Read Ngaju DEUTERONOMIUM 17 Bible Online

DEUTERONOMIUM 17 - Ngaju bible

DEUTERONOMIUM 17

¹Ela maluput sapi atawa tabiri je aton cacate akan TUHAN, Hatallan keton, awi Ie manyingi jete.

²Amon keton mahining intu ije bara lewun keton aton oloh je badosa intu taharep TUHAN, Hatallan keton awi malanggar janji

³ tuntang parentah Ayue awie manyembah tuntang manempo kare hatalla beken atawa manyembah matanandau, bulan atawa kare bintang,

⁴maka keton musti mariksae titi-titip. Jaka kapapa te puna jari aton manjadi intu Israel,

⁵oloh je mawi kasalan te musti iimbit akan luar lewu tuntang imedak hapan batu sampai matei.

⁶ Tapi ie baya tau ihukum matei amon aton due biti saksi atawa labih; oloh dia tau ihukum matei baya hapan auh ije biti saksi.

⁷ Kare saksi te je mamedak batu je solake mawi oloh te, limbah te kakare rayat. Tumon te keton manganan kapapa te.

⁸Amon aton perkara je dia olih imutus awi kare hakim je aton awi pahalau bahali, paribasae perkara pampatei je tantai ihat atawa dia tantai ihat, kasuat tahiu ramo atawa mampahimang, keton musti haguet akan eka je intih TUHAN Hatallan keton.

⁹Imbit perkaran keton te akan kare imam Lewi tuntang akan hakim je kanjerae malalus gawie, balalu nauhe ewen mamutuse.

¹⁰Ewen te je manenga putusan, tuntang keton musti malalus titi-titip taloh je insanan akan keton.

¹¹Keleh manarima putusan ewen hayak lalus taloh je inukas ewen sampai taloh je pangkakorike.

¹²Eweh bewei je bahanyi malawan hakim atawa imam je kanjerae malalus gawie, musti ihukum matei; tumon te keton manganan kapapa te intu Israel.

¹³Uras oloh kareh mahining tahiu kajarian taloh te, palus mikeh, sampai jaton tinai je bahanyi mawi taloh kalote.”

¹⁴ “Amon tanah je inenga TUHAN, Hatallan keton akan keton jadi ain keton, tuntang keton jari melai hete, mikeh keton kea mangahandak ije biti raja kilau kare bangsa je melai hakaliling keton.

¹⁵Keleh nantuani toto-toto mangat oloh je iangkat keton jadi rajan keton iete oloh je iintih TUHAN, Hatallan keton. Ie musti ije biti bara bangsa keton kabuat; ela mangkat oloh bangsa beken jadi rajan keton.

¹⁶ Raja dia tau mingkes are kuda akan tantarae tuntang dia tau manyoho bangsa toh haluli akan Misir indu mamili kuda,[16] awi TUHAN jari hamauh dengan ungkup Ayue dia tau haluli akan lewu te.

¹⁷ Raja dia tau are sawae, mangat ie dia manalikut TUHAN. Ie kea dia tau mampatatau arepe dengan perak atawa amas.

¹⁸Amon oloh iangkat jadi raja, ie musti inenga ije buku basuang kare Parentah Hatalla je inyalinan bara buku asale je ingkes awi kare imam Lewi.

¹⁹Buku te harajur aton tokep ie, tuntang sampai hapus umure ia mambasae mangat balajar mahormat TUHAN Hatallae tuntang baketep manumon hapus parentah je inyurat huange.

²⁰Amon ie batokei mambasae, ie kareh dia akan mitong arepe labih bahalap bara kare oloh je sama bangsae; Ie dia kareh malanggar parentah TUHAN hapan cara kilen ampie bewei. Palus ie tuntang turonae kareh marentah bangsae palus girir-manggirir.”