Read Ngaju DEUTERONOMIUM 31 Bible Online

DEUTERONOMIUM 31 - Ngaju bible

DEUTERONOMIUM 31

¹Moses hakotak tinai dengan bangsa Israel,

² koae, “Toh umurku jari saratus due puluh nyelo tuntang aku dia olih tinai jari pamimpin keton. Beken bara te TUHAN jari hamauh tahiu aku je dia tau dimpah Sungei Yordan.

³TUHAN, Hatallan keton kabuat kareh mananjong intu hila baun keton tuntang mambinasa kare bangsa je melai hete, sampai keton tau manguasa tanah ewen. Yosua kareh jadi pamimpin keton, kilau je insanan TUHAN.

⁴ TUHAN kareh mambinasa kare bangsa te, kilau Ie mampakalah Sihon tuntang Og, rajan oloh Amori, hayak mampahancor lewun ewen.

⁵TUHAN kareh manenga akan keton kamanang malawan ewen, palus keton mawi ewen puna sama kilau je insanangku akan keton.

⁶Keleh atei keton segah tuntang bahanyi! Ela mikeh dengan ewen, awi TUHAN, Hatallan keton kabuat kareh mandohop keton. Ie kareh dia mampahawen atawa malihi keton.”

⁷Palus Moses mantehau Yosua, tuntang intu taharep hapus bangsa Israel ie hakotak dengae, “Keleh keton segah atei tuntang bahanyi, Yosua! Ikau kareh mamimpin bangsa toh mangat manguasa lewu je injanji TUHAN dengan tato hiang ewen.

⁸ TUHAN kareh mangagalan tuntang mandohop keton. Ie dia mampahawen atawa malihi keton. Tagal te ela mikeh atawa meles.”

⁹Palus Moses manyurat parentah TUHAN, Hatalla tuntang manenga akan kare oloh Lewi je inyoho manantuani Patin Janji, tuntang akan kare pamimpin oloh Israel.

¹⁰ Ie marentah ewen, “Hong lawin genep nyelo kauju, hong nyelo kabebas utang pesta Tingkap Dawen,

¹¹keton musti mambasa kare parentah toh dengan auh hai akan kare oloh Israel je dumah manyembah TUHAN, Hatallan keton intu eka je intih Awie.

¹²Keleh manyoho uras oloh hatue, bawi tuntang anak oloh dengan oloh bangsa beken je melai intu kare lewun keton hapumpong mangat mahining auh je imbasa te. Mangat ewen bajar mahormat TUHAN, Hatallan keton tuntang baketep manumon kare parentah Aie.

¹³Dengan cara te kare anak keton je dia puji mahining tahiu parentah TUHAN, Hatallan keton tau mahininge tuntang bajar mahormat TUHAN katahin ewen belom intu lewu je dia tahi tinai inguasa awi keton hong dipah Sungei Yordan te.”

¹⁴Limbah te TUHAN hamauh dengan Moses, “Pambelom ayum dia tahi hindai. Tagal te tehau Yosua tuntang imbit ie akan Kemah-Ku, mangat Aku tau manenga kare atoh akae.” Palus Moses tuntang Yosua haguet manalih Kemah TUHAN.

¹⁵TUHAN mamparahan Arepe akan ewen huang butop baunandau tokep bauntonggang Kemah.

¹⁶Koan TUHAN dengan Moses, “Pampateim jari tokep. Limbah pangguetm, bangsa Israel dia baketep tinai dengang-Ku tuntang mungkir janji je iawi-Ku dengan ewen. Ewen kareh malihi Aku balalu manyembah kare hatalla je inyembah intu lewu je dia tahi tinai ewen tamee.

¹⁷Amon jete manjadi, kasangit-Ku kareh mamulak dengan ewen. Ewen kareh ilihi-Ku tuntang imbinasa-Ku. Are calaka hai kareh buah ewen, palus ewen kareh katawan je uras kare taloh te manjadi tagal Aku, Hatallan ewen, je dia tinai hinje ewen.

¹⁸Metoh te Aku dia nahuang mawat ewen, awi ewen jari manyembah kare hatalla beken tuntang mawi kapapa.

¹⁹Toh nyurat nyanyi jetoh tuntang ajar akan bangsa Israel kilau saksi akan ewen.

²⁰Ewen kareh iimbit-Ku akan lewu tatau tuntang basiwoh, sama kilau je injanji-Ku akan tato hiang ewen. Intu hete ewen kareh belom sanang tuntang mandino uras panginan je imerlu ewen. Tapi limbah te ewen kareh mules tuntang manyembah kare hatalla beken. Ewen kareh manolak Aku tuntang mungkir dengan janjing-Ku,

²¹tuntang are calaka hai kareh buah ewen. Tapi nyanyi toh kareh tetep inyanyi tuntang hapan kilau saksi akan ewen. Tinai toh, sahelo bara Aku mimbit ewen akan lewu je injanji-Ku, Aku katawan ampin tirok ewen.”

²²Andau te kea Moses manyurat nyanyi te, palus manyarah akan bangsa Israel.

²³ Limbah te TUHAN hamauh dengan Yosua, anak Nun, koae, “Keleh ikau tanggar atei tuntang bahanyi Yosua! Ikau kareh mamimpin bangsa Israel tame lewu je injanji-Ku akan ewen, tuntang Aku kareh mandohop keton.”

²⁴Palus Moses manyurat Parentah Hatalla hong ije buku. Ie manyurate titi-titip bara tamparae sampai kahapuse.

²⁵Katika surat jari hapus, ie hamauh dengan kare imam Lewi je inyoho manantuani Patin Janji,

²⁶“Duan buku parentah TUHAN toh tuntang ingkes intu balikat Patin Janjin TUHAN, Hatallan keton, mangat tetep intu hete kilau saksi akan bangsa te.

²⁷Aku katawan ewen paham batekang ateie tuntang rajin mambarontak taharep TUHAN balalu malawan. Metoh aku magon belom ewen mahin jadi mambarontak taharep TUHAN hayak malawan TUHAN; mahi-mahi tinai kareh, limbah aku jari matei!

²⁸Toh mumpong kare pamimpin bangsa toh tuntang kare pangkalima hapumpong intu taharepku, mangat aku tau manyampai kare taloh toh akan ewen. Langit tuntang petak intehauku kilau saksi akan ewen.

²⁹Aku katawan amon limbah aku jari matei, kare oloh te kareh palus papa tuntang mangabele taloh je jari iajarku akan ewen. Tuntang kareh ewen akan buah calaka, awi ewen mawi TUHAN sangit tagal ewen malalus taloh je ingahanae.”

³⁰Limbah te Moses manyewut nyanyi toh sampai lepah tuntang ihining awi hapus bangsa Israel.