Read Ngaju DEUTERONOMIUM 28 Bible Online

DEUTERONOMIUM 28 - Ngaju bible

DEUTERONOMIUM 28

¹ “Amon keton manumon auh TUHAN, Hatallan keton tuntang beketep malalus uras kare parentah je inengaku akan keton andau toh, ie kareh mawi keton jadi bangsa je paling basewut hong kalunen.

²“Keleh manumon auh TUHAN, Hatallan keton, maka uras berkat toh kareh inengaku akan keton:

³Keleh imberkat kare lewu tuntang kare tanan keton.

⁴Keleh imberkat keton, sampai anak keton are bitie, hasil petak keton malabien tuntang sapi dengan kambing tabirin keton jumlahe are toto.

⁵Keleh imberkat getem gandom tuntang panginan je inampa keton bara gandom te.

⁶Keleh imberkat kare gawin satiar keton.

⁷Amon keton inyarang, TUHAN kareh mampakalah musoh keton. Ewen kareh manyarang mahoroi ije jalan, tapi limbah te hadari kasaburan.

⁸TUHAN, Hatallan keton kareh mamberkat gawin satiar tuntang manyuang kare gudang keton hapan gandom. Ie kareh mamberkat keton intu lewu je inenga Awie akan keton.

⁹Amon keton manumon auh TUHAN, Hatallan keton tuntang malalus uras kare parentah Aie, keton kareh Awie jadi ungkup Ayue kabuat, sama kilau je injanji Awie.

¹⁰Uras bangsa hong kalunen kareh mite keton puna bangsa je iintih TUHAN, tuntang ewen kareh mahomat keton.

¹¹Keton kareh inenga are anak. Meto ain keton kareh are tuntang hasil petak keton malabien intu lewu je injanji TUHAN akan tato hiang keton uka inenga akan keton.

¹²TUHAN kareh manenga ujan intu wayahe bara eka Ie mingkese je malabien intu langit. Ie kareh mamberkat kakare gawin keton, sampai keton tau mahanjaman akan are bangsa, tapi keton kabuat dia usah minjam.

¹³TUHAN, Hatallan keton kareh manjadian keton jadi pamimpin intu marak kare bangsa, tuntang dia mamenda ewen. Amon keton baketep manumon uras kare parentah TUHAN je inengaku akan keton andau toh, keton kareh sasar miar sanang tuntang dia puji mundur.

¹⁴Tapi ela samasinde malihi kare parentah te dengan cara en bewei. Ela kea manara tuntang manempo kare hatalla beken.”

¹⁵“Tapi amon keton dia manumon auh TUHAN, Hatallan keton, tuntang dia baketep malalus uras kare parentah Ayue dengan atoran Aie je inengaku akan keton andau toh, maka uras sapa toh kareh buah keton:

¹⁶Tarasapa kare lewu tuntang tanan keton.

¹⁷Tarasapa getem gandom tuntang panginan je inampa keton bara gandom te.

¹⁸Tarasapa keton, sampai kareh anak keton mahin isut bitie, kalote kea kare hasil petak, dengan sapi tuntang kambing tabirin keton.

¹⁹Tarasapa uras kare gawin satiarm.

²⁰Amon keton mawi kapapa tuntang mangabele TUHAN, Ie kareh mawi calaka, kanyanyau tuntang kapehe hong uras kare gawi je ilalus keton, sampai hong katika je pandak bewei keton imbinasa samasinde.

²¹Panyakit ganti gilir kareh buah keton, sampai kajariae ije mahin jaton bara keton je magon melai intu lewu je inguasa keton te.

²²TUHAN kareh mahukum keton mahapan kare panyakit je murah jakit, kakembang tuntang darem. Ie kareh mawi kakeang tuntang riwut je mangehu sampai hasil taloh imbul rusak. Kare calaka te palus buah keton sampai keton binasa.

²³Ujan mahin jaton tuntang petak keton palus batekang kilau sanaman.

²⁴TUHAN kareh dia mawi ujan danum malengkan mawi ujan kawo tuntang karangan sampai keton lepah binasa.

²⁵Amon keton dia manumon auh TUHAN, Hatallan keton, Ie kareh mawi keton impakalah kare musoh keton. Keton kareh manyarang musoh mahoroi ije jalan tapi limbah te hadari kasabuaran. Uras bangsa hong kalunen kareh mangkarieng mite kasial keton.

