton kuman parapah sapersapuluh bara gandom, danum anggor, undus saitun dengan anak sapi tuntang kambing tabiri je solake inakan. Keleh malalus taloh te mangat palus katatahie keton bajar mahormat TUHAN, Hatallan keton.

²⁴Amon eka je intih TUHAN, Hatallan keton pahalau kejau bara humam, sampai sapersapuluh bara hasil petakm je inenga TUHAN, Hatallan keton akan keton dia olih imbit awim akan hete, maka

²⁵jual belah bara hasil petakm te, palus imbit duite akan eka je intih TUHAN, Hatallan keton.

²⁶Keleh malanja duit te akan narai bewei je ingahandakm — sapi atawa kambing tabiri, danum anggor atawa taloh ihop bahari palus intu eka te, intu taharep TUHAN, Hatallan keton, keton tuntang keluarga keton kuman hayak-hayak tuntang hanja-hanjak.

²⁷Ela manalua, oloh Lewi je melai intu kare lewun keton, belom asi-asi; ingat je ewen te jaton bara petak kabuat.

²⁸Hong kahapus genep nyelo katelo, keton musti mimbit sapersapuluh bagin hasil petakm tuntang mamumponge intu kare lewun keton.

²⁹Panginan te akan oloh Lewi awi ewen jaton bara petak, tuntang akan oloh bangsa beken, anak nule tuntang kare balo je belom intu kare lewun keton. Ewen tau dumah tuntang manduan uras je imerlu ewen. Amon keton malalus tumon te, maka TUHAN, Hatallan keton kareh mamberkat uras kare gawin keton.”