Read Ngaju DEUTERONOMIUM 21 Bible Online

DEUTERONOMIUM 21 - Ngaju bible

DEUTERONOMIUM 21

¹“Amon intu lewu je inenga TUHAN, Hatallan keton akan keton aton oloh je matei intu tana tuntang dia ingatawan eweh je mampateie,

²maka pamimpin keton tuntang hakim haguet maukur kakejaue bara eka hantu te inyondau akan genep lewu je hakatokep.

³Balalu kare oloh hai bara lewu je paling tokep mintih ije kongan sapi tabela je hindai puji ihapan bagawi.

⁴Sapi te imbit akan ije eka tokep sungei je dia puji teah tuntang petake hindai puji iluku atawa iimbul. Intu hete ewen mamelek uyat meto te.

⁵Kare imam Lewi kea musti haguet akan hete, awi ewen je mamutus genep perkara je lembut tagal gawin kakaras. Ewen iintih TUHAN, Hatallan keton uka manempo Ie tuntang manyewut berkat hapan aran Aie.

⁶Palus uras bakas lewu bara lewu je paling tokep menyau lengen ewen intu hunjun sapi te;

⁷ewen hamauh, ‘Dia ikei je mampatei oloh te, ikei dia katawan eweh je mawie.

⁸TUHAN, ampun Israel ungkup Ayum je imbebas Awim bara Misir. Ampun ikei tuntang ela manyangka ikei je mananggong kajarian perkara pampatei oloh je dia sala.’

⁹Maka awi malalus taloh je ilaku TUHAN, keton dia itong mananggong kajarian pampatei te.”

¹⁰“Amon keton parang tuntang TUHAN, Hatallan keton manenga kamanang, palus keton manduan tawanan parang,

¹¹eweh tawae bara marak ewen tau aton ije biti oloh bawi bahalap je eka karajim tuntang handak induam jari sawam.

¹²Imbit oloh bawi te akan humam. Intu hete ie balalu manggunting balaue,[20] manetek siloe,

¹³tuntang mangganti pakaian. Ie melai humam tuntang manatum tagal pampatei oloh bakase katahin ije bulan. Limbah te ikau tau kawin dengae.

¹⁴Amon rahian andau ikau terai huangm dengae tinai, ikau tau manyoho ie haguet akan kueh kahandake. Ikau dia tau mawi ie kilau jipen atawa injualm, awi ie jari imaksam hinje dengam.”

¹⁵“Paribasae ije biti oloh je aton due sawae, kadaduee manak anak hatue, tapi anak je inakan labih helo dia ie anak bara sawae je eka huange.

¹⁶Amon oloh te handak manukas kilen ampie ie kareh mambagi panataue akan kare anake, ie dia tau omba hila anak bara sawae je eka huange balalu manenga akan anak te bagi je jari manjadi hak anak bakas.

¹⁷Ie musti manenga due lipet bara bagin panataue akan anak hatue je bakas, aloh anak te dia bara sawae je eka huange. Hak anak bakas musti ingaku awi bapae, tuntang akan anak te inenga warisan je jadi hak ayue manumon atoran.”

¹⁸“Paribasae aton anak hatue je batekang ateie, rajin malawan tuntang dia maku manumon auh oloh bakase aloh ewen jari mahukum ie.

¹⁹Oloh bakase musti mimbit ie akan kare bakas lewu eka ewen melai tuntang balaku anak te imutus.

²⁰Ewen hamauh akan kare bakas lewu te, ‘Anak ikei toh batekang ateie, rajin mambarontak tuntang dia maku manumon kare auh ikei; ie panganan duit tuntang pambusau.’

²¹Palus kare oloh hatue bara lewu te musti mamedak anak te hapan batu sampai matei. Tumon te keton manganan kapapa te. Uras oloh Israel kareh mahining tahiu kajarian taloh te tuntang mikeh.”

²²“Amon ije biti oloh jari ihukum matei awi ije gawie je papa, tuntang hantue ingkoak intu tihang,

²³ hantu te dia tau inalua intu hete sampai hapus alem, tapi ingubur andau te kea. Hantu je ingkoak intu tihang mawi sapan Hatalla akan lewu te. Tagal te, keleh mangubur hantu te mangat keton dia mamapa lewu je inenga TUHAN, Hatallan keton akan keton.