Read Ngaju DEUTERONOMIUM 33 Bible Online

DEUTERONOMIUM 33 - Ngaju bible

DEUTERONOMIUM 33

¹Helo bara Moses matei, Moses sarohan Hatalla, mamberkat bangsa Israel dengan kare auh toh:

²“TUHAN dumah bara Bukit Sinai; Ie lembut intu hunjun Edom kilau matanandau tuntang bara Bukit Paran Ie manyingah ungkup Ayue. Ie impahayak sapuluh koyan malekat; apui banyala intu hila gantaun Aie.

³Toto, TUHAN masi bangsa Ayue[26] Ie mangalindong uras oloh je Ayue. Keleh itah sontop intu taharep pain Aie tuntang manumon kare parentah Aie.

⁴Parentah je inenga Moses inumon itah, panatau paling barega ain bangsa toh.

⁵Metoh Israel hapumpong dengan kare pamimpie, TUHAN jadi Raja akan ungkup Ayue.”

⁶Tahiu suku Ruben Moses hamauh, “Keleh suku Ruben dia puji binasa, aloh oloe isut bewei.”

⁷Tahiu suku Yuda ie hamauh: “TUHAN, hining kariak Yuda; pahinje ewen haluli dengan bangsae. Keleh parang akan ewen, o TUHAN, dohop ewen taharep musoh.” [27]

⁸ Tahiu suku Lewi ie hamauh: “Dengan Urim tuntang Tumim[28] keton mamparahan kanahuang keton, hajamban oloh Lewi, rewar Aim je baketep. Ikau jari mancoba ewen intu Masa, tuntang hasoal dengan ewen intu tahasak danum Meriba.

⁹Ewen baketep dengam malabien bara taloh handiai, labih bara oloh bakas tuntang tundah pahari. Kare parentah Aim inumon ewen, janjin Aim ilalus ewen.

¹⁰Ewen majar ungkup Ayum manumon uras parentah Aim, tuntang maluput parapah intu mesbeh Aim.

¹¹TUHAN, awat suku toh mangat abas, keleh Ikau marajin kare gawin ewen. Patei uras kare musoh ewen sampai dia tau harikas tinai.”

¹²Tahiu suku Benyamin ie hamauh: “Jetoh suku je inyinta TUHAN. Ie mangalindong ewen handau tuntang hamalem. Tuntang melai intu marak ewen.” [29]

¹³Tahiu turonan Yosep ie hamauh: “Keleh petak ewen imberkat TUHAN dengan ujan, tuntang dengan danum bara penda petak.

¹⁴Keleh genep wayah kontep dengan kare bua kare bua je pangkahalape tuntang masak intu upoe.

¹⁵Keleh kare bukite bara jaman horan kontep dengan hasil petak je pangkahalape.

¹⁶Keleh petake ingontep dengan uras taloh je pangkahalape, tuntang imberkat awi kahalap TUHAN je hakotak bara rowut hanyala. Keleh berkat te mohon akan hunjun turonan Yosep, awi ie pamimpin intu marak kare paharie.

¹⁷Yosep tempon kaabas ain ije kongan banting, tuntang tandok sapi hatue bara parak kayu jete bakoyan Manase tuntang bapuluh koyan Epraim. Kare bangsa inandoke tuntang injujue sampai akan kare saran kalunen.”

¹⁸Tahiu kare suku Sebulon tuntang Isaskhar ie hamauh: “Keleh Sebulon harajur jaton bara katapas awi kare jalanae, tuntang Isaskhar sanang intu kare kemahe.

¹⁹Ewen marawei kare bangsa akan bukit ewen tuntang maluput parapah je toto intu hete. Ewen mandino panatau bara tasik, tuntang bara baras hapus saran tasik.”

²⁰Tahiu suku Gad ie hamauh: “Tara Hatalla je mampalombah tanah Gad. Gad mimpa kilau ije kongan singa handak mamisak penang atawa upak takolok,

²¹Petak je pangkahalape induae akae kabuat, bagin pamimpin inyarah akan ewen. Ewen malalus kare parentahe tuntang atoran TUHAN metoh kare pamimpin Israel hapumpong haya-hayak.” [30]

²²Tahiu suku Dan ie hamauh: “Dan sama kilau ije kongan singa tabela je manangkero balua bara Basan.”

²³Tahiu suku Naptali ie hamauh: “Naptali ingontep dengan berkat tuntang sintan TUHAN, tanahe bara Danau Galilea sampai akan salatan.”

²⁴Tahiu suku Aser ie hamauh: “Aser imberkat malabien bara kare suku beken; keleh ie jadi kasayang kare paharie, tuntang batang saitun belom bajewong intu petake.

²⁵Keleh kare lewue ingalindong dengan kare lawang tambaga tuntang sanaman mangat pambalome harajur jaton buah karido tuntang kalahi.”

²⁶“O Israel! Dia aton Hatalla kilau Hatallan keton Ie mangombang langit dengan kamanang tuntang manembus baunandau akan mandohop keton.

²⁷Hatalla katatahie jari akan mangalindong ikau, penang Aie je katatahie manyangga keton, Ie maharak musoh bara hila baum, tuntang manyoho keton mambinasa ewen.

²⁸Turonan Yakob kareh belom jaton buah karido kalahi intu lewu je kontep gandom tuntang anggore, hayak inanum dengan ambon bara langit.

²⁹Salamat keton, O Israel! Jaton aton bangsa je kilau keton inyalamat TUHAN. TUHAN kilau padang tuntang talawang akan keton; hapa milang keton tuntang manenga kamanang akan keton. Kare musoh keton kareh dumah balaku asi, tuntang keton kareh manandik ewen.” [31]