Read Ngaju DEUTERONOMIUM 6 Bible Online

DEUTERONOMIUM 6 - Ngaju bible

DEUTERONOMIUM 6

¹“TUHAN, Hatallan keton manyoho aku majar uras kare Parentah toh akan keton mangat keton malaluse intu lewu je dia tahi hindai ielai keton.

²Keleh keton tuntang turonan keton belom mahormat Hatallan keton tuntang manumon uras kare Parentah Aie je inyampaiku akan keton, mangat keton panjang umur intu lewu te.

³Tagal te keleh kare pahari mahining tuntang malalus te dengan baketep, mangat keton sanang tuntang jadi bangsa je hai intu lewu je tatau tuntang basiwoh, kilau je injanji TUHAN, Hatallan tato hiang itah.

⁴ Kare pahari, keleh mingat! Baya TUHAN, tuntang TUHAN bewei Hatallan itah![6]

⁵ Keleh ikau sinta TUHAN, Hatallan keton, hapan salepah ateim: Parahan jete hapan cara ikau belom tuntang hapan gawim.

⁶ Ela samasinde mangalapean kare parentah je inengaku akan keton andau toh.

⁷Keleh ajar akan kare anakm. Keleh keton mamandere intu huang huma tuntang intu luar huma, metoh malayan tuntang metoh bagawi.

⁸Peteng intu penangm tuntang kepan intu lingkaum[7] uka iingat.

⁹Nyurat intu jihin bauntonggang humam tuntang intu lawangm.”

¹⁰ “TUHAN, Hatallan keton, hajanji dengan tato hiang keton Abraham, Isaak tuntang Yakob je Ie kareh manenga tanah te akan keton. Kare lewue hai tuntang sanang hapanatau. Jete dia keton je mamangue.

¹¹Kare humae kontep dengan kare ramo je bahalap, tuntang dia keton je manyuange. Ikau kareh sondau kare kalin danum, tuntang dia keton je mangalie. Ikau kareh sondau kare kabon anggor tuntang saitun, tuntang dia keton je mimbule. Amon TUHAN mimbit keton akan lewu te, tuntang intu keton uras aton taloh je handak kinan keton,

¹²haga toto-toto mangat keton ela mangalapean TUHAN je jari malapas keton bara tanah Misir eka keton ihajipen.

¹³ Keleh mahormat TUHAN, Hatallan keton, nempo ie bewei tuntang amon keton sumpah, lalus jete huang aran Aie bewei.

¹⁴Ela manyembah kare hatalla beken je inyembah kare bangsa beken je melai hakaliling keton.

¹⁵Amon keton manyembah kare hatalla beken, maka keton kareh buah kasangit TUHAN, Hatallan keton tuntang imbinasae samansinde, awi TUHAN, Hatallan keton je aton intu bentok keton dia maku inyama dengan en bewei.

¹⁶ Ela maningkes TUHAN, Hatallan keton kilau je ilalus keton intu Masa.

¹⁷Keleh manumon uras Parentah je inenga TUHAN, Hatallan keton akan keton.

¹⁸Keleh malalus taloh je manumon TUHAN bahalap tuntang bujur, maka keton kareh sanang mangat. Petak basiwoh je injanji TUHAN akan keton, kareh jadi ayun keton.

¹⁹Ikau kareh maharak kare musoh keton kilau je injanji TUHAN.

²⁰Rahian andau, kare anak keton kareh misek dengan keton, ‘Mbuhen TUHAN, Hatallan itah manyoho itah manumon uras kare parentah te?’

²¹Palus keton tombah kalotoh, ‘Bihin itah jadi jipen raja Misir, palus TUHAN malapas itah hapan kaabas je hai.

²²Ikei kabuat mite TUHAN malalus kare taloh heran tuntang kare taloh je mangkarieng akan oloh Misir tuntang rajan ewen dengan kakare pagawaie.

²³Ie maliwus itah bara Misir uka mimbit itah akan hetoh. Tanah toh inenga Awie akan itah kilau je injanji Awie akan tato hiang itah.

²⁴TUHAN, Hatallan itah manyoho itah malalus uras kare parentah te tuntang mahormat Ie. Amon itah malaluse kalote, Ie kareh harajur mahaga bangsa itah mangat tetep belom sanang.

²⁵Amon itah dengan baketep manumon uras taloh je irentah TUHAN, Hatallan itah akan itah,[8] Ie kareh tau dengan itah.’ ”