Read Ngaju DEUTERONOMIUM 23 Bible Online

DEUTERONOMIUM 23 - Ngaju bible

DEUTERONOMIUM 23

¹“Oloh je jari imboto atawa je jari inetek latake dia tau jadi oloh ungkup TUHAN.

²Anak sarau tuntang uras turonae sampai je kasapuluh dia tau jadi oloh ungkup ain TUHAN.

³ Oloh Amon tuntang Moab dengan turonan ewen sampai je kasapuluh dia tau jadi oloh ungkup TUHAN,

⁴ awi ewen dia maku manenga akan keton panginan tuntang danum metoh keton hong jalanan balua bara Misir. Tinai ewen mupah Bileam, anak Beor bara lewu Petor hong Mesopotamia, uka manyapa keton.

⁵ Tapi TUHAN, Hatallan keton dia maku mahining auh Bileam. Malengkan Ie mobah sapa te jadi berkat, awi Ie sinta keton.

⁶Katahin keton belom sampai katatahie, ela mandohop kare bangsa te atawa mampamangat ewen.

⁷Ela mitong randah oloh Edom, awi ewen te paharim. Ela kea mitong randah oloh Misir, awi keton puji melai intu lewun ewen.

⁸Nampara bara angkatan je katelo tuntang palus turonan je rahian ewen tau jadi oloh ungkup TUHAN.”

⁹“Metoh keton kanjeran parang, keton patut mahakan taloh handiai je mawi keton papa.

¹⁰Amon ije biti oloh manjadi papa awi balua kihae metoh batiroh, ie balua malihi kare kemah tuntang melai intu luar.

¹¹Tokep halemei ie patut mandoi tuntang metoh matanandau belep ie tau buli.

¹²Keton musti manyadia jamban intu luar kare kemah.

¹³Amon handak akan hete, imbit kea ije katetek kayu hapan mangali rumbak eka mamani tuntang hapan mangawoke.

¹⁴TUHAN, Hatallan keton aton dengan keton intu huang kare kemah keton uka mangalindong keton tuntang manenga kamanang akan keton taharep kare musoh keton. Tagal te haga mangat kare kemahm tetep barasih. Ela sampai tarasondau taloh je dia sanonoh intu marak keton, uka TUHAN ela malihi keton.”

¹⁵“Amon ije biti jipen hadari bara tempoe manalih keton balaku kalindong, ela manyoho ie buli.

¹⁶Ie tau melai intu ije bara lewun keton tumon paintihe; keton dia tau marentah ie hapan kakaras.

¹⁷ Ije biti oloh Israel, aloh hatue atawa bawi, dia tau jadi lontei intu kare human dewa eka manyembah.

¹⁸Kea duit je dinon bara hasil malontei dia tau imbit akan Human TUHAN, Hatallan keton hapa mambayar janji, awi TUHAN, Hatallan keton manyingi kare lontei intu kare human dewa tuntang upah malontei.

¹⁹ Amon keton mahanjaman duit akan oloh bangsa beken, keton tau balaku anak duit. Tapi amon keton mahanjaman duit atawa panginan atawa ramo beken akan oloh sama-sama bangsa keton, je ihanjaman te jaton anak duite. Keleh manunom parentah te, maka TUHAN, Hatallan keton mamberkat taloh handiai je iawi keton intu lewu je inguasa keton.

²¹ Amon keton manjanji taloh en-en akan TUHAN, Hatallan keton ela laya malalus janji te, awi TUHAN, Hatallan keton, tetep balakue; keton badosa amon dia malaluse.

²²Ikau dia badosa amon dia mawi janji akan TUHAN.

²³Tapi amon keton dengan kahias mawi janji dengan TUHAN, Hatallan keton, keton musti malalause.

²⁴Amon keton kanjeran mananjong mahalau kabon anggor oloh beken, keton tau kuman bua anggor sapire kanahuang keton, tapi dia tau manampunae tame huang balasai.

²⁵Amon keton kanjeran mananjong mahalau tanan oloh beken, keton tau kuman gandom je imutik keton hapan lenge, tapi dia tau manggeteme.”