²⁶Amon keton matei hantun keton jadi panginan kare burong tuntang meto basiak; jaton je maharak kare meto te.

²⁷TUHAN kareh mahukum keton dengan kare baluyong sama kilau je iawi dengan oloh Misir. Bitin keton kareh kontep buhit tuntang kerai je bagatel, tapi jaton tatambae.

²⁸TUHAN kareh mawi keton jadi gila, babute tuntang dia tau bapikir.

²⁹Handa-handau keton gaya-gayap kilau oloh babute, tapi dia olih sondau jalan. Uras gawin keton kareh dia mandino hasil. Ikau raju-rajur ihenyek tuntang irampok, tuntang jaton je mandohop keton.

³⁰Amon keton dia manumon auh TUHAN, Hatallan keton, kare taloh toh kareh buah keton: keton kareh malamar oloh bawi, tapi oloh beken je kawin dengae. Keton kareh mamangun huma tapi dia keton melaie. Keton kareh mangabon anggor tapi dia kuman kare buae.

³¹Sapin keton kareh inyambalih intu taharep baun keton, tapi keton dia kuman isie. Kare kalidai keton kareh induan oloh, tapi keton baya nanturee tuntang dia akan ilian. Kare tabiri ain keton kareh inenga akan kare musoh keton tuntang jaton oloh je mawat keton.

³²Intu taharep baun keton kare anak keton inenga jadi jipen akan oloh bangsa beken. Genep andau matan keton kareh bakarah manggau kare anak keton, tapi gawin keton hayang bewei, awi ewen dia akan haluli.

³³Bangsa oloh beken kareh manduan uras hasil petak je dinon keton hapan gawi babehat, tapi keton kabuat dia mandino taloh en-en beken bara buah henyek raju-rajur hapan katulas.

³⁴Keton kareh gila awi kare taloh je ingkeme keton.

³⁵TUHAN kareh mawi pain keton kontep buhit je mangapehe tuntang dia tau keleh, bara pai sampai hunjun takolok keton kareh kontep awi kare baluyong.

³⁶Keton dengan rajan keton kareh iunda TUHAN akan lewun bangsa je dia keton kasenee tuntang dia kea ingasene awi tato hiang keton. Intu hete kareh keton menempo kare hatalla je inampa bara kayu tuntang batu.

³⁷Intu kare lewu eka TUHAN mawi keton kasaburan, kare oloh kareh mangkarieng mite keton; keton kareh ihalalea tuntang inatawe ewen.

³⁸Are binyi je inawor keton, tapi isut hasil je dinon keton, awi taloh imbul lepah kinan sangkalap.

³⁹Keton kareh mangabon anggor tuntang mahagae, tapi jaton mamutik buae atawa mihop danume, awi kare batang anggor te lepah kinan uret.

⁴⁰Intu hapus lewun keton tumbo batang saitun, tapi kare buae kareh lepah baduroh, sampai keton dia dinon unduse.

⁴¹Keton kareh mandino kare anak hatue tuntang bawi, tapi ewen induan jadi tawanan parang, sampai keton jaton tempon anak tinai.

⁴²Uras batang taloh imbul keton lepah kinan sangkalap.

⁴³Oloh bangsa beken je melai intu lewun keton kareh sasar hai kuasae, tapi kuasan keton kabuat sasar kurang.

⁴⁴Ain ewen aton duit je tau inhanjamae akan keton, tapi keton jaton taloh en-en indu ihanjaman akan ewen. Kajariae keton penda kuasan ewen.

⁴⁵Uras calaka te kareh buah keton tuntang harajur manderoh keton sampai keton binasa awi keton dia manumon auh TUHAN, Hatallan keton tuntang dia malalus kare atoran je inenga Awie akan keton.

⁴⁶Kare calaka te jadi tanda akan kare hukuman TUHAN je buah keton tuntang turonan keton palus katatahie.

⁴⁷Keton jari imberkat TUHAN, Hatallan keton hong taloh samandiai, tapi keton dia maku manempo Ie hapan kahias atei tuntang hapan kahanjak.

