Read Ngaju DEUTERONOMIUM 8 Bible Online

DEUTERONOMIUM 8 - Ngaju bible

DEUTERONOMIUM 8

¹“Uras kare atoran je inengaku akan keton andau toh musti ilalus dengan baketep, mangat keton tetep belom, mandahang karee, tuntang melai tanah je injanji TUHAN dengan tato hiang keton.

²Keleh mingat! Epat puluh nyelo katahie TUHAN, Hatallan keton mamimpin keton huang jalanan je kejau mahalau padang pasir. Pangguet te ingahandak awi TUHAN hapa mancoba keton, mangat Ie tau mite taloh je aton huang atei keton tuntang en keton manumon kare parentah Ayue.

³ Ie manalua keton balau, palus keton inenga Awie manhu akan kinan. Keton tuntang tato hiang keton dia puji kuman panginan kilau te helo bara te. TUHAN mawi jete hapa majar keton je kalunen dia belom awi panginan bewei, tapi bara kakare taloh je ingotak TUHAN.

⁴Katahin epat puluh nyelo toh pakaian keton dia kupit tuntang pain keton dia kembang.

⁵Keleh mingat, TUHAN Hatallan keton majar keton sama kilau ije biti bapa majar kare anake.

⁶Tagal te, lalus uras taloh je irentah TUHAN, Hatallan keton. Keleh belom tumon kare parentah Aie tuntang mahormat Ie.

⁷TUHAN, Hatallan keton mimbit keton akan tanah je basiwoh; lewu je are sungei tuntang mahasor danume, dengan dehes danum intu penda petak je nahasak akan kare petak randah tuntang kare bukit.

⁸Tanah te mahasil kare macam gandom, anggor, bua ara, bua dalima, batang saitun tuntang mado.

⁹Intu hete keton kareh dia balau atawa bara katapas. Huang batu karange aton sanaman, tuntang bara kare bukite keton tau mangali tambaga.

¹⁰Keton kareh kuman sakalepah belai, tuntang manarima kasih akan TUHAN, Hatallan keton tagal petak basiwoh je inenga Awie akan keton.”

¹¹ “Keleh jaga bua-buah ela sampai keton mangalapean TUHAN, Hatallan keton. Ela dia malaluse, aloh ije bara hapus parentah Aie je inengaku akan keton andau toh.

¹²Amon keton jari kuman sakalepah belai tuntang jari mamangun kare huma je bahalap akan eka keton melai,

¹³tuntang amon jari mandahang kare sapi tuntang kambing tabirin keton, perak tuntang amas hayak kakare ramon keton je beken.

¹⁴Keleh jaga bua-buah mangat keton dia palus balecak tuntang mangalapean TUHAN, Hatallan keton je maliwus keton bara Misir, eka keton ihajipen.

¹⁵TUHAN mimbit keton mahalau padang pasir je lombah tuntang babehat, je are handipe tada tuntang kalae. Intu petak je keang jaton danum mahasor, Ie mampalua danum bara batu mangat keton mihop salepah belai keton.

¹⁶Intu padang pasir Ie manenga manhu akan panginan, panginan je dia ingatawan tato hiang keton. TUHAN malalus te hapa mancoba keton tuntang mamparandah atei keton, mangat kajariae Ie tau mawi gawi bahalap akan keton.

¹⁷Tagal te, ela samasinde manirok je hapan gawin keton tuntang kaabas keton kabuat keton tau tatau.

¹⁸Ingat TUHAN, Hatallan keton, je manenga panatau te akan keton. Taloh te ilalus Awie karana sampai andau toh Ie magon baketep dengan janji je inampae dengan tato hiang keton.

¹⁹Ela kalapean dengan TUHAN, Hatallan keton tuntang ela mules akan kare hatalla beken mangat manara tuntang manempo ewen. Andau toh aku mampingat keton iete amon keton malaluse kea, keton batantu imbinasa awi TUHAN.

²⁰Amon keton dia manumon auh TUHAN, Hatallan keton, keton kea kareh imbinasa Awie, sama kilau kare bangsa je impalomose intu taharep bau matan keton.”