Read Ngaju DEUTERONOMIUM 22 Bible Online

DEUTERONOMIUM 22 - Ngaju bible

DEUTERONOMIUM 22

¹ Amon sapi atawa tabiri ayun oloh je sama-sama bangsa keton layang tuntang keton mite meto te, ela kilau dia katawan, tapi imbit meto te haluli akan tempoe.

²Amon tempoe kejau humae, atawa keton dia katawan eweh tempoe, imbit meto te akan human keton. Amon tempoe dumah manggaue, julok akae.

³Lalus kalote kea amon keton sondau ije kongan kalidai, ije kalambar pakaian, atawa en bewei ayun oloh je sama-sama bangsa keton.

⁴Amon ije kongan kalidai atawa sapi ayun oloh je sama-sama bangsa keton halelek intu jalan, ela kilau dia katawan, tapi dohop ie mampendeng meto te tinai.

⁵Oloh bawi dia tau hapakaian kilau oloh hatue tuntang oloh hatue dia tau hapakaian kilau oloh bawi, awi oloh je kalote gawie eka kajilek TUHAN, Hatallan keton.

⁶Amon keton sondau ije sarangan burong intu batang kayu atawa intu petak dengan indue kanjerae mahukop tantelohe atawa haya-hayak dengan kare anake, ela manduan indue te.

⁷Ikau tau manduan kare anak burong te, tapi nauhe indue tarawang, mangat keton panjang umur tuntang belom sanang.

⁸Amon keton mamangun huma, keton musti mampendeng pagar hakaliling saran sapaue. Ikau dia batanggong jawab amon aton oloh manjato bara sapau te palus matei.

⁹ Ela mimbul taloh imbul je beken intu kabon anggor keton kacuali batang anggor. Amon keton mimbule kea, keton dia tau manduan hasil kabon te, aloh bara anggor, atawa taloh imbul je beken te.

¹⁰Ela mambambai ije kongan sapi tuntang ije kongan kalidai intu ije luku.

¹¹Ela mahapan pakaian je inampa bara wol tuntang lena hong ije benang.

¹² Keleh nampa parewei intu kaepat puting pakaian keton.”

¹³“Jaka ije biti oloh hatue kawin dengan ije biti oloh bawi, tapi limbah te dia handak tinai dengae.

¹⁴Ie manampa dawa je dia toto awi ie manyewut je sawae jadi dia bujang metoh ewen kawin.

¹⁵Indu bapa oloh bawi te musti manduan benang panganten je aton awan dahae, je mamparahan bukti je anake te magon bujang. Benang te balalu imparahan ewen akan kare oloh bakas lewu intu eka basara.

¹⁶Bapa oloh bawi te balalu hamauh dengan ewen, ‘Aku jari manyarah anakku akan oloh toh jadi sawae, tapi toh ie dia handak tinai dengae.

¹⁷Ie mawi dawa je dia toto je mansanan sawae jadi dia bujang metoh ewen kawin. Tapi toh tandae je anakku metoh te magon bujang. Ite awan dahae hong benang pangantee toh!’

¹⁸Palus kare oloh bakas lewu mantehau oloh hatue te tuntang mamukul ie.

¹⁹Ewen kea mandanda ie saratus duit perak tuntang manyarah duit te akan empoe, awi ie jari mamapa aran ije biti bawin oloh Israel. Tinai oloh bawi te tetep jadi sawae, tuntang dia tau inolang saumur belom.

²⁰Tapi amon dawa te toto tuntang jaton tandae je sawae te magon bujang metoh kawin,

²¹oloh bawi te imbit akan baun human oloh bakase. Intu eka te kare oloh hatue bara lewu te mamedake hapan batu sampai matei. Oloh bawi te jari malalus taloh je mampahawen bangsa itah awi hinje helo bara kawin metoh ie magon melai intu human bapae. Tagal awi mahukum ie keton mampalingis kapapa te.

²²Amon ije biti oloh hatue tarasondau kanjerae hinje dengan sawan oloh beken, kadaduee musti ihukum matei. Tumon te keton manganan kapapa te.

²³Jaka intu huang lewu ije biti oloh hatue tarasondau kanjerae hinje dengan ije biti oloh bawi je jari batonangan dengan oloh beken.

²⁴Ewen musti imbit akan luar lewu tuntang imedak hapan batu sampai matei. Oloh bawi te impatei awi ie dia mangkariak balaku dohop, padahal taloh te manjadi intu huang lewu, eka kariake tarahining. Oloh hatue te palus impatei awi ie hinje dengan oloh bawi je jari batonangan. Tagal awi mahukum kadaduee, keton mampalingis kapapa te.

²⁵Tapi beken pakarae amon intu tana ije biti oloh hatue hinje dengan oloh bawi je jari batonangan dengan oloh beken. Baya je hatuee bewei je ihukum matei.

²⁶Oloh bawi te dia tau buah taloh en-en awi ie dia mawi taloh je patut ihukum matei. Perkarae te kilau pakaran oloh je manyarang oloh beken balalu mampateie.

²⁷Karayap te manjadi intu tana; aloh oloh bawi te mangkariak balaku dohop, tapi jaton oloh je dumah mandohop ie.

²⁸ Jaka ije biti oloh hatue tarasondau kanjeran marayap ije biti oloh bawi je hindai batonangan.

²⁹Ie mambayar akan bapa oloh bawi te lime puluh duit perak. Oloh bawi te musti jadi sawae awi ie imaksa hinje. Saumur belom ie dia tau inolang.

³⁰ Jaton ije biti oloh je tau manawah bapae awi hinje dengan ije bara sawan bapae.”