Read Ngaju YOHANES 1 Bible Online

YOHANES 1 - Ngaju bible

YOHANES 1

¹Hong sola-solake, helo bara kalunen injadian, Auh te jari aton. Auh te aton hinje Hatalla tuntang auh te sama dengan Hatalla.

²Bara solake Ie hinje Hatalla

³Kare taloh handiai injadian mahalau Ie, tuntang bara kare taloh handiai je aton, ije mahin jaton je jari injadian dia mahalau Ie.

⁴Auh te asal pambelom,[1] tuntang pambelom te manenga kalawa akan olon.

⁵Kalawa te manyingah huang kakaput, tuntang kakaput dia olih mambelepe.

⁶ Maka dumah oloh je inyoho Hatalla, Yohanes arae.

⁷Ie dumah mambarita tahiu kalawa te, mangat oloh samandiai percaya.

⁸Ie kabuat beken kalawa te, ie baya mambarita bewei.

⁹Jete kalawa toto je mampalawa oloh samandiai, dumah akan kalunen.

¹⁰Auh te aton hong kalunen, kalunen injadian mahalau Ie, tapi kalunen dia mangasene Ie.

¹¹Ie dumah akan lewun Ayue kabuat tapi bangsa Ayue dia manarima Ie.

¹²Tapi kare oloh je manarima Ie tuntang percaya dengan Ie, ewen te mandino hak manjadi anak Hatalla,

¹³je inakan dia bara olon, basa pambelom je taheta te bara Hatalla asale.

¹⁴Auh te jari manjadi olon, Ie melai hong marak itah, tuntang itah jari mite kahain Aie. Kahai te inarima kilau anak tunggal Bapa. Mahalau Ie itah mite Hatalla tuntang mite sintan Aie dengan itah.

¹⁵Yohanes dumah kilau saksi Ayue, ie mambarita: “Jetoh Ie je insanang-Ku: Ie kareh dumah rahian bara aku, tapi Ie labih hai bara aku, basa helo bara aku aton, Ie jari aton.”

¹⁶Ie kontep asi; jaton tikase, Ie mamberkat itah.

¹⁷Hukum Tuhan inarima itah bara Moses. Tapi asi tuntang kaketep Hatalla imparahan mahalau Yesus Kristus.

¹⁸Jaton oloh je puji mite Hatalla, beken bara anak tunggal Bapa, tuntang heret toto Dengae je sama dengan Bapa. Ie je mamparahan Bapa akan itah.

¹⁹Kare oloh Yehudi je mimbing kuasa hong Yerusalem manyoho kare imam tuntang kare oloh Lewi haguet manalih Yohanes tuntang misek dengae, “Ikau toh eweh?”

²⁰Yohanes mangaku dengan tarus-tarang, “Aku dia Raja Panyalamat.”

²¹ “Amon kalote, ikau eweh?” koan ewen misek. “En ikau Elia?” “Dia,” koan Yohanes tombah. “En ikau Nabi?”[2] koan ewen misek tinai. “Dia,” koae tombah.

²²“Amon kalote, sanan akan ikei eweh ikau toh,” koan ewen, “mangat ikei tau mansanan auh tombah ikei akan oloh je manyoho ikei. Narai auh ayum tahiu arepm kabuat?”

²³ Yohanes tombah, “Aku toh oloh je insanan awi Nabi Yesaya: ‘Oloh je mantehau hong padang pasir: Keleh mamparata jalan akan Tuhan.’ ”

²⁴Kare oloh je inyoho awi oloh Parisi[3]

²⁵misek, “Amon ikau dia Raja Panyalamat, dia Elia, dia kea Nabi, mbuhen ikau mampandoi?”

²⁶Yohanes tombah, “Aku mampandoi hapan danum. Tapi hong marak keton aton oloh je dia keton kasenee.

²⁷Ie dumah rahian bara aku, tapi aku toh mengkak talin sapatun Ayue mahin dia patut intu taharep Ie.”

²⁸Taloh handiai te manjadi hong Betania, silan Sungei Yordan hila timor tuntang eka Yohanes mampandoi.

²⁹Hanjewu tinai Yohanes mite Yesus dumah manalih ie. Palus Yohanes hamauh, “Ite, jete Anak tabirin Hatalla je mampuas dosan kalunen.

