Read Ngaju DEUTERONOMIUM 26 Bible Online

DEUTERONOMIUM 26 - Ngaju bible

DEUTERONOMIUM 26

¹“Amon keton jari tame akan lewu je inenga TUHAN, Hatallan keton akan keton tuntang jari melai intu hete,

² maka hasil je solake bara uras taloh je inampunam bara petakm inamean akan ije kusak, palus imbitm akan eka je intih TUHAN, Hatallan keton.

³Lius akan imam je malalus gawi metoh te tuntang sanan akae, ‘Aku mansanan akan TUHAN, Hatallam je aku jari tame akan tanah je injanjie dengan tato hiang itah uka inenga akan itah.’

⁴Imam kareh manduan kusak te bara lengem tuntang mandake intu hila baun mesbeh TUHAN, Hatallan keton.

⁵Limbah te intu taharep TUHAN, Hatallan keton, keton mangotak kare auh toh: ‘O TUHAN, tato hiangku oloh Aram je namuei. Je mimbit keluargae akan Misir uka melai intu hete kilau oloh bangsa beken. Metoh haguet akan hete jumlah ewen isut bewei, tapi ewen jadi bangsa je hai tuntang abas.

⁶Oloh Misir karas mawi ikei tuntang mamaksa ikei bagawi kilau jipen.

⁷Palus ikei mangkariak balaku awat dengan TUHAN, Hatallan tato hiang ikei. Ikau mahining kariak ikei tuntang mite kapehe, kasusah tuntang kajaken ikei.

⁸Hapan kuasa tuntang kaabas je hai ikau mambebas ikei bara Misir. Ikau mawi kare taloh heran hayak mampalembut kare taloh je manarewen musoh.

⁹Limbah te Ikau mimbit ikei akan hetoh tuntang manenga tanah je tatau hayak basiwoh toh akan ikei.

¹⁰Tagal te, O TUHAN, aku manenga intu hetoh hasil je solake bara petak je inenga Awim akangku.’ Palus andak kusak te intu taharep TUHAN, Hatallan keton tuntang sembah Ie.

¹¹Keleh manarimakasih tagal kare rajaki je jari inenga TUHAN, Hatallan keton akan keton tuntang keluarga keton. Imbit oloh Lewi tuntang oloh bangsa beken je melai intu marak keton omba pesta te.

¹² Genep nyelo je katelo keton musti maluput parapah sapersapuluh, iete sapersapuluh bara hasil petak keton akan imam Lewi, oloh bangsa beken, anak nole tuntang balo, sampai intu hong genep lewun keton ewen mandino panginan je imerlu ewen.

¹³Amon jari, sanan akan TUHAN, Hatallan keton, ‘Bara sapersapuluh hasil petak je inenga akam, TUHAN, isut mahin dia je tapalihi intu humangku; uras jari inengaku akan oloh Lewi, oloh bangsa beken, anak nule tuntang balo, sama kilau je irentah TUHAN, Hatallangku, akangku. Bara parentah TUHAN tahiu parapah sapersapuluh jaton ije ilanggarku.

¹⁴Bara parapah te isut mahin jaton je kinangku metoh aku maharago oloh matei, atawa iimbitku balua huma metoh aku magon papa, atawa inengaku kilau sarongan panginan akan oloh matei. Aku jari manumon auh Aim o TUHAN; uras taloh je irentah Awim jari ilalusku.

¹⁵Bara eka Aim je barasih hong sorga keleh Ikau manampayah tuntang mamberkat ungkupku Israel; berkat tanah je tatau tuntang basiwoh je jari inenga Awim akan ikei tumon je injanji Awim akan tato hiang ikei.’ ”

¹⁶“Andau toh TUHAN, Hatallan keton marentah keton uka malalus kare parentah te. Lalus urase dengan baketep tuntang hapan salepah kaabasm.

¹⁷Andau toh keton mangaku TUHAN keton kilau Hatallan keton. Ikau hajanji manempo Ie tuntang malalus kare atoran Ayue tuntang parentah Aie.

¹⁸ Andau toh TUHAN manarima keton kilau ungkup Ayue kabuat, sama kilau je injanji Awie akan keton; Ie marentah keton uka malalus uras parentah Aie.

¹⁹TUHAN kareh mawi keton labih hai bara kakare bangsa beken je jari inampa Awie, tuntang keton kareh inara hayak ihormat.[23] Keton jadi ungkup TUHAN, Hatallan keton sama kilau je injanji Awie.”