Read Ngaju DEUTERONOMIUM 32 Bible Online

DEUTERONOMIUM 32 - Ngaju bible

DEUTERONOMIUM 32

¹“Hining, o langit, aku handak hakotak; o petak seneh!

²Keleh ajarku mohon kilau ujan, tuntang kare kotakku mahantis kilau ambon, kilau ujan rinti-rintik intu hujun oru, tuntang ujan labat intu hunjun pambolan.

³Aku kareh manara aran TUHAN. Keleh mangabar kahain Hatallan itah.

⁴TUHAN pandohop je gagah gawie tinduh, tuntang kare jalae uras adil. Hatallan keton baketep, dia aton katulas intu Ie, Ie malalus taloh je bahalap tuntang bujur.

⁵Tapi keton toh bangsa je dia baketep, tuntang dia patut tinai jadi ungkup Ayue, bangsa je kontep pikire tuntang dosa.

⁶En kalote keton mambaleh kahalap TUHAN, o kare oloh humong je jaton bara akal? En dia bapam, je manjapa ikau, je manjadian keton ije bangsa?

⁷Ingat jaman horan, nantuani jaman kare angkatan je halau. Isek oloh bakasm, mangat ewen mansanan akan keton.

⁸ Metoh Je Pangkahai mambagi petak, genep bangsa inukas tanahe dengan ije hatalla kilau panguasa.

⁹Tapi turonan Yakob toh intih TUHAN Akae kabuat.

¹⁰Ie sondau ewen metoh namuei hong eka je benyem intu parak kayu. Palus Ie mangalindong tuntang mahaga ewen, tuntang manjaga ewen kilau Ayue.

¹¹Kilau burong antang je majar anake tarawang manyingkap palapase je hambirang hayak mumahe intu hunjun palapase,

¹²kalote TUHAN kabuat mamimpin ungkup Ayue, jaton hatalla beken je mampahayak ie.

¹³Ie mawi ewen manguasa kare bukit gantong; ewen kuman hasil kare tanae tuntang mihop mado baliar bara bukit batu. Ewen mandino undus bara batang saitun je tumbo intu petak je habatu.

¹⁴Sapi tuntang tabirin ewen mahasil are susu; meto ain ewen je pangkahalape, gandom tuntang danum anggor ewen pangkahalape.

¹⁵Ungkup TUHAN palus tatau, tapi rajin malawan, ewen basepu-seput, besoh kuman. Palus ewen malihi Hatalla, je manjapa ewen tuntang manolak panyalamate je gagah.

¹⁶Ewen manyembah hampatong, sampai TUHAN mangabeho, kasangite lembut awi kapapa te.

¹⁷ Ewen maluput parapah akan kare roh papa je dia Hatalla, akan kare hatalla je dia ewen kasenee, kare hatalla taheta je dia ingikeh tato hiang ewen.

¹⁸Ewen dia paduli Panyalamat ewen je gagah, ngalapean Hatallan ewen je manenga pambelom.

¹⁹Mite taloh te TUHAN palus sangit, tuntang dia manarima kare anak Ayue.

²⁰Koae, ‘Aku dia maku mawat ewen tinai; nauhe Aku manampayah kilen ampie kajarian ewen. Awi bangsa te badungil tuntang samasinde dia baketep.

²¹ Ewen mawi Aku ngabeho dengan je dia Hatalla, tuntang sangit dengan hampatong dewan ewen. Palus iawi-Ku ungkup-Ku ngabeho dengan je beken bangsa, tuntang sangit dengan bangsa je humong.

²²Kasangit-Ku ganda-gandang kilau apui je mangehu sampai akan eka oloh matei Apui te mangehu kalunen tuntang kare hasile, tuntang kare bukit sampai akan uhate.

²³Harajur aku manpadumah calaka ilekas-Ku uras panah-Ku mawi ewen.

²⁴Ewen kareh matei awi darem tuntang lau, tuntang awi panyakit je bakaike-ikeh. Inalua-Ku ewen inangkarap meto basiak, tuntang inotok handipe tada.

²⁵Parang mimbit pampatei intu kare jalan; taloh je mawi oloh mangkarieng buah kare oloh intu huma. oloh tabela tuntang bawi bujang kareh imbinasa, tinai anak awau tuntang oloh bakas.

