Read Ngaju YOHANES 13 Bible Online

YOHANES 13 - Ngaju bible

YOHANES 13

¹Sinde andau sahelo bara Andau Pesta Paska, Yesus katawan jete katikae jari sampai Akae malihi kalunen toh uka haluli manalih Bapa Ayue. Ie sinta kare oloh Ayue hong kalunen, tuntang Ie tetep sinta ewen sampai kalepahe.

²Yesus tuntang kare murid Ayue metohe kuman hamalem. Setan jari manamean kahandake huang atei Yudas Iskariot uka ie mandarhaka mawi Yesus.[28]

³Yesus katawan je Bapa jari manyarah salepah kuasa Akae. Ie katawan kea je Ie dumah bara Hatalla tuntang akan haluli manalih Hatalla.

⁴Tagal te Ie mendeng mengkak jubah Ayue, tuntang mameteng handuk intu kahang Aie.

⁵Limbah te Ie manusoh danum akan huang baskom, palus nampara menyau kare pain murid Ayue tuntang mampuas jete hapan handuk je imeteng intu kahang Aie.

⁶Maka Ie sampai akan Simon Petrus, je hamauh, “Tuhan, lalehan Tuhan je menyau paingku?”

⁷Yesus tombah, “Metoh toh ikau dia harati taloh je iawi-Ku toh, tapi kareh ikau tau haratie.”

⁸“Ela Tuhan,” koan Petrus dengan Yesus, “ela haliai Tuhan menyau paingku!” Tapi Yesus tombah, “Amon Aku dia menyau ikau, maka ikau jaton hubungan dengang-Ku.”

⁹Simon Petrus hamauh, “Amon kalote, Tuhan, ela baya paingku tapi lengengku tuntang takolokku kea!”

¹⁰“Oloh je mandoi, jari barasih urase,” koan Yesus dengan Petrus. “Ie dia usah imparasih tinai; beken bara paie.[29] Keton toh jari barasih, tapi dia urase.” (

¹¹Yesus jari katawan eweh je akan mandarhaka mawi Ie. Jete bukue Ie hamauh, “keton toh jari barasih, tapi dia urase.”)

¹² Limbah Yesus menyau pain ewen, Ie mangkepan jubah Ayue haluli tuntang mondok tinai. Palus Ie hamauh dengan ewen, “En haratin keton taloh je harue nah Aku mawie akan keton?

¹³Keton mantehau Aku Guru tuntang Tuhan. Tuntang puna kalote.

¹⁴Amon Aku kilau Tuhan tuntang Gurun keton menyau pain keton, keton patut kea hapenyau pai sama arep keton.

¹⁵Aku manenga sonto toh akan keton mangat keton malalus taloh je jari iawi-Ku akan keton.

¹⁶ Toto haliai auh-Ku toh: Ije biti rewar dia labih hai bara tempoe, tuntang ije biti rewar dia labih hai bara oloh je manyoho ie.

¹⁷Amon keton jari katawan taloh handiai toh, salamat keton amon keton malaluse.

¹⁸ Taloh je isanang-Ku toh dia ie tahiu keton samandiai. Aku katawan ewe-eweh je jari iintih. Tapi jari aton tarasurat huang Surat Barasih, musti manjadi, iete ‘Oloh je kuman hayak dengang-Ku, akan malawan Aku.’

¹⁹Hal toh insanang-Ku akan keton metoh toh, helo bara hal te manjadi, mangat amon hal te kareh manjadi, keton kareh percaya Aku toh Ie je inyewut AKU ATON.

²⁰ Toto haliai auh-Ku toh: Oloh je manarima ie je inyoho-Ku, oloh te manarima Aku. Tuntang oloh je manarima Aku, manarima Ie je manyoho Aku.”

²¹Limbah Yesus hamauh kalote, Ie mangkeme paham manyengkel angat ateie. Palus Ie mansanan, “Puna toto auh-Ku toh: Ije biti bara marak keton kareh mandarhaka mawi Aku.”

²²Kare murid Ayue hatampayah sama arepe hayak hengan toto awi dia katawan eweh je koan Yesus te.

²³Murid je inyinta Yesus mondok hila silan Ie.

²⁴Simon Petrus manenga tanda akae, uka ie misek dengan Yesus eweh je koan Yesus te.

²⁵Maka murid te manokep Yesus tuntang misek, “Eweh ie Tuhan?”

²⁶Yesus tombah, “Oloh je inenga-Ku akae rote je inculop-Ku huang mangkok, jete ie oloe.” Maka Yesus manduan ije kahiris rote, manculop jete akan huang mangkok; palus manenga jete akan Yudas anak Simon Iskariot.

²⁷Sana limbah Yudas manarima rote te, maka setan tame akan huang ateie. Palus Yesus hamauh dengae, “Lalus bajeleng taloh je handak iawim.”

²⁸Ije biti mahin jaton bara ewen je mondok kuman hete harati mbuhen Yesus hamauh kalote dengan Yudas.

²⁹Aton je manyangka Yesus manyoho Yudas mamili taloh en-en je akan ihapan huang pesta te, atawa manenga isut duit akan oloh je belom susah — basa Yudas te mimbing duit kas ewen.

³⁰Limbah Yudas manarima rote te, ie palus balua. Andau jari hamalem.

³¹Limbah Yudas haguet, Yesus hamauh, “Toh Anak Olon impahai, tuntang Hatalla impahai mahalau Ie.

³²Amon Hatalla impahai mahalau Ie, Ie kea kareh impahai Hatalla mahalau arep Aie kabuat. Tuntang Hatalla kareh mampahai Ie bajeleng.

³³ O keton kare anak-Ku, Aku dia akan melai hinje keton hindai. Keton kareh manggau Aku, tapi sama kilau je jari insanang-Ku akan kare panguasa Yehudi, kalote kea Aku mansanae akan keton; eka je inalih-Ku, dia keton tau manalihe.

³⁴ Parentah taheta inenga-Ku akan keton: Keleh keton hasinta sama arep keton. Kilau Aku jari sinta keton, kalote kea keton musti hasinta sama arep keton.

³⁵Amon keton hasinta sama arep keton, oloh handiai kareh katawan je keton toh murid-Ku.”

³⁶“Tuhan, Tuhan handak haguet akan kueh?” koan Simon Petrus misek Yesus. Yesus tombah, “Metoh toh ikau dia tau omba akan eka je inalih-Ku. Rahian ikau kareh omba Aku.”

³⁷“Tuhan mbuhen aku dia tau omba Tuhan metoh toh?” koan Petrus misek tinai. “Aku rajin matei akan Tuhan!”

³⁸Yesus tombah, “En toto ikau rajin matei tagal Aku? Keleh ikau katawan, kareh, helo bara manok manando, ikau jari hantelo hamauh je ikau dia mangasene Aku!”