Read Ngaju DEUTERONOMIUM 18 Bible Online

DEUTERONOMIUM 18 - Ngaju bible

DEUTERONOMIUM 18

¹“Hapus suku Lewi inenga gawin imam, awi te ewen dia tau manarima bagin tanah intu Israel. Ewen belom bara kare parapah je inenga akan TUHAN.

² Ewen dia tau mingkes petak kilau kare suku je beken, awi TUHAN bagin waris ewen, kilau je injanji TUHAN akan ewen.

³Amon ije biti oloh maluput parapah sapi atawa tabiri, maka sapak lenge, ijang tuntang kanain meto te injulok akan kare imam indu bagin ewen.

⁴Hasil je solake bara gandom, danum anggor tuntang bulun tabiri, akan bagin ewen kea.

⁵Bara uras suku Israel, TUHAN, Hatallan keton jari mintih suku Lewi jadi imam sampai katatahie.

⁶Amon ije biti oloh Lewi je bara lewu kueh bewei intu Israel dumah akan eka je intih TUHAN tuntang handak melai hete,

⁷ie patut bagawi akan TUHAN, Hatallae kilau imam kilau kare oloh Lewi beken je bagawi intu eka te.

⁸Ie patut manarima panginan je karee sama kilau kare imam je beken; narai je dinoe bara kare tondah kolae, akae kea.”

⁹“Amon keton jari tame akan lewu je inenga TUHAN, Hatallan keton akan keton, ela manyonto kapapa je ilalus kare bangsa je aton intu hete.

¹⁰ Intu marak keton ela aton je maluput kare anake indu parapah je ingehu. Tuntang ije biti mahin ela je jadi oloh tukang tujum, manggau kare tanda, mahapan kare kaji, atawa

¹¹ seher, misek liau oloh matei.

¹²Oloh je mawi kare gawi papa te inyingi awi TUHAN, Hatallan keton, jete bukue kare bangsa te iharak Awie bara baun keton.

¹³Tagal te keleh keton manempo TUHAN, Hatallan keton dengan salepah ateim.”

¹⁴Limbah te Moses hamauh, “Kare bangsa intu lewu je kareh ielai keton te manumon auh ajar kare tukang tujum tuntang manggau kare tanda. Tapi TUHAN, Hatallan keton dia manyoho keton malalus taloh te.

¹⁵ Malengkan bara bangsa itah kabuat ie kareh manyoho akan keton ije biti nabi je kilau aku toh, tuntang keton patut manempo ie.[17]

¹⁶Hong andau keton hapumpong intu Bukit Sinai, keton balaku uka keton ela tinai mahining TUHAN, Hatallan keton hakotak tuntang ela tinai mite panumahe huang apui je ganda-gandang, awi keton mikeh matei.

¹⁷Tagal te TUHAN hamauh dengangku, ‘Palakun ewen te buah.

¹⁸Bara bangsa ewen kabuat aku manyoho ije biti nabi kilau ikau. Aku kareh mansuman akae taloh je akan ingotake,[18] palus ie kareh manyampai akan bangsa te uras taloh je irentahku.

¹⁹ Ie kareh hakotak hapan arangku, tuntang aku[19] kareh mahukum eweh bewei je dia maku mahining auh Aie.

²⁰Tapi amon ije biti nabi bahanyi manyampai peteh hapan arang-Ku, padahal Aku dia manyoho ie mawi kalote, ie musti matei; kalote kea genep nabi je hamauh hapan aran hatalla beken kea patut matei.’

²¹Mikeh tau kea keton misek huang atei keton, ‘Kilen ampie ikei katawan en peteh ije biti nabi te bara TUHAN atawa dia?’

²²Amon ije biti nabi hakotak hapan aran TUHAN, tapi taloh je insanae te dia manjadi, maka tujum te dia bara TUHAN, nabi te hakotak hapan arae kabuat tuntang keton dia usah mikeh dengae.”