Read Ngaju DEUTERONOMIUM 34 Bible Online

DEUTERONOMIUM 34 - Ngaju bible

DEUTERONOMIUM 34

¹Palus Moses malihi janah Moab tuntang mandai Bukit Nebo, akan tantan Pisga intu hila timor Yerikho. Intu hete TUHAN mamparahan akae hapus lewu te, iete: tanah Gilead akan utara sampai lewu Dan;

²hapus tanah Naptali; tanah Epraim tuntang Manase, tanah Yuda akan barat sampai Tasik Bentok;

³hila salatan Yuda tuntang janah je hambirang bara Soar akan Yerikho, lewu je kontep dengan batang korma.

⁴ Palus TUHAN hamauh dengan Moses, “Jete ie lewu je injanji-Ku dengan Abraham, Isaak, tuntang Yakob uka inyarah akan turonan ewen. Aku mamparahae akam, Moses, tapi dia manyoho ikau haguet akan hete.”

⁵Palus Moses matei, rewar TUHAN intu tanah Moab, kilau insanan TUHAN helo bara te.

⁶TUHAN mangubur ie intu ije petak lampar intu Moab hong dipah lewu Bet-Peor, tapi sampai andau toh jaton ije biti oloh katawan hong kueh je pas eka kubure.

⁷Moses matei hong umur saratus due puluh nyelo. Kaabase dia mangurang tuntang paite magon tarang.

⁸Intu janah Moab Moses inangis awi bangsa Israel; ewen manatum katahin telo puluh andau.

⁹TUHAN manenga kaharati akan Yosua anak Nun awi ie jari inunjok Moses jadi panggantie. Bangsa Israel manumon auh Yosua tuntang malalus kare parentah je inenga TUHAN akan ewen hajamban Moses.

¹⁰ Intu Israel dia aton tinai nabi kilau Moses je hakotak bataharep bau dengan TUHAN.

¹¹Jaton je mawi taloh heran kilau je ilalus Moses dengan oloh Misir, rajae tuntang kare pagawaie tumon parentah TUHAN.

¹²Jaton je mawi kare gawi hai tuntang babehat kilau je ilalus Moses intu taharep baun hapus bangsa Isarel.