Read Ngaju DEUTERONOMIUM 5 Bible Online

DEUTERONOMIUM 5 - Ngaju bible

DEUTERONOMIUM 5

¹Moses mamumpong hapus bangsa Israel, palus hamauh dengan ewen, “Kare pahari, keleh hining kare Parentah je inengaku akan keton andau toh. Keleh bajar bara kare Parentah te hayak manumon dengan baketep.

²Intu Bukit Sinai TUHAN, Hatallan itah, mawi ije janji,

³dia baya dengan tato hiang itah, tapi dengan uras itah hetoh.

⁴Bara apui intu hunjun Bukit te TUHAN handak hakotak langsung dengan keton.

⁵Tapi awi keton mikeh dengan apui tuntang dia bahanyi mandai Bukit, maka aku metoh te mendeng helat keton dengan TUHAN mangat manyampai auh TUHAN akan keton. TUHAN mansanan,

⁶‘Aku TUHAN, Hatallan keton, je mimbit keton balua bara Misir, eka keton ihajipen.

⁷Ela manyembah kare Hatalla beken. Sembah Aku bewei.

⁸ Ela manampa akan arep keton hampatong je manumon taloh en bewei je aton intu langit, intu petak atawa intu huang danum penda petak.

⁹ Ela manyembah hampatong tumon te awi Aku TUHAN, Hatallan keton. Aku dia handak inyama dengan en bewei. Kare oloh je manyingi Aku ihukum-Ku sampai turonan je katelo tuntang kaepat.

¹⁰Tapi Aku mamparahan sintang-Ku akan bakoya-koyan turonan[5] bara kare oloh je sinta dengang-Ku tuntang manumon parentah-Ku.

¹¹ Ela manyewut arang-Ku bararangai, awi Aku, TUHAN, Hatallan keton, mahukum eweh bewei je mahapan arang-Ku sala.

¹² Haga andau Sabat tuntang hormat kilau andau je brasih, awi aku TUHAN, Hatallan keton je marentahe akan keton.

¹³ Ikau inenga-Ku jahawen andau uka bagawi,

¹⁴tapi andau je kauju iete andau malayan je tantai akang-Ku bewei, TUHAN, Hatallan keton. Intu andau te dia ije biti oloh tau bagawi, aloh ikau, aloh kare anakm, kare pembantum, meto ayum atawa oloh bangsa beken je melai intu lewum. Kare pembantum malayan kilau ikau kabuat.

¹⁵Ingat je keton bihin ihajipen intu Misir, palus iliwus awi TUHAN, Hatallan keton dengan kaabas je hai. Tagal te ikau irentahku uka mahaga andau Sabat.

¹⁶ Hormat tuntang rega bapam tuntang indum; jete parentah-Ku, TUHAN, Hatallan keton, mangat ikau belom sanang tuntang panjang umur intu lewu je kareh inenga-Ku akan keton.

¹⁷ Ela mampatei oloh.

¹⁸ Ela habandong.

¹⁹ Ela manakau.

²⁰ Ela manenga saksi tanjaro tahiu oloh beken.

²¹ Ela mipen taloh ayun oloh beken: humae, petake, sawae, kare pembantue, metoe, kalidaie atawa taloh en bewei je ayue.’

²² Jete kare auh je ingotak TUHAN akan keton metoh keton hapumpong intu bukit. Katika Ie hakotak hapan auh mangguroh bara apui tuntang baunandau je bakapal, Ie manenga kare Parentah te, dia je beken. Palus Ie manyurate intu due bindang batu tuntang manengae akangku.”

²³“Metoh hapus bukit hanyala tuntang keton mahining auh bara kakaput, uras pamimpin suku keton tuntang kare oloh basewut dumah manalih aku.

²⁴Koan ewen, ‘TUHAN, Hatallan itah jari mamparahan katamame tuntang kahain Aie metoh ikei mahining Ie hakotak bara apui. Andau toh ikei jari manyaksie je olon puna tau tetep belom, aloh Hatalla jari hakotak dengae.

²⁵Tapi mbuhen ikei musti bataroh hapan tahaseng ikei tinai? Apui je hai te kareh mambinasa ikei! Ikei percaya je ikei akan matei amon mahining TUHAN, Hatallan ikei, hakotak tinai.

²⁶En puji aton olon je tetep belom limbah mahining Hatalla je belom hakotak bara apui?

²⁷Tagal te, keleh Moses haguet, hining uras je insanan TUHAN, Hatallan itah, palus nyampai akan ikei taloh je insanan Awie akam. Ikei kareh mahininge tuntang manumoe.’

²⁸Mahining auh te, TUHAN hamauh dengangku, ‘Aku mahining taloh je insanan bangsa te. Puna toto auh ewen.

²⁹Coba amon ewen harajur mangkeme kalote! Coba amon ewen harajur mahormat Aku tuntang manumon uras parentah-Ku, sampai ewen tuntang turonan ewen sanang palus katatahie!

³⁰Toh keleh lius tuntang soho bangsa te haluli akan genep kemahe.

³¹Tapi ikau, Moses, keleh haluli tuntang melai intu hetoh dengang-Ku; akan keton kareh inenga-Ku uras atoran tuntang parentah-Ku. Keleh majar akan ewen, mangat ewen manumon intu lewu je inenga-Ku akan ewen.’

³²Kare pahari, keleh numon dengan baketep uras taloh je irentah TUHAN, Hatallan keton akan keton.

³³Keleh malalus kakare taloh je irentah TUHAN, Hatallan keton, akan keton mangat keton sanang tuntang tau manetep intu lewu je akan ielai keton.”