Read Ngaju DEUTERONOMIUM 30 Bible Online

DEUTERONOMIUM 30 - Ngaju bible

DEUTERONOMIUM 30

¹“Toh keton tau mintih bara berkat tuntang sapa kilau je inarangku akan keton. Amon keton jari mangkeme uras kare kapehe te tuntang belom hong marak kare bangsa beken eka keton inaburan awi TUHAN, Hatallan keton, keton kareh taraingat akan paintih je inengaku akan keton.

²Amon keton tuntang turonan keton nahuang haluli akan TUHAN, Hatallan keton, tuntang dengan salepah atei manumon kare parentah Ayue je inengaku akan keton andau toh,

³maka TUHAN, Hatallan keton kareh masi keton. Keton kareh iimbit Awie haluli bara kare bangsa eka keton inaburan, palus iawi jadi sanang mangat haluli.

⁴Aloh keton kasaburan akan hete-hete hong hapus kalunen, TUHAN, Hatallan keton kareh mamumpong keton tuntang mimbit keton haluli.

⁵Palus keton tau tinai mingkes petak je bihin ielai tato hiang keton. Tuntang keton akan iawi labih sanang mangat, tuntang jumlah keton kejau kalabien karee bara jumlah tato hiang keton.

⁶Keton tuntang turonan keton kareh inenga atei je panumon, sampai keton sinta TUHAN, Hatallan keton dengan salepah atei keton tuntang tau harajur melai intu lewu te.

⁷Uras kare sapa kareh buah musoh keton je manyingi tuntang mahenyek keton.

⁸Keton kareh haluli manumon auh TUHAN tuntang malalus kakare parentah Aie je inengaku akan keton andau toh.

⁹TUHAN, Hatallan keton kareh mawi uras gawin keton mandino hasil; keton kareh tempon are anak tuntang are meto; kare tanan keton kareh dinon hasil je malabien. TUHAN dengan sanang atei mawi keton belom jaton bara katapas, kilau Ie kea sanang manenga pambelom je jaton bara katapas akan tato hiang keton.

¹⁰Tapi keton musti manumon auh TUHAN, Hatallan keton tuntang manumon kare atoran Ayue je inyurat intu huang buku toh, buku parentah TUHAN. Keton musti haluli manempo Ie hapan salepah atei keton.

¹¹Parentah je inengaku akan keton dia lalau bahali akan keton tuntang dia kea lalau kejau.

¹² Ekae dia intu langit, sampai keton misek, ‘Eweh kareh mandai akan hete uka manduae akan itah, mangat itah tau mahining tuntang manumon?’

¹³Ekae dia intu dipah tasik, sampai keton misek, ‘Eweh je haguet akan dipah tasik uka manduae akan itah mangat itah tau mahininge tuntang manumoe?’

¹⁴Ela misek kalote, awi parentah te tokep toto dengan keton. Keton jari katawan tuntang manyewute bahapal, jadi je hindai baya malaluse ih.

¹⁵Andau toh keton tau mintih, en mintih je bahalap atawa je papa, mintih belom atawa mintih matei.

¹⁶Andau toh aku marentah keton uka sinta TUHAN, Hatallan keton. Keleh manumon auh Aie balalu malalus uras kare atoran tuntang parentah Ayue mangat keton belom dia bara katapas tuntang jadi bangsa je hai. TUHAN, Hatallan keton kareh mamberkat keton intu lewu je dia tahi tinai inguasa awi keton.

¹⁷Tapi amon keton dia manumon tuntang dia maku mahining, tuntang manalua arep keton impalayang uka manyembah kare hatalla beken,

¹⁸batantu keton imbinasa; umur keton kareh dia panjang intu lewu je dia tahi tinai inguasa keton, ingat! Taloh te jari insanangku akan keton andau toh.

¹⁹Toh keton tau mintih, en handak belom atawa matei, en handak berkat TUHAN atawa sapan Ayue. Langit tuntang petak intehauku jadi saksi akan tukas keton. Keleh mintih belom.

²⁰ Keleh sinta TUHAN, Hatallan keton, keleh manumon auh Aie, tuntang keleh baketep Dengae. Palus keton tuntang turonan keton kareh belom tuntang panjang umur intu lewu je injanji TUHAN akan tato hiang keton, Abraham, Isaak tuntang Yakob.”