Read Ngaju DEUTERONOMIUM 4 Bible Online

DEUTERONOMIUM 4 - Ngaju bible

DEUTERONOMIUM 4

¹Palus Moses hamauh dengan bangsa te, “Keleh numon kakare parentah je iajar awiku akan keton, mangat keton tau belom sampai keton melai tanah je kareh inenga TUHAN, Hatallan tato hiang keton, akan keton.

² Taloh je irentahku, isut mahin ela mandahange atawa mangurange. Numon kare parentah TUHAN Hatallan keton je inengaku akan keton.

³ Keton mite kabuat taloh je ilalus TUHAN, Hatallan keton intu Bukit Peor. Genep biti je manyembah Baal intu eka te imbinasae.

⁴Tapi keton je baketep intu TUHAN, Hatallan keton, magon belom sampai toh.

⁵Kakare parentah te iajarku akan keton tumon je irentah TUHAN Hatallangku. Keleh manumon kare taloh handiai te intu lewu je akan iname tuntang ielai keton te.

⁶Keleh malalus jete dengan baketep. Amon keton malalus tumon te, maka kaharatin keton gitan awi kare bangsa beken. Amon ewen mahining tahiu kare parentah te, ewen kareh hamauh, ‘Lalehan kaharati tuntang kapintar bangsa je hai te!’

⁷Bangsa hai je kueh je hatallae kalote katokepe amon oloh manggau ie sama kilau TUHAN, Hatallan itah, tokep dengan itah? Ie tombah hamparea bewei itah balaku dohop dengae,

⁸tuntang bangsa hai je kueh tempon kare Parentah je kalote kabujur kateteke sama kilau kare Parentah je iajarku akan keton andau toh?

⁹Keleh manantuani tuntang mingat toto-toto, mangat hapus umur keton, keton dia kalapean taloh je jari gitan keton kabuat. Keleh manyarita akan anak esom,

¹⁰tahiu andau te, metoh keton mendeng intu hila baun TUHAN, Hatallan keton, intu Bukit Sinai. Metoh te Ie hamauh dengangku, ‘Keleh manumpong bangsa te. Aku handak mangat ewen mahining taloh je handak inyampai-Ku, mangat ewen bajar baketep dengang-Ku katahin andau pambelom ewen, tuntang mangat ewen majar kare anak ewen uka harajur baketep manempo Aku.’

¹¹ Keleh manyarita akan kare anak keton kilen ampie keton dumah tuntang mendeng intu pain Bukit je inyangkulep asep je kaput kilau baunandau je bakapal hayak apui je hanyala sampai akan langit.

¹²Limbah te TUHAN hamauh dengan keton bara apui, tuntang keton mahining auhe, tapi dia mite ie kilau ampin tampan en bewei.

¹³ Intu hete ie mansanan akan keton taloh je akan ilalus keton mangat malalaus janji je Awie dengan keton. Sapuluh Parentah je jari inyurat Awie intu due bindang batu te musti ilalus awi keton.

¹⁴ TUHAN manyoho aku majar keton uras kare atoran je musti inumon intu lewu je akan iname tuntang ielai keton te.”

¹⁵“Keleh mingat toto-toto! Katika TUHAN hamauh dengan keton bara huang apui intu Bukit Sinai, keton dia mite en-en.

¹⁶ Awi te jaga ela sampai keton badosa tagal manguan akan arep keton hampatong uka inyembah huang ampin en bewei, hatue atawa bawi,

¹⁷ burong atawa lauk, meto manyarantar atawa meto je beken.

¹⁸

¹⁹Ela badosa awi manyembah atawa manempo, taloh je gitam intu langit: matanandau, bulan, tuntang kare bintang. TUHAN, Hatallan keton manalua kare bangsa beken manyembah kare taloh awang te.

²⁰ Tapi keton bangsa je inyalamat Awie bara Misir, eka keton buah kapehe paham. Keton iimbit balua bara lewu te, mangat jadi bangsa Ayue kabuat kilau ampin keton toh.

²¹ Tapi TUHAN, Hatallan keton sangit dengangku tagal keton; ie sumpah tahiu aku je dia akan dimpah Sungei Yordan mangat tame akan lewu je basiwoh je inenga akan keton.

²²Dia tahi tinai keton kareh dimpah tuntang manguasa tanah je basiwoh te; tapi aku dia omba, awi aku akan matei intu hetoh.

²³Ingat toto-toto! Ela kalapean dengan janji je inampa TUHAN, Hatallan keton dengan keton. Keleh manumon parentah Ayue. Ela samasinde manguan akan arep keton hampatong tumon ampin en bewei akan inyembah,

²⁴ awi TUHAN, Hatallan keton sama kilau apui je mangehu. Ie dia maku inyama dengan narai bewei.

