Read Ngaju DEUTERONOMIUM 2 Bible Online

DEUTERONOMIUM 2 - Ngaju bible

DEUTERONOMIUM 2

¹ Kajariae itah haluli akan padang pasir mahalau jalan je manintu Telok Akaba, kilau je irentah TUHAN. Tapi itah manamuei intu daerah habukit Edom.

²Palus TUHAN hamauh dengangku

³jari sukop katahie itah manamuei intu tanah te. Awi te itah haguet akan utara.

⁴ Limbah te TUHAN manyoho aku manenga kare tirok toh akan keton, ‘Dia tahi tinai keton akan tame lewun oloh Edom, daerah kare paharin keton, turonan Esau. Ewen akan mikeh dengan keton.

⁵Tapi keton dia tau manyarang ewen, awi bara petak ewen isut mahin jaton Aku handak manengae akan keton, awi tanah Edom jari inenga-Ku akan turonan Esau.

⁶Keton tau mamili taloh kinan tuntang taloh ihop bara ewen.’

⁷Keleh mingat, kilen ampie TUHAN, Hatallan keton jari mamberkat keton huang kakare taloh je ilalus keton. Ie mahaga keton katahin keton manamuei intu padang pasir je lombah toh. Ie mangalindong keton katahin epat puluh nyelo toh tuntang manenga kakare taloh je imerlu keton.

⁸Limbah te itah palus mananjong, malihi jalan je mahoroi lewu Elat tuntang Esion-Geber manintu Tasik Matei, palus mambelok akan timor laut manintu padang pasir Moab.

⁹ TUHAN hamauh dengangku, ‘Oloh Moab te turonan Lot dia tau keton manggoleie. Ela kea manyarang ewen. Lewu Ar jari inenga-Ku akan ewen tuntang bara petak ewen isut mahin dia Aku manengae akan keton!’ ” (

¹⁰Bihin Ar ielai awi oloh Emim. Ewen hai bitie, sama dengan oloh Enak, bangsa raksasa kea.

¹¹Kilau oloh Enak, ewen inyewut oloh Repaim. Tapi oloh Moab manggare ewen oloh Emim.

¹²Bihin oloh Hori melai intu Edom, tapi iharak tuntang impalomos awi turonan Esau, je limbah te manguasa tanah ewen; kalote kea bangsa Israel rahian andau maharak kare musohe bara tanah je inenga TUHAN akan ewen.)

¹³“Limbah te itah dimpah Sungei Sered kilau je irentah TUHAN akan itah.

¹⁴ Jete manjadi telo puluh hanya nyelo limbah itah malihi Kades-Barnea. Uras prajurit bara angkatan jete jari matei kilau je insanan TUHAN.

¹⁵TUHAN raju-rajur malawan ewen sampai kajariae ewen uras binasa.

¹⁶Limbah ewen uras binasa,

¹⁷TUHAN hamauh dengan itah,

¹⁸‘Andau toh keton mahalau tanah Moab, mahalau Lewu Ar.

¹⁹ Palus keton sampai tokep tanah oloh Amon, turonan Lot. Ela manggulei atawa manyarang ewen, awi bara tanah je inenga-Ku akan ewen, isut mahin jaton je kareh inenga-Ku akan keton.’ ” (

²⁰Daerah te kea basewut kilau lewu Repaim, aran bangsa je helo melai intu hete; awi oloh Amon ewen inyewut oloh Samsumim.

²¹Kilau oloh Enak, ewen kea hai bitie. Ewen abas toto, tuntang jumlah bitie are. Tapi TUHAN mambinasa ewen, sampai oloh Amon marampas tanah te tuntang melai hete.

²²Kalote kea ilalus TUHAN akan oloh Edom, turonan Esau, je melai daerah habukit Edom. TUHAN mambinasa oloh Hori, sampai oloh Edom marampas tanah te tuntang manguasae, palus manetep intu hete sampai toh.

²³Salepah daerah saran Tasik Bentok inguasa kare oloh pulau Kreta. Ewen jari mambinasa oloh Awi, oloh asal intu tanah te, palus manguasa tanah te sampai akan salatan tikas lewu Gasa.)

²⁴“Limbah te itah mahalau tanah Moab. TUHAN hamauh dengan itah, ‘Toh keleh lius dimpah Sungei Arnon. Aku akan manyarah akan keton Sihon, raja Amori je marentah intu Hesbon, haya-hayak dengan lewue. Sarang ie, palus nguasa tanahe.

²⁵Nampara andau toh Aku mawi keton ingikeh kare bangsa intu kueh bewei. Genep bitie akan hagenjeh mikeh amon mahining tahiu keton.’ ”

²⁶“Limbah te aku mangirim pire-pire sarohan bara padang pasir Kedemot akan Raja Sihon bara Hesbon uka manyampai usul kadamai toh:

²⁷‘Soho ikei mahalau lewun tuangku. Ikei akan mananjong tarus hayak dia mahiwang bara jalan hai.

²⁸Ikei mambayar panginan ikei tuntang danum je ihop ikei. Ikei baya perlu mahalau lewu toh,

²⁹sampai ikei dimpah Sungei Yordan dan mangat tame lewu je inenga TUHAN, Hatallan ikei akan ikei. Turonan Esau je melai intu Edom tuntang oloh Moab je melai intu Ar kea jari manyoho ikei mahalau tanah ewen.’

³⁰Tapi Raja Sihon dia manyoho ikei mahalau tanahe te. TUHAN, Hatallan keton mawi ie badungil tuntang bahanyi mangat itah tau mampakalah ie. Tanahe magon inguasa itah sampai toh.

³¹Limbah te TUHAN hamauh dengangku, ‘Raja Sihon tuntang lewue inyarah-Ku akan keton; duan tuntang nguasa lewu te.’

³²Palus dumah Sihon dengan hapus pasukae uka manyarang itah tokep lewu Yahas.

³³TUHAN, Hatallan itah manyarah ie akan itah, palus itah mampakalah ie dengan kare anake tuntang hapus tantarae.

³⁴Metoh te kea itah marampas tuntang mampahancor genep lewu tuntang mampatei lepah oloh lewu, hatue, bawi, tuntang anak oloh. Jaton ije je inalua belom!

³⁵Meto ain ewen induan itah tuntang kare lewue irampas itah.

³⁶Dengan pandohop TUHAN, Hatallan itah, itah tau marampas uras lewu te, nampara bara Aroër, intu Janah Arnon, tuntang lewu intu bentok janah te, sampai akan tanah Gilead. Jaton ati lewu je dindinge pahalau dehen akan itah.

³⁷Tapi itah dia manokep tanah oloh Amon atawa saran Sungei Yabok atawa kare lewu intu daerah habukit atawa eka beken intu kueh bewei je ingahana TUHAN, Hatallan itah.”