Read Ngaju DEUTERONOMIUM 19 Bible Online

DEUTERONOMIUM 19 - Ngaju bible

DEUTERONOMIUM 19

¹ “Limbah kare bangsa te imbinasa TUHAN, Hatallan keton tuntang lewue inenga akan keton, limbah keton manduan kare lewu tuntang kare human ewen palus melai hete,

²tanah te balalu imbagi keton jadi telo kabagi, hong genep bagie aton ije lewu eka bakalindong je tokep talihe uka genep pamuno tau hadari akan hete.

⁴Amon ije biti oloh dengan dia tantai ihat jari mampatei oloh beken je dia musohe, ie tau hadari akan ije bara lewu te tuntang tau tetep belom.

⁵Paribasae due biti haya-hayak tame parak kayu handak maneweng kayu. Metoh je ije maneweng, isin kapake tampusing buah kawale sampai matei. Maka oloh je jari mampatei dia tantai ihate te dia sala; ie tau hadari akan ije bara telo lewu eka bakalindong te, uka ie salamat. Amon baya aton ije bewei lewu eka bakalindong, tuntang talihe akan hete lalau kejau, tuntang kare oloh keluarga je puna akan mamaleh pampatei te tau manggoang ie tuntang hong kasangite mampatei oloh je dia sala.

⁷Awi te aku marentah keton manyadia telo lewu.

⁸Amon TUHAN, Hatallan keton jari mampalombah tanah keton kilau je injanji Awie akan tato keton, tuntang hapus lewu je jari inenga akan keton,

⁹Ikau musti mintih telo lewu eka bakalindong tinai. (Lewu te kareh inenga akan keton amon keton malalus taloh samandiai je irentah akan keton andau toh, tuntang amon keton sinta TUHAN, Hatallan keton palus belom tumon ajare.)

¹⁰Lalus jete mangat keton ela badosa awi manalua oloh je dia sala impatei intu lewu je inenga TUHAN, Hatallan keton akan keton.”

¹¹“Tapi beken tinai amon ije biti oloh mimpa musohe tuntang tantai ihat hayak kasingie mampatei ie, palus hadari akan ije bara lewu eka bakalindong akan mandino kalindong.

¹²Hong hal te kare pamimpin hong lewu mantehau oloh te palus manyarahe akan oloh bara keluarga je puna akan mambaleh pampatei te, mangat ie tau impatei.

¹³Ela masi ie. Keleh mambebas Israel bara pamuno te, mangat keton sanang.”

¹⁴ “Amon keton jari sampai intu lewu je inenga TUHAN, Hatallan keton akan keton, ela manindar toros helat petak watas oloh silan eka keton je inukas keton hong jaman horan.”

¹⁵ “Ije biti saksi dia sukup akan mansanan ije biti oloh je buah dawa te sala; paling dia due biti saksi imerlu akan taloh te.

¹⁶Amon ije biti oloh handak mampanjato oloh beken dengan dawa je dia toto intu eka pengadilan, maka

¹⁷kadadue musti haguet akan eka sombayang je inukas TUHAN mangat imutus awi kare imam tuntang hakim je kanjerae malalus gawie.

¹⁸Kare hakim patut manantuani perkara te titi-titip. Amon oloh te puna jari manampa dawa je sala akan sama arepe oloh Israel,

¹⁹ie musti buah hukum je inintu akan musohe te. Hapan cara te keton mampalingis kapapa te.

²⁰Uras oloh kareh mahining tahiu taloh te palus mikeh, sampai jaton tinai je mawi taloh je kalote kapapae.

²¹ Ela masi huang kare perkara macam te. Hukumae iete: Tahaseng ganti tahaseng, mate ganti mate, kasinge ganti kasinge, lenge ganti lenge tuntang pai ganti pai.”