²⁶Aku handak mampalilap ewen samasinde, mangat ewen dia iingat tinai.

²⁷Tapi Aku dia maku musoh Isarel hanjak; ela-ela ewen salaya tuntang hamauh je ewen mampakalah ungkup-Ku,’ padahal Aku je mawie.

²⁸Israel ije bangsa je dia bara tirok; pangatawan jaton intu ewen.

²⁹Jaka ewen harati, ewen kareh katawan tuntang manirok kajarian ewen.

³⁰Kilen ampie ije biti oloh tau manggoang oloh sakoyan biti, tuntang due biti oloh mawi oloh sapuluh koyan biti hadari? TUHAN, Hatallan ewen jari manjual ewen; ewen jari ilihi awi Hatalla je gagah.

³¹Musoh Isarel katawan je pangalindong ewen dia sama kilau Hatalla pangalindong Israel.

³²Awi ewen papa sama kilau Sodom tuntang Gomora, sama kilau batang anggor je bapait tuntang baawisa buae.

³³Danum anggor ewen iete wisa handipe tada.

³⁴TUHAN mingat gawin musoh ungkup Ayue tuntang kareh mahukum ewen intu katikae.

³⁵ TUHAN kareh mambaleh tuntang mahukum ewen dia tahi tinai ewen palus binasa; katika kahancor ewen jeleng dumah.

³⁶ TUHAN kareh manyalamat ungkup Ayue tuntang masi kare reware, amon ie mite ewen halelek tuntang jari lepah kaabas.

³⁷Palus TUHAN kareh misek ungkup Ayue, ‘Hong kueh kare hatalla je abas je imparaja keton?’

³⁸Ewen kuman enyak je iluput keton indu parapah, tuntang mihop danum anggor parapah keton. soho ewen dumah mandohop keton, nauh ewen jadi pangalindong keton.

³⁹Item, aku Hatalla je tonggal, jaton Hatalla beken bara Aku. Aku mampatei tuntang mambelom, mampahimang tuntang mampakeleh. Amon Aku mawi, jaton ije biti je olih malawan.

⁴⁰Tagal Aku kabuat, Hatalla je belom, inggatang-Ku lengeng-Ku tuntang sumpah:

⁴¹Aku kareh masa padang-Ku je mangilat, tuntang malalus gawi mahukum. Imbaleh-Ku uras musoh-Ku tuntang ihukum-Ku uras je manyingi Aku.

⁴²Kare panah-Ku kareh halomor dahan ewen; uras je malawan Aku impatei-Ku hapan padang-Ku. Dia inalua-Ku belom eweh bewei je malawan Aku; oloh tawanan tuntang je bahimang matei kea.

⁴³ O kare bangsa, tara ungkup TUHAN, awi TUHAN mahukum uras je mampatei ewen. Ie mambaleh kasingin Aie dengan musoh Ayue tapi mampun dosan ungkup Ayue.”

⁴⁴Moses tuntang Yosua anak Nun manyewut nyanyi te, sampai hapus bangsa Isarel tau mahininge.

⁴⁵Limbah manyampai kare ajar TUHAN akan bangsa Israel,

⁴⁶Moses hamauh, “Keleh manantuani uras parentah je inengaku akan keton andau toh. Ajar akan kare anak keton, mangat ewen dengan baketep malalus kakare parentah TUHAN.

⁴⁷Auh ajar te dia ie kare auh hayang, tapi pambelom keton. Keleh manumon uras perentah te, maka keton panjang umur intu dipah Sungei Yordan.”

⁴⁸ Hong andau te kea TUHAN hamauh dengan Moses,

⁴⁹“Lius akan Bukit Abarim intu tanah Moab intu dipah lewu Yerikho. Palus dai Bukit Nebo tuntang tampayah tanah Kanaan je dia tahi tinai inyarah-Ku akan bangsa Israel.

⁵⁰Ikau kareh matei intu hunjun bukit te, kilau Aron paharim matei intu Bukit Hor.

⁵¹Keton due dia baketep dengang-Ku tuntang dia mahormat Aku intu taharep bangsa Israel metoh keton aton intu tahasak danum Meriba, tokep lewu Kades, intu padang pasir Sin.

⁵²Awi te keton dia tau tame lewu je inenga-Ku akan bangsa Israel; keton baya tau nampayahe bara kejau.”