³⁰Ie toh je koangku akan dumah rahian bara aku, tapi labih hai bara aku, basa helo bara aku inakan, Ie jari aton.

³¹Helo bara te aku jaton katawan eweh Ie te. Padahal aku dumah mampandoi hapan danum mangat bangsa Israel mangasene Ie.”

³²Yohanes kea manenga kasaksian kalotoh, “Aku mite Roh Hatalla mohon sama kilau burong dara je mohon bara langit palus melai hunjun Ie.

³³Metoh te aku hindai katawan eweh Ie. Tapi Hatalla je manyoho aku mampandoi mahapan danum jari hamauh dengangku, ‘Amon ikau mite Roh Hatalla mohon, palus melai intu hunjun ije biti oloh, Ie te je kareh mampandoi mahapan Roh Hatalla.’

³⁴Aku kabuat jari mite Ie,” koan Yohanes, “tuntang aku manenga kasaksian je Ie te Anak Hatalla.”

³⁵Hanjewu andau tinai Yohanes aton hong eka te dengan due murid Ayue.

³⁶Katika ie mite Yesus mahalau, ie hamauh, “Ite! Jete Anak Tabirin Hatalla.”

³⁷Kadadue murid Yohanes mahining kare auh te, palus haguet manuntut Yesus.

³⁸Yesus tampaliau akan likut, tuntang mite ewen metohe manuntut Ie. Ie misek. “Keton manggau en?” Ewen tombah, “Rabi, hong kueh Rabi melai?” (‘Rabi’ te rimae guru.)

³⁹“Has ite ih kabuat,” koan Yesus. Ewen haguet hayak Dengae tuntang mite hong kueh Ie melai. Metoh te pukul epat halemei. Andau te ewen melai Dengae.

⁴⁰Ije bara due biti oloh te jari mahining taloh je inyewut Yohanes tuntang palus haguet omba Yesus, iete Andreas, paharin Simon Petrus.

⁴¹Andreas jele-jeleng manggau Simon, paharie te, tuntang hamauh dengae, “Ikei jari hasondau dengan Mesias!” (Mesias te sama rimae dengan Kristus iete: Raja Panyalamat.)[4]

⁴²Andreas magah Simon manalih Yesus. Yesus mananture Simon, palus hamauh, “Ikau Simon, anak Yona. Ikau kareh inggare Kepas.” (Kepas sama rimae dengan Petrus, iete: bukit batu.)

⁴³Hanjewu andau tinai Yesus manukas arepe haguet akan Galilea. Ie hasondau dengan Pilippus, tuntang hamauh dengae, “Has omba Aku!”

⁴⁴Pilippus asale bara Betsaida, eka Andreas tuntang Petrus.

⁴⁵Pilippus hasondau dengan Natanael tuntang hamauh dengae, “Ikei jari hasondau dengan oloh je inyewut awi Moses huang Surat Hukum ain Hatalla, tuntang je imbarita awi kare nabi. Ie te Yesus bara Nasaret, anak Yosep.”

⁴⁶Tapi Natanael tombah, “En mungkin taloh je bahalap te dumah bara Nasaret?” “Has ite kabuat,” koan Pilippus.

⁴⁷Yesus mite Natanael dumah, palus hamauh tahiu Ie, “Ite, jete je puna toto oloh Israel. Huang ie jaton je tanjaro.”

⁴⁸“Kilen ampie Bapa mangasene aku?” koan Natanael misek Yesus. Yesus tombah, “Helo bara Pilippus mantehau ikau, Aku jari mite ikau hong penda batang ara te.”

⁴⁹“Bapa Guru,” koan Natanael, “Bapa toh anak Hatalla! Bapa Rajan bangsa Israel!”

⁵⁰Yesus hamauh, “Ikau percaya, baya awi Aku mansanan je Aku jari mite ikau hong penda batang ara te? Kare taloh je labih hai haream bara te ikau kareh tau mitee!”

⁵¹ Koan Yesus tinai, “Toto, keleh ikau percaya, ikau kareh mite langit buap, tuntang kare malekat Hatalla mohon mandai intu Anak Olon.”