Read Ngaju DEUTERONOMIUM 9 Bible Online

DEUTERONOMIUM 9 - Ngaju bible

DEUTERONOMIUM 9

¹“Keleh hining o, kare pahari! Andau toh keton dimpah Sungei Yordan mangat manguasa tanah kare bangsa je labih hai tuntang labih abas bara keton. Kare lewun ewen hai-hai dengan dindinge je pangue kagantong langit.

²Kare oloe hai tuntang abas bitie; ewen te raksasa, keton jari mahining je jaton ije biti oloh je olih malawan ewen.

³Toh keton kareh mite kabuat kilen ampie TUHAN, Hatallan keton mananjong intu hila baun keton kilau apui je mangehu. Ie akan mampakalah ewen intu taharep baun keton, sampai keton tau maharak tuntang mambinasa ewen bajeleng kilau je injanji TUHAN.

⁴Limbah TUHAN, Hatallan keton maharak ewen tagal keton, ela mangira je keton imbite akan hete mangat mandino tanah te awi keton bahalap tuntang malalus kahandak TUHAN, Hatalla, sampai keton tau manarimae. Dia samasinde! TUHAN maharak kare bangsa te akan keton awi ewen oloh papa. TUHAN manalua keton manduan tanah ewen, awi Ie handak malalus janjin Aie akan tato hiang keton Abraham, Isaak tuntang Yakob.

⁶Percaya ih je TUHAN, Hatallan keton dia manyarah tanah basiwoh te akan keton awi keton patut manarimae. Dia! Keton toh bangsa je parisang.

⁷Keleh mingat kilen ampie keton jari mamparahas TUHAN, Hatallan keton intu padang pasir. Bara keton malihi Misir sampai keton dumah akan hetoh, keton malawan TUHAN.

⁸Tinai intu Bukit Sinai keton paham mamparahas TUHAN, sampai Ie handak mambinasa keton.

⁹ Aku mandai bukit te uka manarima batun janji je inampa TUHAN akan keton. Epat puluh andau tuntang epat puluh alem katahie aku melai intu hunjun bukit te jaton kuman atawa mihop.

¹⁰Limbah te TUHAN manenga akangku due-due batu je jari inyurat awi Hatalla kabuat. Intu batu te tarasurat kare auh je insanae bara bentok apui akan keton, metoh keton hapumpong intu pain bukit.

¹¹Yoh, limbah mahalau epat puluh andau tuntang epat puluh alem TUHAN manenga akangku kadadue batun janji te.

¹²Palus TUHAN hamauh dengangku, ‘Mohon jeleng, awi bangsa ayum je imbitm balua bara Misir jari mawi kapapa. Ewen jari mahiwang bara kare parentah-Ku, tuntang manampa hampatong akan inyembah.’

¹³TUHAN kea hamauh dengangku, ‘Tawang-Ku bangsa te paham badungil.

¹⁴Ela mancoba mangahana Aku. Aku handak mambinasa ewen sampai jaton oloh je mingat ewen tinai. Tapi ikau kareh iawi-Ku bapa bara ije bangsa je labih bahalap, tuntang labih abas bara ewen.’

¹⁵Palus aku mules, sambil mimbit due-due batun janji dengan kadadue lenge, aku mohon bukit je kanjeran apuie hanyala.

¹⁶Aku mite je keton jari malanggar parentah TUHAN, Hatallan keton. Keton jari badosa intu taharep TUHAN awi manampa akan arep keton kabuat ije hampatong sapi je inoangan.

¹⁷Palus intu taharep baun keton batun janji te ihampasku sampai pusit kiwak-kiwaka.

¹⁸Palus sinde tinai aku sontop intu taharep baun TUHAN hong tantan bukit katahin epat puluh andau tuntang epat puluh alem, jaton kuman atawa mihop. Jete ilalusku awi keton jari badosa intu TUHAN ganan malalus taloh je itonge papa, sampai Ie sangit.

¹⁹ Aku mikeh dengan karahas TUHAN je hasep dengan keton sampai keton handak imbinasa Awie. Tapi sinde toh kea TUHAN mahining auhku.

²⁰TUHAN kea sangit toto dengan Aron sampai handak impateie, palus aku balakudoa akae kea.

²¹Hampatong sapi je inoangan tampan keton intarik awiku akan huang apui. Palus impahancorku tuntang inepeku sampai rotek kilau kawo, tuntang kawo te injakahku akan huang anak sungei je mahasor bara bukit te.

²² Tinai intu Tabera, Masa tuntang Kibrot-Taawa, keton mamparahas TUHAN.

²³ Palus metoh keton inyoho TUHAN malihi Kades-Barnea uka miar tuntang manguasa tanah je kareh inengaku akan keton, keton malawan parentah TUHAN, Hatallan keton; keton dia maku percaya atawa manumon auh Ayue.

²⁴Bara aku kasene keton, keton harajur malawan TUHAN.

²⁵Aku katawan TUHAN selang handak mambinasa keton. Palus katahin epat puluh andau tuntang epat puluh alem aku sontop intu taharep baun TUHAN

²⁶tuntang balakudoa kalotoh: O TUHAN pangkahai, ela mambinasa ungkup Ayum toh, bangsa je ilapas Awim tuntang iagah Awim balua bara Misir hapan kaabas tuntang kuasan Aim je hai.

²⁷Ingat dengan kare rewar Aim Abraham, Isaak tuntang Yakob. Ela mitong karisang, kapapa tuntang dosan bangsa toh.

²⁸Amon ungkup Ayum impalomosm kea, maka oloh Misir kareh hamauh, ikau dia olih mimbit bangsa Ayum akan lewu je injanji akan ewen. Tuntang Ikau mimbit ewen akan padang pasir mangat mampatei ewen, awi Ikau basingi dengan ewen.

²⁹Tapi ingat, TUHAN, ewen toh bangsa je intih Awim jadi ungkup Ayum, tuntang imbit Awim bara Misir hapan kaabas tuntang kuasan Aim je hai.”