⁴⁸Tagal te keton musti manempo kare musoh keton je inyoho TUHAN uka malawan keton. Keton kareh paham balau, teah belai tuntang halowai hayak barakatapas hong kare taloh handiai. TUHAN akan[24] mahenyek keton hapan katulase sampai keton binasa.

⁴⁹Ije bangsa je dia keton harati basae kareh inyoho TUHAN bara saran petak uka malawan keton. Sama kilau burong nasar ewen kareh manyambar keton.

⁵⁰Ewen tulas hayak jaton asie dengan kare oloh bakas atawa anak oloh.

⁵¹Ewen kareh mampalepah meto tuntang hasil petak keton. Ewen dia mampelai akan keton gandom, danum anggor, undus saitun, sapi atawa kambing tabiri sampai keton matei balau.

⁵²Ewen kareh manyarang genep lewu hong tanah je inenga TUHAN akan keton sampai kare dindinge je gantong tuntang indehen je impataman keton te baduroh.

⁵³Metoh kare musoh keton mangapong kare lewun keton, keton kareh nihau kaharap awi lau, sampai keton kuman kare anak keton kabuat, kare anak je inenga TUHAN, Hatallan keton akan keton.

⁵⁴Tinai oloh bangsawan je pangkahalap hadate kareh nihau kaharape katahin buah kapong, sampai ie kuman anake kabuat awi jaton panginan beken. Isut mahin dia je inengae akan paharie atawa sawae je inyintae atawa kare anake je magon belom.

⁵⁵

⁵⁶ Tinai bawin oloh bangsawan je pangkahalap hadate tuntang paham tatau sampai dia puji mananjong pai, kareh mawi kalote kea. Metoh musoh mangapong lewu, oloh bawi te nihau kaharape awi lau, sampai ie dengan suni-suni kuman anake je harue inakan dengan tabunie. Isut mahin dia ie manenga akan banae je inyintae atawa akan kare anake.

⁵⁷

⁵⁸Amon keton dia baketep manumon uras atoran TUHAN, Hatallan keton je tarasurat intu buku toh tuntang dia mahormat TUHAN, Hatallan keton je hai tuntang je bakahera-heran.

⁵⁹TUHAN kareh mampalembut akan keton tuntang turonan keton kare panyakit je dia tau impakeleh tuntang kare panyakit je manjakit je dia tau impatende.

⁶⁰Kare panyakit je mangkarieng je gitam intu Misir kareh buah keton, tuntang keton dia tau keleh.

⁶¹TUHAN kea kareh mawi kare macam panyakit tuntang panyakit je manjakit je dia inyewut hong buku toh, buku atoran TUHAN. Palus keton kareh imbinasa.

⁶²Aloh jumlah keton jari are sama kilau bintang intu langit, baya isut bewei bara marak keton je magon belom, awi keton dia manumon auh TUHAN, Hatallan keton.

⁶³Sama kilau TUHAN sanang manenga kamangat akan keton tuntang mandahang jumlah keton, ie kareh sanang mambinasa tuntang mampalomos keton. Ie kareh manjawut keton bara tanah je dia tahi tinai inguasa awi keton.

⁶⁴TUHAN kareh manaburan keton intu marak kare bangsa intu hapus kalunen. Intu hete keton manyembah kare hatalla je inampa bara kayu tuntang batu, kare hatalla je dia ingasene keton tuntang dia kea ingasene awi tato hiang keton.

⁶⁵Intu marak kare bangsa te keton dia kareh sondau kamangat. Jaton eka je tau inyewut ayun keton. TUHAN kareh mawi keton paham meles tuntang jaton kaharap.

⁶⁶Pambelom keton kareh harajur akan buah bahaya. Handau hamalem keton mangkarieng tuntang mikeh matei.

⁶⁷Metoh mite en bewei usok keton ruga-rugap awi mikeh. Katika hanjewu keton maharap andau bagulong hamalem tuntang amon hamalem keton maharap andau bagulong hanjewu.

⁶⁸TUHAN kareh manyoho keton haluli akan Misir hapan kapal, aloh Ie[25] jari hamauh keton dia baka haluli akan hete. Intu hete keton kareh handak manjual arep keton kilau jipen akan musoh keton, tapi ije mahin jaton je maku mamili keton.”