Read Ngaju DEUTERONOMIUM 20 Bible Online

DEUTERONOMIUM 20 - Ngaju bible

DEUTERONOMIUM 20

¹“Amon keton haguet parang malawan kare musoh keton, ela mikeh mite kareta parang tuntang kudan ewen je are dengan tantara ain ewen je jumlahe labih bara jumlah keton. TUHAN, Hatallan keton je mambebas keton bara Misir, kareh mandohop keton.

²Helo bara parang nampara, ije biti imam patut miar akan hila baun tuntang hakotak dengan keton kalotoh,

³‘Kare pahari, hining! Hong andau toh keton maju parang. Ela mikeh atawa tarewen atawa nihau tirok itong.

⁴TUHAN, Hatallan keton kareh omba mandohop keton. Ie kareh manenga kamanang akan keton.’

⁵Limbah te kare pangkalima musti manyampai kare auh toh akan keton. ‘En aton intu marak keton oloh je harue mamangun huma, tapi hindai mawi pesta maresmie? Amon aton ie tau buli. Awi amon ie matei huang parang, oloh beken kareh melai humae.

⁶En aton intu marak keton je harue mimbul kabun anggore tuntang hindai sampet mamutik kare bua anggore? Amon aton ie tau buli. Awi amon ie matei huang parang, oloh beken kareh mangkeme danum anggore.

⁷En aton intu marak keton oloh je aton mingkes tunangan tuntang hindai kawin? Amon aton ie tau buli. Awi amon ie matei huang parang, oloh beken kareh kawin dengan tunangae te.’

⁸Kare pangkalima kea patut mansanan jetoh akan keton, ‘En aton bara marak keton je gugup atawa mikeh? Amon aton ie tau buli, mangat ie ela mawi kagogop akan oloh beken.’

⁹Limbah kare pangkalima hakotak dengan tantara, musti inunjuk kare pamimpin akan genep baris pasukan.

¹⁰Amon keton haguet uka manyarang ije lewu, nenga helo katika akan oloh lewu te uka manyarah.

¹¹Amon ewen muap kare lawang tuntang manyarah, uras ewen akan jadi jipen keton tuntang malalus gawi je imaksa akan keton.

¹²Tapi amon oloh lewu te dia maku manyarah tuntang labih rajin parang, keton balalu mangapong lewu te.

¹³Limbah te, amon TUHAN, Hatallan keton manyoho keton marampas lewu te, keton musti mampatei lepah oloh lewu te je hatue.

¹⁴Tapi keton tau manduan kare oloh bawi, anak oloh, meto tuntang kare taloh en bewei je aton intu lewu te. Uras panatau kare musoh keton te tau keton hapae. TUHAN, Hatallan keton manyarah jete akan keton.

¹⁵Kalote keton mawie dengan kare lewu je kejau bara lewu eka keton melai.

¹⁶Tapi amon lewu te aton intu huang tanah je inenga TUHAN, Hatallan keton akan keton, lepah oloh lewu te uras impatei.

¹⁷Kilau je irentah TUHAN, Hatallan keton, keton musti mambinasa kare oloh Het, Amori, Kanaan, Peris, Hewi tuntang Yebusi!

¹⁸Patei ewen, mangat ewen dia mawi keton badosa intu TUHAN, Hatallan keton awie majar keton malalus kare gawin kajilek dengan kare hatallan ewen.

¹⁹Amon keton mamarang ije lewu tuntang mangaponge tahi katikae, ela maneweng batang bua intu hete. Kinan buae tapi ela marusak batange awi kare batange te dia musoh keton.

²⁰Kare batang kayu je beken tau ineneweng akan inampa karambang hapa mangapong sampai lewu te manjato.”