Read Ngaju DEUTERONOMIUM 16 Bible Online

DEUTERONOMIUM 16 - Ngaju bible

DEUTERONOMIUM 16

¹ “Keleh mahaga Pesta Paska hong bulan Abib hapa mahormat TUHAN, Hatallan keton, awi hong bulan te, metoh hamalem Ie mambebas keton bara Misir.

²Keleh haguet akan eka je intih TUHAN uka manyambalih ije kongan bara kambing, tabiri atawa sapi kilau parapah Paska akan mahormat TUHAN, Hatallan keton.

³Parapah Paska te musti kinan keton dengan rote je dia iragi. Uju andau katahie keton musti kuman rote je dia iragi, kilau metoh keton malihi tanah Misir kajeng-kiso. Keleh kuman rote te, rote je inyewut rote kasusah kapehe, mangat hapus pambelom keton taraingat andau keton malihi Misir, eka keton buah kapehe kasusah.

⁴Katahin uju andau intu hapus lewun keton jaton ije biti oloh je mingkes rote intu humae. Isin meto je inyambalih hong alem je solake musti kinan sampai lepah hong alem te kea.

⁵Meto akan Pesta Paska musti inyambalih intu eka je intih TUHAN, Hatallan keton, tuntang dia tau intu eka beken intu hapus lewu je inengae akan keton. Taloh te ilalus keton metoh matanandau belep, kilau metoh keton malihi tanah Misir.

⁷Keleh maluntoh isin meto te tuntang kinan intu eka je intih TUHAN, Hatallan keton palus buli akan human keton hanjewu jewue.

⁸Katahin jahawen andau limbah te keton harajur kuman rote je dia iragi. Hong andau je kauju keton musti hapumpong sombayang uka manyembah TUHAN Hatallan keton. Ela keton bagawi hong andau te.”

⁹ “Keleh mitong ujo minggu nampara bara andau je solake keton manggetem gandom,

¹⁰balalu lalus Pesta Getem uka mahormat TUHAN, Hatallan keton. Hong andau te imbit parapah kahias atei tumon kare pangolih je jari inenga Awie akan keton.

¹¹Intu taharep TUHAN, Hatallan keton intu eka je iintih Awie, keton musti hanja-hanjak dengan kare anak keton, jipen keton tuntang oloh Lewi, oloh bangsa beken, anak nole tuntang kare balo je melai intu kare lewun keton.

¹²Keleh manumon uras kare parentah dengan baketep, tuntang ela kalapean je bihin keton jipen kea intu Misir.”

¹³ “Limbah uras gandom jari ihik tuntang uras anggor jari ihamis, keton musti malalus Pesta Tingkap Dawen katahin uju andau.

¹⁴Keleh hanja-hanjak hayak kare anak keton, kare jipen keton, oloh Lewi, oloh bangsa beken, anak nole tuntang kare balo je melai intu kare lewun keton.

¹⁵Uju andau katahie keton malalus Pesta te uka mahormat TUHAN, Hatallan keton intu eka je iintih TUHAN. Keleh hanjak, awi TUHAN, Hatallan keton, jari mamberkat hasil petak tuntang gawin keton.

¹⁶Uras oloh hatuen Israel dumah manyembah TUHAN, Hatallan keton intu eka je intihe hantelo ije nyelo. Iete hong Andau Hai Paska, hong Pesta Manggetem tuntang Pesta Tingkap Dawen. Genep biti mimbit parapah

¹⁷manumon kaolihe, tumon kare rajaki je inenga TUHAN, Hatallan keton akae.”

¹⁸“Intu genep lewu je inenga TUHAN, Hatallan keton akan keton, keton musti mangkat kare hakim dengan kare pagawai beken uka mamutus kare perkaran rayat dengan adil.

¹⁹ Hong mamutuse ewen dia tau bara-rangai atawa babehat silae. Ewen dia tau kea manarima panengan oloh, awi panenga te mawi oloh babute, aloh oloh je harati tuntang bujur, sampai mamutus dengan dia adil.

²⁰Ikau patut harajur adil, mangat tau manetep tuntang belom sanang intu tanah je inenga TUHAN, Hatallan keton akan keton.

²¹ Amon keton mawi mesbeh akan TUHAN, Hatallan keton, ela mandak hampatong dewa kayu tamonan Asera intu silae.

²² Ela mampendeng tihang akan manyembah hampatong; awi TUHAN, Hatallan keton manyingi gawi te.