Read Ngaju YOHANES 15 Bible Online

YOHANES 15 - Ngaju bible

YOHANES 15

¹Koan Yesus tinai, “Aku toh batang anggor je bujur toto, tuntang Bapa-Ku te tukang kabon.

²Gagenep edan huang Aku je dia mamua, inetek Awie, tuntang gagenep edan je mamua ingurang kare dawee tuntang irasih Awie mangat labih are buae.

³Keton jari barasih tagal auh ajar je inenga-Ku akan keton.

⁴Keleh keton tetep hinje dengang-Ku tuntang Aku mahin tetep hinje keton. Edan kabuat dia tau mamua amon ie dia tetep intu batange. Kalote kea keton baya tau mamua, amon keton tetep hinje dengang-Ku.

⁵Aku toh batang anggor, tuntang keton toh kare edae. Oloh ije tetep hinje dengang-Ku tuntang Aku hinje ie, ie kareh mamua are; basa amon Aku jaton, keton dia tau mawi taloh en-en.

⁶Oloh je dia tetep hinje dengang-Ku, kareh inganan sama kilau edan palus keang. Kare edan je sama kilau te kareh imumpong tuntang inganan akan huang apui, palus inusul.

⁷Amon keton tetep hinje dengang-Ku tuntang auh ajar-Ku melai huang atei keton, laku ih dengan Bapa taloh je ingahandak keton; palakun keton te kareh inenga.

⁸Amon keton mamua are, Bapa-Ku impahai; tuntang awi kalote, keton toto-toto manjadi murid-Ku.

⁹Kilau Bapa sinta Aku, kalote kea Aku sinta keton. Keleh keton tetep belom kilau oloh je inyinta-Ku.

¹⁰Amon keton malalus kare parentah-Ku, keton tetep heret dengan sintang-Ku sama kilau Aku heret dengan sintan Bapa awi-Ku malalus kare parentah Ayue.

¹¹Taloh handiai toh insanang-Ku akan keton, mangat kahanjak-Ku aton huang atei keton, tuntang kahanjak keton manjadi tinduh barasih.

¹² Parentah-Ku iete: Keleh keton hasinta sama arep keton, sama kilau Aku sinta keton.

¹³Oloh je paling sinta dengan sobate, oloh te je manenga pambelome akan ewen.

¹⁴Kare sobat-Ku iete keton toh, amon keton malalus kare taloh je irentah-Ku akan keton.

¹⁵Aku dia hindai manyewut keton rewar karana rewar jaton katawan taloh je iawi tempoe. Aku mantehau keton sobat, karana taloh handiai je ihining-Ku bara Bapa, jari insanang-Ku akan keton.

¹⁶Dia ie keton je mintih Aku. Aku toh je mintih keton, tuntang manyoho keton haguet mangat mamua are — iete kare bua je dia tau binasa. Maka Bapa kareh manenga akan keton en bewei je ilaku keton dengae huang arang-Ku.

¹⁷Jetoh ie parentah-Ku akan keton: Keleh keton hasinta sama arep keton.”

¹⁸“Amon kalunen basingi keton, ingat je Aku toh jari labih helo inyingi awi kalunen.

¹⁹Jaka ih keton toh ain kalunen, keton kareh inyinta awi kalunen kilau oloh ayue. Tapi Aku jari mintih keton bara kalunen toh, jadi keton dia hindai ain kalunen. Jete sababe kalunen basingi dengan keton.

²⁰ Ingat taloh je jari insanang-Ku akan keton, ‘Rewar dia labih hai bara tempoe.’ Amon ewen jari mangapehe Aku, ewen kareh mangapehe keton kea. Amon ewen manumon auh ajar-Ku, ewen kareh manumon auh ajar keton kea.

²¹Taloh handiai te kareh iawi ewen akan keton, awi keton murid-Ku, awi ewen dia mangasene Ie je manyoho Aku.

²²Jaka Aku dia dumah tuntang jaton mansanan taloh handiai te akan ewen, ewen dia badosa. Tapi toh ewen jaton alasan hindai akan dosan ewen.

²³Oloh je basingi Aku, basingi bapa-Ku.

²⁴Jakae hong bentok ewen Aku dia malalus kare taloh je hindai puji ilalus awi oloh beken, ewen dia badosa. Tapi toh ewen jari mite taloh je ilalus-Ku, tuntang ewen basingi dengang-Ku kalote kea dengan Bapa-Ku.

²⁵ Tapi puna musti manjadi kilau te mangat manjadi taloh je tarasurat huang Surat Hukum ewen, iete: ‘Ewen basingi Aku jaton bara buku sababe.’

²⁶Aku kareh manyoho manalih keton, Pandohop je asale bara Bapa, iete Roh je kareh mamparahan katoto tahiu Hatalla. Amon Ie dumah, Ie kareh manenga kasaksian tahiu Aku.

²⁷Tuntang keton kea musti manenga kasaksian tahiu Aku, awi keton jari hinje Aku bara solake.