Read Ngaju DEUTERONOMIUM 3 Bible Online

DEUTERONOMIUM 3 - Ngaju bible

DEUTERONOMIUM 3

¹“Limbah te itah harikas akan utara manintu tanah Basan. Og raja Basan miar dengan hapus tantarae uka mamarang itah tokep lewu Edrei.

²Tapi TUHAN hamauh dengangku, ‘Ela mikeh dengae, Moses, Aku akan manyarah ie, tantarae tuntang hapus tanahe akan keton. Awi ie kilau je jari ilalusm akan Sihon raja Amori je marentah intu Hesbon.’

³Palus TUHAN, Hatallan itah manyarah kea raja Og dengan rayate akan itah, tuntang itah mampakalah lepah kare ewen te.

⁴Metoh te itah marabut uras lewue, jaton ije je tapalihi. Urase aton jahawen puluh lewu je irabut itah intu hapus tanah Argob, je irentah Raja Og bara Basan.

⁵Uras kare lewu te indehen dengan kare dinding batu je gantong, kare lawang dengan huit akan matep kare lawang te. Beken bara jete aton tinai are lewu beken je dia badinding.

⁶Uras lewu te impahancor awi itah, tinai uras oloh hatuee, bawie tuntang kare anak olohe impatei itah, kilau je iawi itah dengan kare lewun Raja Sihon bara Hesbon.

⁷Meto ain ewen induan itah tuntang kare lewue te irampok itah.

⁸Metoh te itah manduan bara due-due raja Amori te tanah intu hila timor Sungei Yordan tuntang Sungei Arnon sampai akan Bukit Gantong Hermon. (

⁹Bukit Gantong Hermon inyewut Siryon awi oloh Sidon tuntang Senir awi oloh Amori).

¹⁰Itah manduan hapus tanah raja Og bara Basan: kare lewue intu janah, tanah Gilead tuntang Basan, palus akan timor tikas lewu Salka tuntang Edrei.” (

¹¹Raja Og iete oloh Repaim je pangkalepahe. Patin hantue[2] inampa bara batu,[3] panjange epat meter tuntang kalombahe tokep due meter manumon ukuran je inukas. Sampai toh magon tau inampayah intu Raba, lewun oloh Amon).

¹²“Limbah itah manjadi tempon petak te, aku manenga akan suku Ruben tuntang Gad tanah hila utara lewu Aroër tokep Sungei Arnon, tuntang belahe daerah habukit Gilead, dengan kare lewue.

¹³Akan saparo suku Manase inengaku tisan tanah Gilead, tinai tanah Basan je puji inguasa awi raja Og, iete hapus tanah Argob,” (Basan basewut kilau tanah oloh Repaim.

¹⁴Yair bara suku Manase manduan hapus tanah Argop, iete bara Basan sampai helat Gesur tuntang Maakha. Ie manggare kare kampung te manumon arae kabuat, tuntang sampai toh magon basewut kilau kare kampung Yair).

¹⁵“Daerah Gilead inengaku akan jalahan Makhir bara suku Manase.

¹⁶Tinai akan kare suku Ruben tuntang Gad inengaku tanah helat Gilead dengan Sungei Arnon. Bentok sungei te indu helat ewen intu hila salatan, intu utara ewen hinje helat dengan Sungei Yabok, je belahe kilau helat lewun oloh Amon.

¹⁷Intu barat, tanah ewen hambirang sampai akan Sungei Yordan, bara danau Galilea intu utara sampai Tasik Matei intu hila salatan, palus sampai pain Bukit Pisga intu hila timor.

¹⁸ Metoh te aku manenga akan ewen parentah toh: TUHAN, Hatallan keton manenga daerah hila timor Sungei Yordan akan eka keton melai. Tapi kare tentara ain keton musti mahapan pakakas parang tuntang dimpah Sungei Yordan mananselo kare suku Israel je beken.

¹⁹Baya anak sawan keton tuntang meto ain keton je are tau melai intu kare lewu je jari inegaku akan keton.

²⁰Keleh mandohop kare oloh je ije kabangsa dengan keton sampai ewen manguasa tanah je inenga TUHAN, Hatallan keton akan ewen intu silan hila barat Sungei Yordan, kilau je iawie akan keton intu hetoh. Harue limbah te keton tau haluli akan tanah ayun keton je jari inengaku akan keton.

²¹Balalu aku hamauh dengan Yosua: Ikau jari mite uras taloh je iawi TUHAN, Hatallan keton akan Sihon tuntang Og, due-due raja te. Kalote kea ie akan mawi genep raja je tanahe irampas awi keton.

²²Ela mikeh dengan ewen, awi TUHAN, Hatallan keton kareh kalahi akan keton.”

²³ “Metoh te aku balaku intu TUHAN:

²⁴O TUHAN Pangkahai, aku katawan je inunjok Awim akangku toh harue tamparan bara kare gawin Aim je hai tuntang heran. Jaton Hatalla beken intu langit atawa intu petak je kilau Ikau je tau malalus kare taloh je hai.

²⁵Soho aku dimpah Sungei Yordan, O TUHAN, mangat mite lewu je basiwoh intu dipah, daerah habukit je bahalap tuntang petak habukit Libanon.

²⁶Tapi keton jari mambuku TUHAN sangit dengangku sampai ie dia tau manarima palakungku. Katambalike TUHAN hamauh, ‘Jadi ih, Moses, ela ikau manyewut taloh te tinai!

²⁷Keleh lius akan tantan Bukit Pisga hayak tampayah akan tantan utara tuntang salatan, akan timor tuntang akan barat. Tampayah titip-titip taloh je gitam te, awi ikau dia akan dimpah Sungei Yordan.

²⁸Keleh manenga petunjuk akan Yosua. Keleh mananggar ateie, awi ie kareh mamimpin bangsa te je akan dimpah uka manguasa lewu je gitam te.’

²⁹Palus itah melai intu tanah dipah lewu Bet-Peor.”