Read Ngaju DEUTERONOMIUM 27 Bible Online

DEUTERONOMIUM 27 - Ngaju bible

DEUTERONOMIUM 27

¹Limbah te hayak kare pamimpin oloh Israel, Moses manyampai parentah toh akan bangsa te, “Keleh manumon uras kare parentah je inenga akan keton andau toh.

² Hong andau keton dimpah Sungei Yordan mangat tame akan lewu je inenga TUHAN, Hatallan keton akan keton, keton mampendeng pire-pire batu hai palus mangapure.

³Keleh manyurat intu kare batu te genep bawak kotak bara kare atoran toh. Amon keton tame akan lewu je tatau tuntang basiwoh je injanji TUHAN, Hatallan tato hiang keton akan keton,

⁴tuntang keton jari aton intu dipah Sungei Yordan, keton balalu haguet akan Bukit Ebal. Intu hete keton mampendeng tuntang mangapur kare batu te kilau je irentahku akan keton andau toh.

⁵ Intu eka te keton mampendeng akan TUHAN, Hatallan keton ije mesbeh bara kare batu je hindai puji imahat mahapan kare pakakas sanaman,

⁶awi genep mesbeh je impendeng akan TUHAN, Hatallan keton inampa bara batu budas. Intu hunjun mesbeh te keton maluput kare parapah je ingehu.

⁷Keleh maluput kea parapah hapa badamai tuntang keleh kuman intu hete hayak hanjak rantang intu taharep TUHAN, Hatallan keton.

⁸Intu kare batu je ingapur te inyurat batantu-tantu tuntang tarang ampie genep bawak kotak bara parentah Hatalla.”

⁹Limbah te haya-hayak dengan kare imam Lewi, Moses hakotak dengan hapus bangsa Israel, “Pahari handiai, keleh nantuani tuntang hining! Andau toh keton jari manjadi ungkup TUHAN, Hatallan keton.

¹⁰Tagal te keleh manumon kare auh TUHAN, Hatallan keton tuntang lalus uras kare parentah Ayue je inengaku akan keton andau toh.”

¹¹Palus Moses hamauh dengan bangsa Israel,

¹² “Limbah keton dimpah Sungei Yordan, suku Simeon, Lewi, Yuda, Isaskhar, Yosep tuntang Benyamin mendeng intu hunjun Bukit Gerisim katika manyewut berkat akan bangsa toh.

¹³Metoh sapa inyewut, suku Ruben, Gad, Aser, Sebulon, Dan tuntang Naptali balalu mendeng intu hunjun Bukit Ebal.

¹⁴Kare oloh Lewi palus manyewut kare auh toh hapan hai auhe tuntang oloh Israel balalu tombah, ‘Amen.’

¹⁵ Kare oloh Lewi: ‘Tarasapa oloh je manampa hampatong bara batu, kayu atawa logam, tuntang manyembah jete benye-benyem; TUHAN manyingi oloh je manyembah dewa!’ Hapus rayat: ‘Amen!’

¹⁶ ‘Tarasapa oloh je dia mahormat oloh bakase tuntang manalua ewen susah.’ ‘Amen!’

¹⁷ ‘Tarasapa kare oloh je manindar toros helat petak oloh silae.’ ‘Amen!’

¹⁸ ‘Tarasapa oloh je mampalayang oloh babute.’ ‘Amen!’

¹⁹ ‘Tarasapa oloh je marampas hak oloh bangsa beken, anak nule tuntang balo.’ ‘Amen!’

²⁰ ‘Tarasapa oloh je manawah bapae awi hinje dengan ije bara sawan bapae.’ ‘Amen!’

²¹ ‘Tarasapa oloh je hinje dengan meto!’ ‘Amen!’

²² ‘Tarasapa oloh je hinje dengan paharie bawi ije kalambutan, atawa paharie ije bapae atawa dengan paharie ije indu.’ ‘Amen!’

²³ ‘Tarasapa oloh je hinje dengan empoe je bawi.’ ‘Amen!’

²⁴‘Tarasapa oloh je mampatei oloh suni-suni.’ ‘Amen!’

²⁵‘Tarasapa oloh je manarima suap, uka mampatei oloh je jaton kasalae.’ ‘Amen!’

²⁶ ‘Tarasapa oloh je dia manggenep parentah tuntang auh ajar Hatalla tuntang dia malaluse dengan gawie.’ ‘Amen!’ ”