Read Ngaju DEUTERONOMIUM 15 Bible Online

DEUTERONOMIUM 15 - Ngaju bible

DEUTERONOMIUM 15

¹“Hong kahapus genep nyelo kauju keton musti mambebas oloh je tege utange.

²Kalotoh carae. Genep bitin oloh Israel je mahanjaman duit akan oloh sama bangsae, musti mambebas utang oloh te, awi manumon putusan TUHAN kabuat, utang te musti imbebas, dia tau inagih tinai.

³Keton tau managih duit je ihanjaman akan oloh sama bangsa keton.

⁴TUHAN, Hatallan keton kareh mamberkat keton intu lewu je inengae akan keton. Intu marak bangsa ain keton jaton aton oloh je belom susah.

⁵asal keton manempo TUHAN, Hatallan keton, tuntang batokei malalus uras taloh je irentahku akan keton andau toh.

⁶TUHAN, Hatallan keton kareh mamberkat keton kilau je injanji Awie. Ikau kareh mahanjaman duit akan are bangsa tapi keton kabuat kareh dia minjam; keton kareh manguasa are bangsa, tapi ewen kareh dia manguasa keton.

⁷ Amon keton kareh jari melai intu lewu je inenga TUHAN, Hatallan keton akan keton, palus hong ije bara lewun keton aton oloh sama bangsae dengan keton je barakatapas, ela manantauani arep keton kabuat hayak dia maku mandohop ie.

⁸Malengkan, keton patut masi tuntang mahanjaman akan oloh te sapire je imerlue.

⁹Ela mahakan mahanjaman akae awi sabab nyelo mambebas utang jari tokep. Ela manalua tirok je kalote kapapae tame huang atei keton. Amon keton dia maku mahanjaman, oloh te kareh mangkariak akan TUHAN uka mandawa keton. Keton kareh insanan sala.

¹⁰Tenga akae dengan kasanang atei tuntang kahias, maka TUHAN, Hatallan keton kareh mamberkat kare gawin keton.

¹¹ Intu marak oloh Israel harajur aton pire-pire oloh je belom susah tuntang barakatapas. Tagal te aku marentah keton mangat tau dengan ewen.”

¹² “Amon ije biti oloh hatue atawa bawi bara bangsa keton manjual arepe[14] jadi jipen keton, ie musti bagawi akan katahin jahawen nyelo. Intu nyelo je kauju ie musti imbebas.

¹³Jipen je imbebas te dia tau inalua haguet buli buang.

¹⁴Tenga akae dengan katau bara taloh je inenga TUHAN, Hatallan keton akan keton, iete kambing tabiri, gandom tuntang anggor.

¹⁵Ingat je keton bihin jipen intu Misir palus iembebas awi TUHAN Hatallan keton; jete bukue aku manenga parentah toh akan keton.

¹⁶Tapi amon jipen te dia maku haguet awi ie sinta keton dengan keluarga keton tuntang rajin melai dengan keton,

¹⁷imbit ie akan bauntonggang human keton tuntang mesek pindinge. Ie kareh jari jipem sampai hapus umure. Kalote kea keton mawi jipen je bawi.

¹⁸Amon keton mambebas ije biti jipen, ela mangkeme babehat, awi katahin jahawen nyelo ie jari bagawi akan keton, dengan saparo upah ije biti ayang.[15] Lalus parentah te, palus TUHAN, Hatallan keton kareh mamberkat kakare taloh gawin keton.”

¹⁹ “Anak sapi tuntang kambing tabiri je solake inakan musti iluput akan TUHAN, Hatallan keton. Sapi te dia tau ihapan akan maluku, tuntang tabiri te dia tau inggunting.

²⁰Genep nyelo keton hapus keluarga kuman isie intu taharep TUHAN, Hatallan keton intu eka je intih TUHAN.

²¹Tapi amon meto te tege cacate, paribasae batimpang atawa babute atawa cacat hai je beken; keton dia tau malupute akan TUHAN, Hatallan keton.

²²Genep biti, aloh je barasih aloh je papa, tau kumae intu huma kilau kuman isin bajang atawa isin karahau.

²³ Dahae dia tau kinan, tapi inusoh akan petak kilau danum.”