Read Ngaju YOHANES 14 Bible Online

YOHANES 14 - Ngaju bible

YOHANES 14

¹“Ela atei keton gogop,” koan Yesus dengan ewen. “Percaya ih[30] dengan Hatalla, tuntang percaya ih dengang-Ku kea.

²Hong human Bapa-Ku are eka melai. Aku haguet akan kanih uka manatap eka akan keton. Aku dia handak hamauh kalote dengan keton, jaka puna dia kalote.[31]

³Limbah Aku haguet manatap eka akan keton, Aku kareh haluli manduan keton, uka hong kueh Aku aton, hete kea keton aton.

⁴Keton katawan jalan akan eka je inalih-Ku.”

⁵Palus Tomas hamauh dengan Yesus, “Tuhan, ikei dia katawan akan kueh Tuhan haguet, kilen ampie ikei katawan jalae?”

⁶Yesus tombah, “Aku toh jalan hapan mangasene Hatalla tuntang mandino pambelom. Ije biti mahin jaton oloh tau dumah manalih Bapa, amon dia mahalau Aku.

⁷Jaka keton mangasene Aku, pasti keton kareh mangasene[32] Bapa-Ku kea. Metoh toh keton jari kasene Ie, tuntang jari mite Ie.”

⁸Maka Pilippus hamauh dengan Yesus, “Tuhan, parahan Bapa te akan ikei, mangat ombet angat ikei.”

⁹Tapi Yesus tombah, “Jari kalote katahie Aku hinje keton, tuntang hindai kea keton kasene Aku, Pilippus? Oloh je jari mite Aku, jari mite Bapa. Kilen ampie ikau tau hamauh, ‘Parahan Bapa te akan ikei’?

¹⁰Pilippus! En ikau dia percaya, je Aku toh hinje dengan Bapa tuntang Bapa hinje dengang-Ku? Taloh je insanang-Ku akam, Aku dia mansanae bara arep-Ku kabuat. Bapa je harajur hinje dengang-Ku, Ie te je mawi taloh samandiai te.

¹¹Keleh ikau percaya je Aku toh ije dengan Bapa tuntang Bapa te ije dengang-Ku. Atawa sadia-diae, ikau percaya ih tagal kare taloh je jari iawi-Ku.

¹²Toto haliai auh-Ku toh: Oloh je percaya dengang-Ku, kareh malalus taloh je jari iawi-Ku — malahan ie kareh malalus taloh je labih hai haream — awi Aku haguet manalih Bapa.

¹³Tuntang taloh je ilaku keton huang arang-Ku, jete kareh ilalus-Ku akan keton, uka Bapa impahai mahalau Anak.

¹⁴En bewei taloh je ilaku keton[33] huang arang-Ku, akan ilalus-Ku.”

¹⁵“Amon keton sinta Aku, keton kareh malalus kare parentah-Ku.

¹⁶Aku handak balaku dengan Bapa, tuntang Ie kareh manengae akan keton Pandohop je beken, je kareh melai hinje keton sampai katatahie.

¹⁷Iete Roh Hatalla je handak mangarinah katoto tahiu Hatalla. Kalunen dia tau manarima Ie, awi kalunen jaton mite tuntang jaton mangasene Ie. Tapi keton mangasene Ie, awi Ie melai hinje keton tuntang kareh hinje[34] dengan keton.

¹⁸Aku dia handak malihi keton kilau anak nule. Aku akan haluli tinai manalih keton.

¹⁹Baya hanjulo hindai kalunen dia akan mite Aku tinai. Tapi keton kareh mite Aku. Tuntang awi Aku belom, keton mahin kareh belom kea.

²⁰Amon andaue sampai, keton kareh katawan je Aku toh ije dengan Bapa, keton hinje dengang-Ku tuntang Aku hinje keton.

²¹Oloh je manarima kare parentah-Ku tuntang malaluse, oloh te je sinta Aku. Bapa-Ku akan sinta kare oloh je sinta Aku. Aku kea akan sinta oloh te tuntang mamparahan arep-Ku akae.”

²²Yudas (beken Yudas Iskariot) misek dengan Yesus, “Tuhan mbuhen Tuhan maku mangarinah arep akan ikei tapi dia akan kalunen?”

²³Yesus tombah, “Oloh je sinta Aku, kareh manumon auh ajar-Ku. Bapa-Ku handak sinta ie, Bapa tuntang Aku kareh dumah manalih ie tuntang melai hinje ie.

²⁴Oloh je dia sinta Aku, dia manumon auh ajar-Ku. Auh ajar je ihining keton te, dia bara Aku, tapi bara Bapa je manyoho Aku.

²⁵Taloh handiai te insanang-Ku akan keton sarai Aku magon hinje keton.

²⁶Tapi Roh Hatalla, Pandohop je akan inyoho Bapa huang arang-Ku, Ie te je kareh majar keton taloh handiai tuntang mampingat keton tahiu taloh handiai je jari insanang-Ku akan keton.

²⁷Kahanjak impelai-Ku akan keton. Kahanjak ayung-Ku kabuat je inenga-Ku akan keton. Taloh je inenga-Ku te dia sama kilau je inenga kalunen akan keton. Ela gogop, ela mikeh.

²⁸Keton jari mahining Aku hamauh, ‘Aku akan haguet, tapi Aku kareh dumah haluli manalih keton’. Amon keton sinta Aku, keton tau hanjak Aku haguet manalih Bapa, basa Bapa labih hai bara Aku.

²⁹Aku mansanan jete akan keton metoh toh, helo bara taloh handiai te manjadi, mangat kareh, amon taloh te manjadi, keton tau percaya.

³⁰Aku dia handak hakotak labih are hindai dengan keton, awi katikae jari sampai panguasa kalunen toh dumah. Tapi ie jaton kuasae mahunjun Aku.

³¹Tapi taloh samandiai te musti manjadi uka kalunen mangatawan je Aku sinta Bapa tuntang Aku malalus taloh handiai je irentah Bapa akang-Ku. Nah, keleh itah haguet bara hetoh.”