²⁵Tinai amon keton jari tahi melai intu lewu te tuntang jari manak meso, ela badosa awi manampa akan arep keton hampatong huang ampin en bewei. Gawi te ije kapapa intu matan TUHAN, Hatallan keton hayak mawi Ie basingi.

²⁶Keleh langit tuntang petak andau toh akan saksi amon keton dia manumon auhku, keton bajeleng lilap bara petak je ielai keton intu dipah Sungei Yordan te. Keton dia tahi melai intu hete; keton imbinasa samasinde.

²⁷ TUHAN mawi keton kasaburan marak kare bangsa beken tuntang baya isut intu marak keton je tetep belom.

²⁸Intu hete keton manempo kare hatalla je inampa awi lengen olon, atawa hatalla bara kayu tuntang batu je dia tau mite atawa mahining, dia tau kuman atawa mambewau.

²⁹ Palus keton manggau TUHAN, Hatallan keton; amon keton manggau dengan salepah ateim, keton kareh sondau Ie.

³⁰Amon keton buah uras kare calaka te tuntang keton aton huang kajake, keton palus haluli akan TUHAN, Hatallan keton tuntang manumon auh Ayue.

³¹TUHAN, Hatallan keton puna Hatalla je paham pamasi. Ie dia malihi atawa mambinasa keton, atawa mangalapean janji je iawie kabuat dengan tato hiang keton.

³²Keleh misek tahiu taloh jaman horan, kejau helo bara keton inakan, manampara bara katika Hatalla manampa olon intu kalunen toh. En puji taloh kahain toh manjadi helo? En aton oloh puji mahining tahiu kajadian macam jetoh?

³³En puji aton bangsa je tetep belom limbah mahining ije hatalla hakotak dengan ewen bara apui, kilau je ingkeme keton?

³⁴En puji aton ije hatalla je bahanyi manduan ije bangsa bara kare bangsa je aton palus mawi ewen ungkup ayue kabuat, sama kilau je ilalus TUHAN, Hatallan keton, akan keton intu Misir? Keton mite kabuat kilen ampie Hatalla dengan kaabas Aie je hai mampadumah calaka tuntang parang, mawi kare taloh heran tuntang malalus taloh je hai?

³⁵ Urase te imparahan TUHAN akan indu mamparahan baya TUHAN te Hatalla, tuntang jaton je beken.

³⁶Bara langit ie mampahining auhe akan keton mangat majar keton. Intu kalunen toh Ie jari namparahan akan keton apuie je hai, tuntang bara apui te Ie hakotak dengan keton.

³⁷Awi Ie sinta tato hiang keton palus keton jari intih Awie. Hapan kuasan Aie je hai keton jari imbit Awie balua bara Misir.

³⁸Kare bangsa je labih hai tuntang labih abas iharak bara taharep keton, uka magah keton akan lewun ewen je inenga Awie aka keton, lewu je metoh toh ayun keton.

³⁹Awi te keleh katawan andau toh tuntang ela kalapean: TUHAN je tunggal Hatalla intu langit tuntang intu hunjun petak; jaton je beken.

⁴⁰Keleh manumon uras kare Parentah je inengaku akan keton andau toh, maka keton tuntang turonan keton sanang tuntang harajur belom intu lewu je inenga TUHAN, Hatallan keton jadi ain keton sampai katatahie.”

⁴¹ Palus Moses maninjuk telo lewu intu hila timor Sungei Yordan

⁴²jadi lewu eka kalindong, eka oloh tau manyalamat arep amon ie dia tantai ihat jari mampatei oloh je dia musohe. Ie tau mandari arepe akan ije bara lewu te mangat dia impatei kea.

⁴³Akan suku Ruben inyadia lewu Beser intu padang pasir; akan suku Gad lewu Ramot intu tanah Gilead, tuntang akan oloh Manase lewu Golan intu tanah Basan.

⁴⁴Palus Moses manenga Parentah tuntang kare atoran bara Hatalla akan bangsa Israel.

⁴⁵Taloh te ilaluse limbah ewen balua bara Misir tuntang aton intu tanah hila timor Sungei Yordan, hataharep dengan lewu Bet-Peor. Tanah te awan tanah Sihon, rajan oloh Amori, je bihin marentah intu lewu Hesbon. Moses tuntang bangsa Israel mampakalah ie metoh ewen balua bara Misir.

⁴⁶

⁴⁷Ewen manguasa tanah Raja Sihon te, tuntang tanah Raja Og bara Basan, ije biti raja Amori beken je melai intu hila timor Sungei Yordan.

⁴⁸Tanah te hambirang bara lewu Aroër intu saran Sungei Arnon, palus akan utara sampai Bukit Siryon,[4] iete Bukit Gantong Hermon,

⁴⁹tuntang hapus tanah intu hila timor Sungei Yordan tuntang akan salatan sampai Tasik Matei intu pain Bukit Gantong Pisga.