Read Ngaju DEUTERONOMIUM 29 Bible Online

DEUTERONOMIUM 29 - Ngaju bible

DEUTERONOMIUM 29

¹Jetoh kare auh janji je manumon parentah TUHAN inampa awi Moses dengan bangsa Israel metoh ewen aton intu tanah Moab. Dan janji te kilau pandahang akan janji je iawi TUHAN dengan ewen intu Bukit Sinai.

²Moses manyoho uras oloh Israel hapumpong palus hamauh dengan ewen, “Keton jari mite kabuat taloh je iawi TUHAN dengan raja Misir, kare pagawaie tuntang hapus lewue.

³Keton kea jari mite kareh calaka je paham, kare taloh heran je ilalus TUHAN.

⁴Tapi sampai andau toh Ie hindai mawi keton tau harati uras kare taloh je ingkeme keton te.

⁵Epat puluh nyelo katahie TUHAN mamimpin keton mahalau padang pasir, tapi pakaian tuntang sarompah keton dia tau kupit.

⁶Keton jaton mingkes rote akan panginan, danum anggor atawa taloh ihop bahari, tapi TUHAN manenga uras taloh je imerlu keton mangat keton katawan je ie te TUHAN, Hatallan keton.

⁷ Tuntang katika itah sampai intu eka toh, raja Sihon bara Hesbon tuntang raja Og bara Basan dumah mamarang itah. Tapi itah mampakalah ewen.

⁸ Tanah ewen irampas itah tuntang imbagi itah akan suku Ruben, Gad tuntang belah suku Manase.

⁹Maka keleh keton baketep manumon uras janji toh, mangat keton dinon hasil huang kare gawin keton.

¹⁰Andau toh keton uras mendeng intu taharep TUHAN, Hatallan keton, uras kapala suku, oloh hai, pangkalima, uras oloh hatue,

¹¹oloh bawi, anak oloh tuntang uras oloh bangsa beken je melai intu marak keton tuntang mandohop keton manetek kayu tuntang meton danum.

¹²TUHAN, Hatallan keton mawi janji dengan keton tuntang kakare keton je hapumpong intu hetoh uka mampendeng janji te hayak manarima kare taloh je patut ilalus Awie.

¹³Mahapan janji te TUHAN andau toh mandehen keton jadi bangsa Ayue, tuntang Ie jadi Hatallan keton kilau je injanji Awie akan keton tuntang akan tato hiang keton Abraham, Isaak tuntang Yakob.

¹⁴Janji te dengan kare taloh je patut ilalus inampa TUHAN dia baya dengan keton bewei,

¹⁵tapi dengan genep biti je andau toh mendeng intu hetoh, intu taharep TUHAN, Hatallan itah, tuntang kea dengan turonan itah jeha.”

¹⁶“Keton magon mingat kilen ampie kajarian itah intu Misir tuntang kilen ampie itah haguet mahalau lewun kare bangsa oloh beken.

¹⁷Keton jari mite kare hampatong dewan ewen je bakajile-jilek bara kayu, batu, perak tuntang amas.

¹⁸ Awi te haga, ije mahin ela bara keton, hatue atawa bawi, keluarga atawa suku je mendeng intu hetoh, mules manalikut TUHAN, Hatallan itah balalu manyembah kare hatallan bangsa beken. Gawi te sama kilau uhat je belom jadi oru bapait tuntang bawisa.

¹⁹Intu marak keton je mahining palaku je karas te, ela aton je manirok tahiu kajarian kare taloh tetep bahalap, aloh ie selang mahoroi jalae kabuat. Taloh te kareh mambinasa keton samandiai, kare oloh je papa atawa je bahalap.

²⁰TUHAN kareh dia mampun oloh kalote. Malengkan Ie kareh buah kalait TUHAN je mamulak, tuntang uras calaka je tarasurat huang buku toh kareh buah ie, sampai ie imbinasa TUHAN.

²¹TUHAN kareh mawi ie jadi sonto akan uras suku Israel. TUHAN mahukum ie dengan sapa je inyewut huang janji je inyurat intu buku toh, buku parentah TUHAN.

²²Hong rahian andau, turonan keton tuntang oloh bangsa beken bara lewu je kejau kareh mite kare calaka tuntang kapehe je iawi TUHAN akan lewun keton.

²³ Kare tanan keton kareh jadi padang pasir je benyem inutup awi barirang tuntang uyah. Petake te dia tau eka mimbul taloh tuntang oru dia maku belom intu hete. Lewun keton kareh kilau kare lewu Sodom tuntang Gomora, Adma tuntang Seboim je impalomos TUHAN metoh kasangit Aie hagandang.

²⁴Hapus kalunen palus misek, ‘Mbuhen TUHAN mawi kalote dengan lewun ewen? Narai bukue Ie sangit kalote kapahame?’

²⁵Tuntang panombahe iete, ‘Awi ewen marisang bara janjin TUHAN, Hatallan tato hiang ewen; janji je inampa Awie dengan ewen metoh Ie mimbit ewen balua bara Misir.

²⁶Ewen manempo kare hatalla beken je dia ewen kasenee, padahal TUHAN mangahana ewen manyembah kare hatalla beken te.

²⁷Jete bukue TUHAN sangit dengan ungkup Ayue tuntang mawi kare calaka je tarasurat hong buku toh buah lewun ewen.

²⁸Kasangit TUHAN je paham toto, tuntang huang kasangit Aie je paham Ie manjawut bangsa Israel bara tanah ewen tuntang manjakahe akan lewun bangsa beken sampai ewen aton intu hete.’

²⁹Aton pire-pire taloh je iilim awi TUHAN, Hatallan itah; tapi parentah Aie te jari imprahan Awie akan itah; itah dengan turonan itah patut belom manumon auh te sampai katatahie.”