Read Ngaju DEUTERONOMIUM 24 Bible Online

DEUTERONOMIUM 24 - Ngaju bible

DEUTERONOMIUM 24

¹ “Jaka ije biti oloh hatue kawin dengan ije biti oloh bawi, palus limbah te jaton kahandake tinai awi ie sondau taloh je mampahawen intu ie.[21] Palus oloh hatue te manenga surat talak akae tuntang mausir ie bara humae.

²Limbah te oloh bawi te kawin dengan oloh hatue beken.

³Tapi limbah pire-pire katahie oloh hatue te dia rajin tinai dengae, palus manenga surat talak akae tuntang mausir ie. Atawa tau kea banae je kadue te matei.

⁴Hong due kajarian te, banae je solake dia tau kawin dengan oloh bawi te tinai; ie musti maanggap jete kilau oloh bawi je jari buah kapapa. Amon ie kawin kea, gawi te manawah TUHAN, Hatallan keton. Ikau dia tau malalus dosa kalote kapapae intu lewu je inenga TUHAN akan keton.”

⁵“Ije biti oloh hatue je harun kawin dia tau inyoho tame tantara tuntang tolak baparang atawa malalus tugas umum je beken. Ie musti imbebas tugas katahin ije nyelo uka nantuani huma seroke tuntang manyanang atei sawae.[22]

⁶Amon keton mahanjaman taloh en-en akan oloh beken, ela manduan halo je hapan oloh te tempe gandome. Awim manduan halo te keton marampas taloh hapan kaluargae manontong pambalome.

⁷ Oloh je manculik oloh sama bangsae, palus mawi ie kilau jipen atawa manjuale, musti ihukum matei. Tumon te keton manganan kapapa te.

⁸ Amon aton panyakit kulit je bakaike-ikeh ampie, lalus titi-titip taloh je irentah imam Lewi akan keton; numon kare atoh je inengaku akan ewen.

⁹ Ingat taloh je ilalus TUHAN, Hatallan keton dengan Miryam hong jalanan keton bara Misir.

¹⁰ Amon keton mahanjaman taloh en-en akan sama arep keton, ela tame akan huang humae uka manduan bajue je iawi jadi sanda.

¹¹Entai intu luar tuntang nalua ie kabuat mimbit akan keton.

¹²Amon oloh te belom susah, baju te dia tau inahan hapus alem,

¹³tapi musti ilian akae genep alem, mangat tau ihapae metoh batiroh. Ie kareh manarima kasih tuntang TUHAN, Hatallan keton kareh mangilak keton.

¹⁴ Ela mahenyek oloh upahan je belom susah tuntang barakatapas, aloh oloh sama bangsam, atawa oloh bangsa beken je melai intu ije bara lewum.

¹⁵Genep andau sahindai mantanandau belep keton musti mambayar upahe akan gawi andau te; ie maharap duit te awi ie memerlue. Amon keton dia mambayar upahe, ie kareh mangkariak intu TUHAN balaku dohop tagal ampim, tuntang keton inukas badosa.

¹⁶ Ela mahukum matei oloh bakas awi kapapa je iawi anake, ela mahukum matei anak awi kapapa je ilalus oloh bakase. Genep oloh baya tau ihukum matei awi kapapa je iawie kabuat.

¹⁷ Ela marampas hak oloh bangsa beken tuntang anak nule; ela kea manduan pakaian ije biti balo akan sanda.

¹⁸Ingat je keton puji jari jipen intu Misir tuntang imbebas TUHAN, Hatallan keton jete bukue aku manenga atoran toh akan keton.

¹⁹ Amon keton manampunan hasil petakm, ela haluli manduan peteng gandom je tapalihi. Gandom te musti inalua akan oloh bangsa beken, anak nule tuntang kare balo, mangat keton imberkat awi TUHAN, Hatallan keton intu kare gawim.

²⁰Limbah keton sinde mamutik bua saitun tuntang bua anggorm, ela haluli manampunan kare bua je tapalihi. Jete musti inaluam akan oloh bangsa beken anak nule, tuntang kare balo.

²²Ingat je keton puji jadi jipen intu Misir, jete bukue aku manenga atoran toh akan keton.