Read Ngaju YOHANES 10 Bible Online

YOHANES 10 - Ngaju bible

YOHANES 10

¹“Toto haliai auh toh: Oloh je tame akan huang karambang tabiri mandai pagar tuntang dia mahalau bauntonggang, tapi mandai mahalau jalan beken, oloh te panakau tuntang parampok.

²Tapi oloh je tau mahalau bauntonggang, ie te sakatik tabiri.

³Oloh je manjaga karambang muap bauntonggang akae, tuntang kare tabirie manalih ie hong katika ie mantehau ewen dengan aran ewen mije-mije tuntang mangagalan ewen balua.

⁴Limbah kare tabiri te iimbite balua, sakatik te mananjong hila baun, tuntang kare tabiri te manuntut ie basa ewen mangasene auhe.

⁵Ewen dia maku manuntut oloh beken, ewen akan hadari haream bara oloh te, awi ewen dia kasene auhe.”

⁶Yesus manyarita paribasa te tapi ewen dia harati taloh je koae te.

⁷Maka Yesus hamauh sinde tinai, “Puna toto auh-Ku toh: Aku toh bauntonggang akan tabiri.

⁸Kare oloh je dumah helo bara Aku, uras panakau tuntang parampok, tapi kare tabiri dia mahining auh ewen.

⁹Aku toh bauntonggang. Eweh je tame mahalau Aku, akan salamat; ie tame-balua tuntang mandino panginan.

¹⁰Panakau dumah baya handak manakau, handak mampatei tuntang handak marusak. Tapi Aku dumah mangat oloh mandino pambelom — pambelom je hakutoh karee.

¹¹Aku toh Sakatik je bahalap. Sakatik je bahalap manenga hambaruae akan kare tabirie.

¹²Oloh je bagawi manduan upah ie dia sakatik tuntang dia kea ie tempon kare tabiri te, ie kareh hadari malihi kare tabiri te amon ie mite meto basiak dumah. Maka kare tabiri te kareh inangkarap tuntang kasaburan awi meto te.

¹³Oloh upahan te hadari, awi ie bagawi baya manduan upah. Ie dia paduli kare tabiri te.

¹⁴ Aku toh Sakatik ije bahalap. Sama kilau Bapa mangasene Aku tuntang Aku mangasene Bapa, kalote kea Aku mangasene kare tabiring-Ku tuntang ewen kea mangasene Aku. Aku manyarah hambaruang-Ku akan ewen.

¹⁶Magon aton tabiri beken ayung-Ku kea, tapi jaton tame kawan tabiri toh. Ewen te musti imbit-Ku kea tuntang ewen kareh mahining auh-Ku. Ewen samandiai akan manjadi[25] ije kakawan dengan ije Sakatik.

¹⁷Bapa sinta Aku awi Aku manyarah hambaruang-Ku, uka manarimae haluli.

¹⁸Ije biti mahin jaton oloh je tau manduae bara Aku. Aku manyarahe awi kahandakku kabuat. Aku bara kuasa uka manyarahe tuntang bara kuasa manduae haluli. Jete gawi je inarima-Ku bara Bapa.”

¹⁹Awi Yesus hakotak kalote, kare oloh Yehudi nampara hakaridu.

²⁰Are ewen je hamauh, “Ie kau ingumpang setan! Ie gila! Kanduen keton mahining auhe?”

²¹Tapi aton kea ewen je hamauh, “Oloh je ingumpang setan dia hakotak kalote! En tau setan mawi oloh babute tau mite?”

²²Hong Yerusalem, kare oloh metoh mahaga Pesta Hai Tame Human Tuhan. Metoh te wayah sadingen.

²³Yesus metohe mananjong hong Tambiran Salomo hong Human Tuhan,

²⁴katika kare oloh Yehudi dumah hapumpong mangaliling Yesus. Ewen hamauh, “Sampai hamparea ikau toh mawi ikei bembang? Sanan ih tarus-tarang, jaka ikau toh puna toto-toto Raja Panyalamat.”

²⁵Yesus tombah, “Jadi insanang-Ku akan keton, tapi keton dia percaya. Kare gawi je ilalus-Ku huang aran Bapa-Ku, manenga bukti tahiu Aku.

²⁶Keton dia percaya awi keton dia tame kawan tabiring-Ku.

²⁷Kare tabiring-Ku mahining auh-Ku. Aku kasene ewen, tuntang ewen manuntut Aku.

²⁸Aku manenga akan ewen pambelom je bujur tuntang katatahie, tuntang sampai katatahie ewen kareh dia binasa. Ije biti mahin jaton oloh tau marampas ewen bara lengeng-Ku.

²⁹Bapa-Ku, je jari manenga ewen akang-Ku, malabien[26] bara kare taloh samandiai. Tuntang ije biti mahin jaton oloh tau marampas ewen bara lengen Bapa.

³⁰Aku tuntang Bapa te ije.”

³¹Palus kare oloh Yehudi manduan batu tinai handak mamedak Yesus.

³²Tapi Yesus hamauh dengan ewen, “Keton jari mite Aku malalus are gawi bahalap je inyoho awi Bapa-Ku. Bara kare gawi te, je kueh je mawi keton handak mamedak Aku?”

³³ Kare oloh Yehudi te tombah, “Dia tagal kare gawin Aim je bahalap te ikei handak mamedak ikau hapan batu, tapi awi ikau mamapa Hatalla. Ikau ije biti olon, handak manjadian arep Aim kilau Hatalla.”

³⁴ Palus Yesus tombah, “En dia huang Buku Hukum ain keton tarasurat: Hatalla hamauh, ‘Keton toh hatalla’?

³⁵Itah katawan, taloh je inyurat huang Surat Barasih ihapan akan katatahie. Jadi amon Hatalla manggare kare oloh je manarima auhe te ‘hatalla’,

³⁶mbuhen keton manyewut Aku mamapa Hatalla awi-Ku hamauh Aku Anak Hatalla? Padahal Aku iintih awi Bapa tuntang inyoho akan kalunen.

³⁷Amon Aku dia malalus gawi je inyoho Bapa-Ku, ela percaya dengang-Ku.

³⁸Tapi awi Aku malaluse, percaya ih dengan taloh je iawi-Ku te, aloh keton dia maku percaya dengang-Ku. Maka kalote keton katawan tuntang harati je Bapa tetep hinje dengang-Ku, tuntang Aku tetep hinje dengan Bapa.”

³⁹Ewen manggau jalan tinai handak manawan Yesus, tapi Ie lapas bara ewen.

⁴⁰ Yesus haluli tinai akan dipah Silan Sungei Yordan, eka Yohanes bihin puji mampandoi oloh, palus melai intu hete.

⁴¹Are oloh dumah manalih Ie. Ewen hamauh, “Yohanes dia mawi kare taloh heran, tapi taloh handiai je insanae tahiu oloh toh uras toto.”

⁴²Palus are oloh intu hete percaya dengan Yesus.