Read Ngaju DEUTERONOMIUM 7 Bible Online

DEUTERONOMIUM 7 - Ngaju bible

DEUTERONOMIUM 7

¹ “TUHAN, Hatallan keton kareh mimbit keton akan lewu je kareh ielai keton, are bangsa kareh iharak bara hete. Intu taharep mata baum Ie kareh maharak uju bangsa je labih hai tuntang labih abas bara keton, iete oloh Het, Girgasi, Amori, Kanaan, Peris, Hewi tuntang Yebusi.

²Amon TUHAN, Hatallan keton maharak kare bangsa te akan huang kuasan keton tuntang keton mampakalah ewen, patei ewen urase. Ela masi ewen atawa mawi janji dengan ewen.

³Keton dia tau kawin dengan ewen, tuntang ela manyoho kare anak keton kawin dengan ewen,

⁴mangat ewen dia mangejau anak keton bara TUHAN uka manyembah kare hatalla beken. Amon keton manyembah kare hatalla beken, TUHAN sangit hayak keton kareh gulong imbinasae.

⁵ Tagal te, derep kare mesbeh kare bangsa te, pahancor kare tihang batu je ianggap ewen bagana. Palongkang kare tanda ain Asera, keleh mapui kare hampatong dewa je inyembah ewen.

⁶ Lalus uras kare taloh te, awi keton ayun TUHAN, Hatallan keton. Bara hapus bangsa hunjun petak, keton ih je intih TUHAN, Hatallan keton mangat jadi ungkup Ayue je jaton tandinge.

⁷Keton inyinta tuntang intih TUHAN, dia awi keton labih hai bara kare bangsa beken; je katotoe, keton bangsa je pangkakorike intu hunjun petak.

⁸Tapi TUHAN mintih keton awi Ie sinta keton tuntang Ie malalus janji je Awie dengan tato hiang keton. Jete bukue Ie jari manyalamat keton hapan kuasa je hai tuntang maliwus keton bara kahajipen dengan raja Misir.

⁹ Keleh mingat je TUHAN, Hatallan keton iete Hatalla je tunggal tikas ije, tuntang Ie Hatalla je baketep. TUHAN manggenep janjin Aie tuntang mamparahan sintan Ayue je tetep sampai sakoyan turonan akan oloh je sinta Ie tuntang manumon kare parentah Ayue.

¹⁰Tapi dengan dia langkamen Ie mahukum ewen je basingi Dengae.

¹¹Tagal te, numon uras kare atoran je inyampai-Ku akan keton andau toh.”

¹² “Amon keton manantuani kare parentah te, tuntang malaluse dengan baketep, maka TUHAN, Hatallan keton kareh baketep dengan janji je Awie dengan keton. Ie kareh mamparahan sintan Ayue je baketep denga keton, sama kilau je injanji Awie dengan tato hiang keton.

¹³Ie kareh sinta tuntang mamberkat keton, sampai kare anak keton are tuntang dahang-dahanga. Ie akan mamberkat kare tanan keton, sampai mahasil gandom, anggor tuntang undus saitun. Ie kareh mamberkat keton sampai are kambing tuntang sapi tabirin keton. Uras berkat te kareh inarima keton intu lewu je inenga TUHAN akan keton, tumon janjin Ayue akan tato hiang keton.

¹⁴Bara kakare bangsa hong kalunen, jaton ije je mandino berkat je hakotohe sama kilau je akan keton. Marak keton tuntang uras kare meto ain keton jaton ije je kareh tamanang.

¹⁵Keton kareh ingalindong TUHAN bara kare panyakit tuntang ingejau bara kare calaka je gitan keton intu Misir. Tapi kare calaka te kareh intakan Awie akan kare musoh keton.

¹⁶Genep bangsa je inyarah TUHAN, Hatallan keton akan huang kuasan keton, musti imbinasa awi keton, ela mamparahan asin keton akan ewen. Ela manyembah kare hatallan ewen, awi gawi te mampadumah calaka akan keton.

¹⁷Mikeh keton manyewut bangsa te labih hai karee sampai keton dia olih maharak ewen,

¹⁸tapi ela mikeh dengan ewen. Keleh mingat taloh je ilalus TUHAN, Hatallan keton dengan raja Misir tuntang hapus rayate.

¹⁹Keleh mingat kare calaka hai je gitan keton kabuat, kare taloh heran, tuntang kaabas hai je ingguna TUHAN, Hatallan keton hapa maliwus keton. Kalote kea TUHAN, Hatallan keton kareh mawie akan kare bangsa je ingikeh keton.

²⁰Tinai TUHAN, Hatallan keton kareh mampalembut karidu[9] marak ewen, sampai kare oloh je tau hadari tuntang manyahokan kea kareh binasa.

²¹Awi te ela mikeh dengan kare bangsa te. TUHAN Hatallan keton mangalindong keton. Ie Hatalla je hai tuntang dia lue-luen.

²²Kare bangsa te kareh iharak Awie misut-misut bara taharep keton. Keton dia tau mampalomos ewen bajeleng, mangat kare meto basiak ela mandahang tuntang mampikeh keton.

²³Kalote TUHAN, Hatallan keton kareh manyarah musoh keton akan keton. Ie kareh mampanyanyau ewen sampai ewen binasa.

²⁴Ie kareh manyarah kare rajan ewen akan keton. Ewen kareh impatei awim, tuntang aran ewen kareh ingalapean. Jaton ije je tau belom manaharep keton, uras ewen kareh impalomos keton.

²⁵Keleh manusul kare hampatong dewa je inyembah ewen. Ela mipen perak atawa amas je leket dengae tuntang ela manduae akan arep keton kabuat. Amon keton malanggar parentah te, keton kareh matei, Awi TUHAN, Hatallan keton manyingi gawi manyembah hampatong dewa.

²⁶Ela mandak ije hampatong dewa intu huang humam, mangat sapa je buah ie ela buah keton kea. Taloh te puna inyingi keton tuntang itong keton randah, awi inyapa TUHAN.”